Shimoliy-gʻarbiy harbiy okrugi zobitlari tumanimiz yoshlari bilan uchrashdi

Prezidentimizning «Oʻzbekiston Respublikasi Qurolli Kuchlari tashkil etilganligining 29 yilligi hamda Vatan himoyachilari kunini nishonlashga tayyorgarlik koʻrish va oʻtkazish chora-tadbirlari toʻgʻrisida»gi Farmoyishiga koʻra, Oʻzbekiston Respublikasi Qurolli Kuchlari tashkil etilganligining 29 yilligi hamda Vatan himoyachilari kunini nishonlashga tayyorgarlik koʻrish va ushbu sanani munosib oʻtkazish maqsadida 2020-yil 15-dekabrdan 2021-yil 15-yanvar sanasigacha mamlakatimizda Vatanparvarlik oyligini oʻtkazish belgilandi. «Kim Vatanga sodiq boʻlsa, mendirman oʻsha!» umumiy shiori ostida Vatan himoyachilari kuniga bagʻishlangan tadbirlarni eng chekka hududlarda ham oʻtkazish, unga umumtaʼlim maktabining chaqiriqqacha yoshlarni tayyorlash boʻyicha mutaxassislarini keng jalb qilishga eʼtibor qaratildi. Chunki oʻsib kelayotgan yosh avlod qalbiga vatanparvarlik tuygʻusini yoshlikdan singdirib borishda chaqiriqqacha yoshlarni tayyorlash mutaxassislarining roli muhim ahamiyatga ega.

2021-yilning 7-yanvar sanasida Mangʻit shahridagi 9-sonli Bolalar musiqa va sanʼat maktabida Vatanparvarlik oyligi doirasida boʻlib oʻtgan uchrashuv tadbirida tumanimizdagi umumtaʼlim maktablarining chaqiriqqacha yoshlarni tayyorlash boʻyicha mutaxassis oʻqituvchilari, umumtaʼlim maktablarining faol, jamoatchi oʻquvchilari, shuningdek 21131-sonli shimoliy-gʻarbiy harbiy okrugi zobit va askarlari ishtirok etdilar.

«Kim Vatanga sdoiq boʻlsa, mendirman oʻsha!» shiori ostida Vatanparvarlik oyligi doirasida oʻtkazilgan mazkur tadbirda 21131-sonli shimoliy-gʻarbiy harbiy okrugi maʼnaviy-tarbiyaviy masalalar boʻyicha masʼul mutaxassis Temirov Suhrob Shodiqulovich uchrashuv ishtirokchilariga harbiy qurollar, texnikalar hamda mamlakatimiz Qurolli Kuchlari safida xizmat qilayotgan zobit va askarlar uchun yaratilgan shart-sharoitlar, shuningdek Oʻzbekiston Qurolli Kuchlarining harbiy salohiyati xususida gapirib, yoshlarning savollariga batafsil javob berdi.

Shuningdek, tadbirda tuman Mudofaa ishlari boʻlimi boshligʻi Azizbek Jonuzoqov Vatan himoyachisi boʻlish har bir yigit uchun shon-sharaf ekanligini, buning uchun yoshlar avvalo jismonan yetuk, sogʻlom, dunyoqarashi keng, tarix, matematika kabi fanlardan chuqur bilimga ega, sogʻlom fikrli boʻlishi zarurligi, yoshlarning oʻz iqtidorlarini namoyon etishlari, bilim asoslarini egallashlari uchun mamlakatimizda zarur shart-sharoit yaratilgani haqida keng toʻxtalib oʻtdi.

Qiziqarli savol-javoblarga boy oʻtgan uchrashuv tadbirida Oʻzbekiston Yoshlar Agentligi tuman boʻlimi boshligʻi Jasur Davletov mamlakatimizning turli hududlarida muddatli harbiy xizmat burchlarini oʻtayotgan tumanimiz yoshlari haqida uchrashuv tadbiri ishtirokchilariga faxrlanib soʻzlab berdi.

Tadbir davomida tuman madaniyat boʻlimi sanʼatkorlari hamda 9-sonli Bolalar musiqa maktabi oʻquvchilari hamkorlikda tayyorlagan kontsert dasturi namoyish etilib, tuman XTBga qarashli maktablarning bir guruh chaqiriqqacha yoshlarni tayyorlash boʻyicha mutaxassislari yoshlarni harbiy vatanparvarlik, ona Vatanga sadoqat ruhida tarbiyalash borasidagi alohida yutuqlari uchun tuman Mudofaa ishlari boʻlimi tomonidan taqdirlandilar.

Uchrashuv tadbirining yakuniy qismida ishtirokchilar zamonaviy harbiy qurol-aslahalar koʻrgazmasi bilan tanishdilar. Shu bilan birga 21131-sonli shimoliy-gʻarbiy harbiy okrugi harbiylari tomonidan qoʻl jangi, harbiy sport mashgʻulotlari, bayramona marsh sadolari ostida qadam tashlash kabi harbiy mashqlar ham namoyish etilib, safda yurish qoidalari amalda koʻrsatib berildi.

Vtanparvarlik oyligi doirasida «Kim Vatanga sodiq boʻlsa, mendirman oʻsha!» shiori ostida boʻlib oʻtgan harbiy zobitlar va yoshlar uchrashuvi ishtirokchilarda ona yurtga cheksiz mehr-muhabbat, Vatanga sodiqlik tuygʻusini yanada mustahkamladi.

Robiya YOʻLDOShEVA.