TADBIRKORLAR MUROJAATLARI IJOBIY HAL ETILMOQDA

Tadbirkor – elga madadkor. Haqiqatan ham tadbirkor, ishbilarmon insonlar safi oshgan sari xalqimiz turmush farovonligi ham yuksalib borayotganini bugungi kundagi toʻkin-sochinlikda, farovonlikda yaqqol koʻrmoqdamiz. Prezidentimiz ham: “tadbirkor boy boʻlsa, xalq ham boy boʻladi”, - degan iborani bejizga takrorlamaydilar.
Prezidentimiz tomonidan mamlakatimizda tadbirkorlikni qoʻllab-quvvatlash, ularning huquqiy himoyasini taʼminlashga qaratilgan Farmon va Qarorlarning qabul qilinishi ham, eng avvalo xalq farovonligini yuksaltirish, mamlakat taraqqiyotini yanada yuqori pogʻonaga koʻtarishga yoʻnaltirilgani bilan muhim ahamiyatga ega. Xususan, Prezidentimizning 2019-yil  14-maydagi “Tadbirkorlik faoliyatini qoʻllab-quvvatlash va himoya qilish tizimini tubdan takomillashtirish chora-tadbirlari toʻgʻrisida”gi Farmoni ijrosini taʼminlash borasida amalga oshirilayotgan keng koʻlamli ishlar tadbirkorlar huquqlari buzilishining oldini olish, ularning mulkiy va shaxsiy huquqlarini himoya qilish, oʻzlari faoliyat yuritayotgan yoʻnalishlar miqyosini kengaytirish, bank kreditlaridan maqsadli foydalanishlarini taʼminlashda muhim ahamiyat kasb etmoqda.
Bugungi tadbirkor toʻla davlat himoyasida. Uning huquqi buzilgan taqdirda yoki oʻz faoliyatini yuritish jarayonida muammolar yuzaga kelganida dardini tinglovchi, zarur yoʻl-yoʻriqlar koʻrsatib, muammolarini hal qilishda koʻmaklashuvchi davlat va jamoat tashkilotlari doimo yordamga tayyor. Bu borada Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi ularning faoliyatini samarali tashkil etish, aniqlangan muammolarni har tomonlama tahliliy oʻrganib, hal etishda tadbirkorlarga eng yaqin koʻmakdosh.
Tumanimizda faoliyat olib boruvchi Oʻzbekiston Respublikasi Bosh vazirining qabulxonasi tomonidan 2020-yil 1-oktyabrgacha hududlarda 32 ta sayyor qabullar tashkil etildi. Olib borilgan targʻibot-tashviqot ishlari hamda oʻtkazilgan suhbatlar davomida qabulxonada jami  238 ta murojaatlar roʻyxatga olindi. Ushbu murojaatlarning 64 tasi oʻtkazilgan sayyor qabullar orqali, 79 tasi bevosita qabulxonaga murojaat qilish orqali,     90 tasi “Ishonch telefoni” orqali, 5 tasi business.gov.uz portali orqali elektron tarzda kelib tushgan.
Roʻyxatga olingan murojaatlardan 162 tasi qanoatlantirildi, 85 tasiga tushuntirishlar berilib, 3 tasi ish  jarayoni hisobiga kiritildi.
Murojaatlar asosan kredit masalasida boʻlib, 65 ta, shu jumladan,  “Yoshlar — kelajagimiz” dasturi orqali 3 ta, “Har bir oila – tadbirkor” dasturi boʻyicha 23 ta, boshqa yoʻnalishlardagi tadbirkorlik faoliyati uchun 14 ta, shuningdek, xorijiy valyutada kredit olish boʻyicha kelib tushgan arizalarning asosiy qismi qanoatlantirildi. Bundan tashqari, koronavirus pandemiyasi natijasida faoliyatida zarar koʻrayotgan tadbirkorlar tomonidan kredit muddatini uzaytirish boʻyicha  qilingan murojaatlar ham qanoatlantirilib, ayrimlariga huquqiy maʼlumotlar berildi.
