KOʻNGIL-KOʻNGILLARDAN SUV IChGAN UChRAShUV

Har bir kishining hayotida doʻst-birodarlarining oʻrni  juda muhim. Inson hayotining eng ogʻir damlarida doʻstlariga suyanadi, ularning mehridan, oqibatidan madad oladi, muammolariga birga yechim izlaydi. Doʻstlikni – iymon alomati ham deyishadi. Uning maskani koʻngil, u hech qanday mezon bilan oʻlchanmaydi. Haqiqiy doʻstlik har qanday manfaatlardan ustun turadi. Doʻstlar bilan hayot totli  va mazmunli boʻladi.

Inson hayoti davomida juda koʻp  odamlar qurshovida yashaydi, doʻstlar orttiradi. Biroq, begʻubor bolalik damlarini birga oʻtkazgan, olamcha hayrat va havas bilan birga maktab ostonasiga ilk qadam qoʻyib, birga ilm sirlarini oʻrgangan sinfdosh doʻstlarning  oʻrnini hech kim bosa olmaydi.

Ehtimol, maktablarni bitirib, har biri har yoqqa  sochilib ketgan sobiq sinfdoshlarning uchrashuvlari tobora anʼanaga aylanib borayotganligi shundan boʻlsa ajab emas.

Yaqinda Toʻlqin ovulida faoliyat yuritayotgan 33-sonli umumiy  oʻrta taʼlim maktabini bundan 20-yil muqaddam tugatib ketgan, 1983-yilda tugʻilgan sobiq oʻquvchilar ham oʻzlari taʼlim olgan maktabda uchrashuvga yigʻildilar. Ular 2 ta sinfda taʼlim olgan 58 nafar oʻgʻil-qizlar edilar. Maktab ostonasiga ilk qadam qoʻygan kunida ularni tajribali boshlangʻich sinf oʻqituvchilari Tursunboy Otajonov, Orzigul Gʻafurovalar iliq qarshi olib, qoʻllaridan tutib, harflarni yozishni, oʻqishni oʻrgatdilar.

Hali bolalik shoʻxliklarini tark etib ulgurmagan bolajonlarning barcha erkaliklarini, injiqliklarini bagʻrikenglik bilan kechirib, ilm dunyosi sari dadil qadam tashlashlariga erishgan, bugungi kunda barchasi hayotda oʻz oʻrinlarini topganlaridan koʻngli yuksalib yashayotgan mehridaryo ustozlari Orzigul Gʻafurova, Tursunboy Otajonov, sinf rahbarlari Rimboy Shomurodov, Pardabika Jumaniyozova, Jumagul Avazmurodova, maktab direktori Hanifa  Yaxshimova va boshqa oʻqituvchilar jamoasi ularni maktab ostonasida sogʻinch bilan qarshi oldilar.

Koʻzlarida hayajon, dillarida orziqish bilan kelgan sobiq sinfdoshlar ustozlari bilan salomlashib, omonlik soʻrashdilar.  Maktab direktori Hanifa Yaxshimova  barchani diydor lahzalari bilan qutladi. Keyin har bir sinf oʻquvchilari oʻzlarining ilk ustozlari bilan taʼlim olgan sinflariga kirishdi. Ustozlar sinf doskasiga kun mavzusini yozdilar: «Diydorlashuv!» Koʻngilga yaqin, samimiy, bunday quvonchli lahzalarda tillar koʻngil kechinmalarini soʻzlashga ojizlik qiladi.

Sobiq sinfdoshlar – mamlakatimizning turli burchaklaridan aynan shu uchrashuv uchun yetib kelgan bolalik doʻstlar avvalo oʻzlariga taʼlim-tarbiya bergan ustozlari – hayotdan bevaqt ketgan Amat Shomurodov, Sobir Xudanov, Ollambergan Muxtorov, Toʻlgʻonoy Navroʻzboyeva, Xadicha Jabborberganova, Muhammad Xudoyberganovlarni va aqlli, mehribon doʻstlari Begzod Mamutovlarni sukut saqlab, esga oldilar. Oʻzaro suhbatlardan,  maktab binosini sayr qilishdan soʻng, ushbu hududda istiqomat qiluvchi kam taʼminlangan, boquvchisini yoʻqotgan oilaga borib kundalik roʻzgʻor ehtiyojlari uchun ishlatiladigan mahsulotlarni xayriya sifatida topshirishdi va nogironligi boʻlgan bir fuqaroga qishki kiyim sovgʻa qildilar. Bundan ustozlari juda xursand boʻlishdi. Aslida bugun ushbu uchrashuvga yigʻilgan sinfdoshlar ustozlarining hurmatini, mehrini qozongan yigit-qizlar edi. Ular orasida Kenjaboy Ortiqov, Faxriddin Jumabekov, Munira Oʻrozboyeva, Shahlo Kazakboyeva, Bagʻila Davlatmurodovalar oʻzlari oʻqigan ushbu maktabda, ustozlari bilan yonma-yon, Dilfuza Tojimurodova, Sharofat Shomurodovalar esa 28-sonli maktabda oʻquvchilarga taʼlim-tarbiya berishmoqda.

Shuningdek, Gʻulomjon Eshalov, Mansur Vaisovlar ichki ishlar organlarida, Azamat Sobirov, Qurbonboy Erdoshevlar harbiy sohada xizmat qilishmoqda, Nazokat Qoʻchqorova esa ekolog. Sinfdoshlarning barchasi elda ibratli oilalar boʻlib yetishishgan.

Shoʻx bolalik davrlari, ustozlar saboqlari, oʻquvchilik hayotidagi esda qolarli voqealari haqidagi samimiy gurunglardan soʻng, uchrashuv Mangʻit shahridagi «Oʻzbegim» kafesida davom etdi. Kuy-qoʻshiqlarga shodon raqs tushayotgan ustozlar va sobiq sinfdoshlar ushbu uchrashuvdan oʻchmas taassurotlar oldilar. Koʻngillaridagi mehr-oqibat, doʻstlik rishtalari yanada mustahkamlandi.

Oygul RAJABOVA.