Joriy yilning yanvaridan iyul oyigacha boʻlgan davr oraligʻida 1395 nafar aholi jamoat ishlariga jalb qilindi

Mamlakatimizda xalqimizning turmush farovonligini oshirishga, ular uchun barcha sohalarda qulayliklar yaratishga qaratilgan izchil islohotlar amalga oshirilmoqda. Bunda aholi bandligini taʼminlash orqali daromad topishlariga erishish, kambagʻallikni qisqartirish asosiy vazifa qilib qoʻyilgan.

Shunisi eʼtiborliki, salkam olti oydan beri yurtimizda davom etayotgan koronavirus pandemiyasi tufayli daromadidan ayrilgan, iqtisodiy nochor ahvolga tushib qolgan yoshlarning, ayol-qizlarning bandligini taʼminlashga, ijtimoiy himoya qilishga alohida eʼtibor qaratilmoqda.

Tuman Aholi bandligiga  koʻmaklashish markazi tomonidan ishsiz, chetga ishlashga keta olmagan yoki qaytib kelgan fuqarolarning bandligini taʼminlash uchun boʻsh ish oʻrinlaridan xabardor qilish maqsadida ovul va mahalla fuqarolar yigʻinlarida xabarlar muntazam berib borildi va yangilanib borilmoqda. Shuningdek, mahalla va xonadonlarga chiqib ishlash mexanizmi joriy etildi. Joriy yilning yanvaridan iyul oyigacha boʻlgan davr oraligʻida 1395 nafar aholi jamoat ishlariga jalb qilindi va ularning ish haqi toʻlovi uchun mablagʻlar toʻlab berildi. Obodonlashtirish, koʻkalamzorlashtirish, daraxtlarni oqlash, ularga ishlov berish, ariqlar hamda ichki yoʻllarni tozalash, Obodonlashtirish boshqarmasi va “Toza hudud” korxonasi buyurtmalari boʻyicha markaziy koʻchalar va xiyobonlarni tozalash, koʻkalamzorlashtirish, gul koʻchatlarini ekish va parvarishlash, maishiy chiqindilarni toʻplash hamda olib chiqish kabi ishlarga jalb etildi. Xususan, yangi tashkil etilgan Xotira maydoni hududini obodonlashtirish va koʻkalamzorlashtirishga 50 nafar, Istirohat bogʻiga 70 nafar, piyodalar yoʻlakchalarini tartibga keltirish ishlariga 50 nafar, nogironligi bor, ehtiyojmand oilalar hovli-joyini taʼmirlashga 30 nafar fuqaro jalb qilindi.

Shuningdek, fermer xoʻjaliklari va klaster korxonalarining buyurtmasiga koʻra, dala ishlariga 272 nafar fuqarolar ishga yoʻnaltirildi va barchasiga oylik maoshlari uchun mablagʻ oʻz vaqtida oʻtkazib berildi.

Karantin davrida oʻrnatilgan tartib-qoidalar inobatga olingan holda noanʼanaviy va nostandart jamoat ishlari turlari ham joriy etildi. Davlat sanitariya-epidemiologiya nazorati markazi xodimlariga qoʻshimcha kuch sifatida dezinfektsiyalash ishlariga koʻmaklashish uchun 49 nafar vaqtincha ishsiz fuqarolar, ichki ishlar va Milliy gvardiya xodimlariga amaliy yordam koʻrsatishga 20 nafar, blok-postlarda xizmat koʻrsatishga 10 nafar fuqarolar ishga olindi.

Mamlakatimizda inson qadr-qimmati ulugʻ, uning oʻz hayotidan rozi boʻlib yashashi uchun koʻpgina chora-tadbirlar amalga oshirilmoqda.

Maʼlumki, koronavirus pandemiyasi tufayli oʻrnatilgan karantin qoidalariga muvofiq zaruratsiz uydan chiqmaslik, yaqinlar, qoʻni-qoʻshnilarnikiga bormaslik, mehmon chaqirmaslik, sanitariya-gigiyena talablariga qatʼiy amal qilish tavsiya etildi. Bularning ijrosi yakka-yolgʻiz, oʻzgalar parvarishiga muhtoj insonlarning qarovsiz qolib ketishiga olib kelishi mumkinligi inobatga olinib, ana shunday toifadagi fuqarolarni parvarishlash uchun 40 nafar oʻrta  tibbiyot xodimlari jalb qilindi.

Sektorlarda oʻtkazilgan oʻrganishlar davomida yanvar-iyul oylarida “Temir daftar”ga kiritilgan 361 ta kam taʼminlangan, ehtiyojmand oilalar ishsiz aʼzolarining bandligini taʼminlash, daromad topishiga sharoit yaratish maqsadida tomorqasiga yengil tipdagi issiqxonalar qurish, ekin ekish, urugʻ, koʻchat, sugʻorish vositalari xarid qilishlari uchun 776,9 mln. soʻm subsidiya mablagʻlari berildi.

Shuningdek, shu yilning birinchi choragida 84 nafar ishsiz fuqaro kasb-hunarga oʻqitilib, ishga joylashishiga koʻmak berildi. Yil boshidan beri 200 nafar ishsiz fuqarolarga ishsizlik nafaqasi tayinlandi va toʻlab berildi. Shu oʻrinda aytish joizki, ishsiz fuqarolarni tadbirkorlikka jalb qilish, ularning mehnat faolligini oshirishga ham alohida eʼtibor qaratilmoqda.

Ishsiz, ijtimoiy himoyaga muhtoj fuqarolar uchun yangi ish oʻrinlari yaratish, ularning oilasida daromad manbalari koʻpayishiga va pirovardida iqtisodi yuksalishiga erishish asosiy maqsadimizdir.

Alisher SOBIROV, tuman Aholi bandligiga koʻmaklashish markazi direktori.