Yer, kadastr va arxitektura, qurilish masalalari, jumladan, yer resurslari va davlat kadastri hamda fermer xoʻjaliklari yer masalalari va bino-inshootlar ajratish masalalari boʻyicha qabulxonaga kelib tushgan murojaatlar ham atroflicha oʻrganilib, zarur yordam va tushuntirishlar berildi
Shuni alohida taʼkidlash kerakki, Tadbirkorlar murojaatlarini koʻrib chiqish qabulxonasiga turli masalalarda murojaat qilayotgan tadbirkorlarga huquqiy maslahatlar berish, Respublika va mahalliy hokimiyat organlari tomonidan koʻrib chiqiladigan muammo va masalalarni oʻz vaqtida ijobiy hal etish maqsadida tegishli tashkilotlar bilan hamkorlik tizimi yoʻlga qoʻyilgan. Aynan shu yoʻnalishda infratuzilma, soliq masalalari hamda hujjatlarni rasmiylashtirish boʻyicha zarur huquqiy maslahatlar berib borilmoqda.
Qabulxona tomonidan korxona va tashkilotlarga yuborilgan murojaatlarni koʻrib chiqish mobaynida muddat buzilishi, yuzaki koʻrib chiqish holatlari boʻyicha korxona, tashkilot rahbarlariga, xususan, ATB “Agrobank” tuman filialiga va QR “Yermulkkadastr” DK tuman filiali, “Mikrokreditbank” Mangʻit filialiga kamchiliklarni bartaraf etish yuzasidan xatlar kiritildi.
Oʻtgan davr mobaynida tadbirkorlarning jamoatchilik Kengashi tomonidan kichik biznes va tadbirkorlikni rivojlantirishga toʻsiq va gʻov boʻlayotgan muammolarni bartaraf etish boʻyicha Qoraqalpogʻiston Respublikasidagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi huzuridagi tadbirkorlarning jamoatchilik Kengashiga 14 ta taklif kiritildi.
Qabulxona tomonidan oʻtkazilayotgan sayyor qabullarda Stomatologiya faoliyatini boshlash uchun davlat roʻyxatidan oʻtishda va faoliyatiga litsenziya olishda amaliy yordam soʻrab murojaat qilgan Baxtiyor Abdullayevning murojaati boʻyicha qabulxona tomonidan davlat roʻyxatidan oʻtishda hamda ruxsatnomalar, litsenziyalar va hujjatlar rasmiylashtirish masalalarida amaliy yordam berilib, qisqa muddatda ijobiy hal etilishiga erishildi. Shuningdek, tadbirkor Islom Jumamurodov shu yil mart oyidan karantin sababli faoliyat yuritmagan boʻlsa-da, tuman suv idorasi xodimlari suvdan foydalanganlik uchun aslida 350 ming soʻmlik qarzdorlikni 8 mln. soʻm deb asossiz hisoblashganligi boʻyicha murojaat qildi. Ushbu masala ham Tadbirkorlar murojaatlarini koʻrib chiqish qabulxonasi tomonidan koʻrib chiqilib, ijobiy hal etildi.
Shuni alohida eʼtirof etish kerakki, Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi tomonidan oʻtkazilayotgan sayyor qabullar jarayonida oʻnlab tadbirkorlarning murojaatlari ijobiy hal etilayotgani tufayli tumanimizda faoliyat yuritayotgan tadbirkorlarning Qabulxona faoliyatiga ishonchi tobora ortmoqda. Qanday muammo boʻlishidan qatʼiy nazar, barchasi ochiqlik va shaffoflik, huquqiy mezonlar asosida oʻrganilmoqda. Masʼul tashkilotlar bilan hamkorlikda ijobiy yechim topilayotgani bois, tadbirkorlar ham minnatdor boʻlishmoqda.

M.Urazboyev, Oʻzbekiston Respublikasi Bosh vazirining Amudaryo tumanidagi

Tadbirkorlar murojaatlarini koʻrib chiqish qabulxonasi mutaxassisi.