Davlat xizmatlari sayyor tarzda koʻrsatilmoqda

Aholining vaqtini va moddiy xarajatlarini tejash maqsadida tuman Davlat xizmatlari markazi tomonidan ishlab chiqilgan “Yoʻl xaritasi” asosida tizimli ishlar amalga oshirilmoqda. Markazda sayyor davlat xizmatlarini koʻrsatish yoʻlga qoʻyilgan boʻlib, tuman markazidan olis hududlarda yashovchi aholi qatlamiga sayyor tartibda davlat xizmatlari koʻrsatishga alohida eʼtibor qaratilayotgani xalqimizga manzur boʻlmoqda.

Xususan, davlat xizmatlari koʻrsatish sohasida “Litsenziyalash va ruxsat berish tartib-tamoyillarini tubdan takomillashtirish chora-tadbirlari toʻgʻrisida”gi 6044-sonli Prezident Qarori va Oʻzbekiston Respublikasi Vazirlar Mahkamasining “Kadastr sohasida ayrim davlat xizmatlari koʻrsatishning maʼmuriy reglamentlarini tasdiqlash  toʻgʻrisida”gi 535-sonli Qarori va boshqa qonun hujjatlarining mazmun-mohiyati yuzasidan keng tushunchalar berib borilayotganidan aholi mamnun.Joriy yilning 26-sentyabr sanasida tumanimizdagi Amir Temur nomli ovul aholisiga ham sayyor davlat xizmatlari koʻrsatilib, litsenziya va ruxsat berish yuzasidan qonunchiligimizga kiritilayotgan oʻzgartish va qoʻshimchalar, ishbilarmonlik va investitsiya muhitini tubdan yaxshilash, ortiqcha byurokratik  toʻsiqlarni bartaraf etish, eskirgan, zamon talablariga mos kelmaydigan tartib-qoidalarni takomillashtirish borsida mamlakatimizda amalga oshirilayotgan chora-tadbirlar xususida keng tushunchalar berildi. Shuningdek, ovul aholisining uy-joyga boʻlgan  mulk huquqini davlat roʻyxatidan oʻtkazish, farzandlarini MTTlarga joylashtirish, yakka tadbirkor sifatida ruxsatnoma olish, aholiga yoʻlovchi tashish xizmatini koʻrsatish boʻyicha ruxsatnoma va litsenziya olish haqidagi zarur hujjatlarni rasmiylashtirish boʻyicha batafsil maʼlumotlar taqdim etildi.

Shuni alohida eʼtirof etish kerakki, markaz xodimlari aholi xonadonlariga, hududlarda joylashgan fuqarolar yigʻinlariga borgan holda davlat xizmatlari koʻrsatishayotgani bois, yillar davomida rasmiylashtirish orqaga surilib kelayotgan aholining yer va mulk tadbirkorlik subʼektlarini roʻyxatga olishni hujjatlashtirish boʻyicha muammolari hal etilishiga imkon yaratilmoqda. Natijada joriy yil boshidan sayyor tartibda 1300dan ziyod davlat xizmatlari koʻrsatilib, 30 dan ortiq tadbirkorlik subʼektlari davlat roʻyxatidan oʻtkazildi.

2020-yilning oʻtgan davri davomida jami 34 mingdan ziyod davlat xizmatlari koʻrsatildi. Shundan 400 ga yaqini yuridik shaxslarga, 33 mingdan ortigʻi esa jismoniy shaxslar hisobiga toʻgʻri keladi. Oʻtgan davr mobaynida 700 dan ortiq tadbirkorlik subʼektlari davlat roʻyxatidan oʻtkazildi.

Ayniqsa, “Yoʻl xaritasi”ga koʻra, joylardagi sayyor qabullar, sayyor davlat xizmatlari koʻrsatish boʻyicha amalga oshirilayotgan tadbirlarda aholiga davlat xizmatlari koʻrsatish sohasidagi yangiliklar, qonunchilikdagi oʻzgarishlarning mazmun-mohiyati keng tushuntirilmoqda.

Amir Temur nomli ovulda tuman Davlat xizmatlari markazi tomonidan oʻtkazilgan sayyor davlat xizmati aholiga nihoyatda manzur boʻldi va yaratilgan imkoniyatdan foydalanib,  zarur hujjatlarni ortiqcha ovoragarchiliksiz shu yerning oʻzida rasmiylashtirib oldilar.

Umida Saparboyeva, tuman Davlat xizmatlari markazi mutaxassisi.