YIL YaKUNLARI MUHOKAMA QILINDI

7-yanvar kuni Amudaryo tumani hududida 2020-yil davomida qonun ustuvorligini taʼminlash, fuqarolarning huquq va erkinliklari, jamiyat va davlat manfaatlarini muhofaza qilish, jinoyatchilik va huquqbuzarliklarning oldini olish borasida olib borilgan ishlar muhokamasiga bagʻishlangan yigʻilish boʻlib oʻtdi.

Yigʻilishga tuman hokimligi masʼullari, huquqni muhofaza qiluvchi organlar xodimlari, korxona tashkilotlar rahbarlari, oʻzini oʻzi boshqarish organlari raislari va oʻrinbosarlari ishtirok etdilar. Yigʻilishni tuman hokimi Sultonboy Yoʻldashev ochdi va olib bordi.

Yigʻilish kun tartibidagi masala yuzasidan tuman prokurori Javlonbek Muftullayevning maʼruzasi tinglandi.

U oʻz soʻzida tuman prokuraturasi tomonidan 2020-yilda barcha sohalarda olib borilgan nazorat tadbirlari natijasida 272 ta prokuror nazorati hujjati qoʻllanilib, ularning muhokamasiga koʻra, 60 nafar shaxs intizomiy, 78 nafar shaxs maʼmuriy, 13 nafar shaxs jinoiy javobgarlikka tortilganligi, tergov va nazorat tadbirlari davomida davlat va jamiyat manfaatlariga yetkazilgan jami 232 million 698 ming soʻmlik zarar ixtiyoriy undirilib, 119 nafar shaxsning buzilgan huquqlari tiklanishi taʼminlanganligini qayd etdi.

Yurtimizda tadbirkorlikni qoʻllab-quvvatlash, ularga keng yoʻl ochib berish yuzasidan koʻpgina chora-tadbirlar amalga oshirilayotganligiga qaramasdan ayrim davlat organlari xodimlari tomonidan qator kamchiliklarga yoʻl qoʻyilmoqda. Xususan, tuman prokuraturasi tomonidan tadbirkorlik subʼektlariga davlat xizmatlarini koʻrsatishga oid qonun hujjatlari ijrosi yuzasidan tuman qurilish boʻlimi, Qoraqalpogʻiston Respublikasi yer tuzish va koʻchmas mulk kadastri davlat korxonasi tuman filialida oʻtkazilgan tekshirishlar jarayonida qurilish boʻlimining arxitektori  tomonidan bir necha nafar tadbirkorlik subʼektlariga savdo obʼektini ixtisoslashtirish va rekonstruktsiya qilish uchun ruxsat beriluvchi hujjatini oʻz vaqtida Davlat xizmatlari markazi orqali taqdim qilmagan. Qoraqalpogʻiston Respublikasi yer tuzish va koʻchmas mulk kadastri davlat korxonasi tuman filiali  ayrim xodimlari ham yuqoridagi kabi qonun buzilish holatlariga yoʻl qoʻygan.

Tumandagi faoliyat yuritayotgan 3 ta tijorat banklariga jami 45 milliard 70 million soʻm miqdorida “Har bir oila tadbirkor” Davlat dasturi boʻyicha imtiyozli kredit ajratilishi belgilangan boʻlishiga qaramasdan, amalda  30 milliard 594 million soʻm ajratilgan, xolos. Kichik biznes va xususiy  tadbirkorlik qoʻllab-quvvatlanib, qulay ishbilarmonlik muhiti yaratilmaganligi tufayli 449 ta tadbirkorlik subʼektlari oʻz faoliyatini toʻxtatgan, 69 tasi tugatgan. Shuningdek, pandemiya sharoitida aholini xavfsiz oziq-ovqat mahsulotlari bilan taʼminlash uchun kartoshka, piyozning yetarlicha zaxirasi yaratilmagan, kartoshka, piyoz, sabzi, guruch mahsulotlarining hisobotiga qoʻshib yozilgan.

“Yoshlar - kelajagimiz” Davlat dasturi asosida tumanda 2020-yilda jami 15 ta loyiha maʼqullanib, loyihalarga 3 milliard 800 million soʻm mablagʻ sarflanishi va 57 ta doimiy ish oʻrin yaratilishi belgilangan boʻlsa-da, 4 nafar tadbirkor 7 ishchi oʻrni yaratgan, xolos.

Shuningdek, xorijiy investitsiya mablagʻlari hisobiga 65 ta yirik loyihalarda 373 ta yangi ish oʻrin yaratilishi belgilangan boʻlsa-da, amalda 57 ta yangi ish oʻrni yaratilgan.

Maʼruzachi oʻz soʻzida aholini ijtimoiy himoya qilish va  boshqa sohalardagi kamchiliklarga, tumanimizda huquqbuzarliklar va  jinoyatlarning sodir etilishining oldini olishda yoʻl qoʻyilgan kamchiliklarga ham batafsil toʻxtaldi, kelgusida buningdek holatlarga barham berish zarurligini taʼkidladi.

Tuman hokimi Sultonboy Yoʻldashev, tuman Ichki ishlar boʻlimi boshligʻi Ulugʻbek Xudoyberganov, birinchi oʻrinbosari A.Masharipov, tuman hokimi oʻrinbosarlari Maʼmur Temirboyev, Jasur Norimov, Rashid Salayev, Alisher Yoʻldoshev, tuman Aholi bandligiga koʻmaklashish markazi direktori Farhod Sobirov va oʻzini-oʻzi boshqarish organlari raislari kun tartibidagi masala yuzasidan fikr-mulohazalarini bildirdilar.

Yigʻilishda Qoraqalpogʻiston Respublikasi Prokuraturasi boʻlim boshligʻi Shuhrat Botirov qatnashdi va tumanda qonun ustuvorligini taʼminlash, fuqarolarning qonuniy huquq va erkinliklarini, manfaatlarini himoya qilish, jinoyat va huquqbuzarliklarning oldini olish borasida amalga oshirilishi lozim boʻlgan chora-tadbirlar xususida maʼruza qildi.

O.RAJABOVA.