JISMONIY FAOLLIK OʻQITUVChIGA KUCh-QUVVAT BAGʻIShLAYDI, OʻQUVChI ESA RUHAN SOGʻLOM BOʻLADI

Yurtimizda taʼlim-tarbiya sohasida amalga oshirilayotgan barcha islohotlar zamirida yagona maqsad – yosh avlodni har tomonlama komil, jismoniy jihatdan yetuk va sogʻlom qilib tarbiyalashda xizmat qiluvchi mahoratli va malakali pedagog kadrlarni tayyorlashdan iborat.
Prezidentimiz Sh.Mirziyoyev Oʻzbekistonda umumiy oʻrta va maktabdan tashqari taʼlim tizimini isloh qilishning ustuvor yoʻnalishlarini, shu barobarida oʻsib kelayotgan yosh avlodni maʼnaviy-axloqiy, jismoniy jihatdan yetuk, sogʻlom qilib tarbiyalash, ularni mustaqil hayotga tayyorlash pedagoglarning asosiy vazifasi ekanligini belgilab berdi.
Bugungi kunda har bir inson oʻzini sogʻlom, tetik, baquvvat his qilishga, ishchanlik qobiliyatini saqlashga harakat qiladi. Bu borada bizning 41-sonli  umumtaʼlim maktabimizda sezilarli yutuqlarga erishilmoqda. Albatta, insonning, ayniqsa, pedagog kadrlarning sogʻlom boʻlishi birinchi galda, sport va badantarbiya mashgʻulotlari tufaylidir. Barchaning ham yuqori malakali sportchi yoki musobaqalarda qatnashib, biror-bir mukofotni olishi shart emas. Lekin har bir oʻqituvchi oʻz imkoniyatlaridan kelib chiqqan holda sport va badantarbiya mashgʻulotlari bilan shugʻullanishni odat qilsa, kun oʻtgan sayin xotirasi yaxshilanib, fikri teranlashib, jismida kuch yigʻilayotganini his etadi.
Jismoniy tarbiya va sport bilan shugʻullanish, oʻsib kelayotgan avlodning barkamol boʻlib voyaga yetishida muhim ahamiyatga ega. Shu bilan birga ularning boʻsh vaqtlaridan unumli  foydalanishlariga imkon yaratadi. Ayniqsa, bolalik va oʻsmirlik davridan boshlangan chiniqish mashgʻulotlari juda foydalidir.
Demak, oʻz jismini chiniqtirish, mehnat unumdorligini oshirish, sogʻliqni mustahkamlash asosida uzoq umr koʻrishni istagan har bir kishi doimo jismoniy tarbiya bilan shugʻullanishlari zarur. Muntazam ravishda badantarbiya mashqlarini bajarish oʻqituvchiga jismoniy kuch-quvvat bagʻishlaydi, oʻquvchi esa ruhan tetiklashib, darslarni yaxshi oʻzlashtiradi. Agar buyuk bobokalonimiz Abu Ali Ibn Sinoning “Badantarbiya – sogʻliqni  saqlashda ulugʻvor usuldir” degan oʻgiti har bir insonning hayotiy shioriga aylansa, kishi hech qachon kasallikka chalinmaydi.

Manas NURJONOV,
41-sonli maktabning jismoniy tarbiya fani oʻqituvchisi.