ONA YuRT HIMOYaSIGA MUNOSIBLAR TANLANADI

Ona Vatan taraqqiyoti, himoyasi hamda kelajagi uchun eng avvalo bugungi yoshlar masʼuldir. Shuning uchun ham har yili harbiy xizmatga chaqiruv boʻyicha olib boriladigan tadbirlarga alohida eʼtibor qaratilib, tanlov Kengashi tomonidan jismonan va maʼnan yetuk, sogʻlom yigitlar harbiy xizmatga saralab olinadi.

Ayni paytda tumanimizda Oʻzbekiston Respublikasining “Umumiy harbiy majburiyat va harbiy xizmat toʻgʻrisida”gi Qonuni hamda Vazirlar Mahkamasining 2019-yil 9-aprel sanasida qabul qilingan “Chaqiriluvchilarni tanlab olish toʻgʻrisida”gi Qarori asosida tanlov Kengashi tomonidan tuman Mudofaa ishlari boʻlimi bilan hamkorlikda 2021-yilgi harbiy xizmat chaqiruviga tayyorgarlik koʻrish maqsadida tanlov tadbirlari olib borilmoqda.

Muddatli harbiy xizmatga tanlov tadbirlari 2020-yilning 10-avgust sanasidan 2021-yilning 10-fevral sanasigacha davom etadi. Tanlov tadbirlarida qatnashish istagini bildirgan yoshlar juda koʻp. Lekin Vatan himoyasiga munosib yigitlarni saralab olishda, avvalo ularning jismoniy yetukligiga, maʼnaviy jihatdan saviyasi yuksakligiga  alohida eʼtibor qaratiladi. Bundan tashqari, tanlov tadbirlarida 18 yoshdan 27 yoshgacha boʻlgan 1994-2003-yillarda tugʻilgan, avval harbiy xizmatda boʻlmagan yigitlar ishtirok etadilar.

Tanlovda, yuqorida aytganimday, avvalo jismoniy tayyorgarlik darajasi baholanadi. Ushbu yoʻna-lishda yuqori natijaga erishgan yigitlar bilan yakka tartibda suhbat oʻtkazilib, ularning maʼnaviy-maʼrifiy bilim saviyasi sinovdan oʻtkaziladi. Unga koʻra, yoshlarning dunyoqarashi, fikriy rivojlanish jarayoni, oilaviy ahvoli oʻrganiladi hamda tarix fani, ayniqsa, Amir Temur tuzuklari boʻyicha savol-javoblar orqali intellektual salohiyati qay darajada ekanligiga aniqlik kiritiladi. Chunki yakka tartibdagi suhbat chaqiriluvchi yoshlarning harbiy xizmatga chaqiruvga munosib yoki munosib emasligini belgilashda muhim ahamiyat kasb etadi. Yakka tartibdagi suhbatdan oʻtgan yoshlargina Butlash komissiyasidan oʻtish huquqiga ega boʻladilar va mart-aprel oylarida tibbiy koʻrikdan oʻtkazilib, Butlash komissiyasining tavsiyasiga koʻra, Respublika rahbarlar Kengashi qarori bilan muddatli harbiy xizmat komandalari hamda qoʻshin turlarida harbiy xizmat qilish uchun tayinlanadilar.

Oʻzbekiston Respublikasi Qurolli Kuchlari tarkibini jismonan baquvvat va maʼnan yetuk askarlar bilan butlash orqali Vatanimizning ravnaqi va kelajagi yoʻlida xizmat qilishga daʼvat etish va bu boradagi burchimizni aʼlo darajada bajarish, ona yurt himoyasiga munosib, vatanparvar yoshlarni tarbiyalash eng masʼuliyatli va sharafli burchimizdir.

Toir BOLTAYeV,

tuman Mudofaa ishlari boʻlimi Chaqiruv boʻlinmasi boshligʻi.