UZUMChILIKNI RIVOJLANTIRIShGA BAGʻIShLANGAN KOʻRGAZMALI SEMINAR-KENGASh OʻTKAZILDI

Joriy yilning 4-fevral sanasida Oʻrta qalʼa ovuli hududidagi “Erkin Rasulov asalarichi” fermer xoʻjaligida yangi intensiv bogʻlar yaratish, uzumchilikni rivojlantirish hamda xalqimizni toʻrt faslda ham sarhil meva mahsulotlari bilan taʼminlash borasidagi ishlarni yanada takomillashtirishga qaratilgan koʻrgazmali seminar-kengash oʻtkazildi.

Koʻrgazmali seminar-kengashda tuman hokimi Sultonboy Yoʻldashev, Qoraqalpogʻiston Respublikasi Fermer, dehqon xoʻjaliklari va tomorqa yer egalari Kengashi raisi Quanishbay Nurimbetov, tuman Fermer, dehqon xoʻjaliklari va tomorqa yer egalari Kengashi raisi Ilhom Polvonov hamda tumanimizdagi bogʻdorchilik va uzumchilikka ixtisoslashgan fermer va dehqon xoʻjaliklari masʼullari, soha mutaxassislari ishtirok etishib, tumanimizdagi mavjud mevazor bogʻlar, yangidan barpo etiladigan intensiv bogʻlar va serhosil navli uzumzorlar xususida toʻxtalib, ayni paytda sohibkor-bogʻbonlar oldida turgan mavsum yumushlari, bogʻlarda bahorga tayyorgarlik boʻyicha amalga oshiriladigan dolzarb vazifalar boʻyicha oʻzaro tajriba almashdilar. Nafaqat qishloq xoʻjaligi korxonalari, balki tomorqa xoʻjaliklarida ham uzumchilikni rivojlantirish, tokzorlarda mavsum yumushlarini sifatli  oʻtkazish, ayni paytda koʻmib qoʻyilgan uzum toklarini bahor mavsumida ochish, zangilarga, sim bagʻazlarga sifatli koʻtarish va bogʻlash, oziqlantirish ishlarini samarali tashkil etishga qaratilgan ishlar yuzasidan tushunchalar berildi.

Tumanimizda qishloq xoʻjaligining barcha sohalarini, shu jumladan uzumchilikni jadal rivojlantirish, tuproq unumdorligini, uzum toklarining hosildorligini oshirish, yetishtirilgan mahsulot sifatini yaxshilash hamda ularni kuz-qish oylarida zahirada saqlash, halqimizning meva va uzum mahsulotlariga boʻlgan talabini toʻla qondirish maqsadida manzilli ishlar olib borilmoqda.

Ayni paytda tumanimizdagi qishloq xoʻjalik korxonalarida jami 693,6 gektar bogʻ va 290,1 gektar uzumzorlar mavjud boʻlib, ushbu bogʻlarda oʻtgan yilda jami 6687,3 tonna meva, 2949 tonna uzum hosili yetishtarildi va mevalar yaxshilab saralanib, sovutkich va muzlatkichlarga joylashtirildi hamda arzonlashtirilgan narxlarda savdo yarmarkalari orqali xalqimiz dasturxoniga tortiq qilinmoqda.

Bugungi kunda tumanimizda bogʻdorchilikka ixtisoslashgan 35 ta qishloq xoʻjaligi korxonalari va 4 ta uzumchilikka ixtisoslashgan MChJlar mavjud boʻlib. pakana va yarim pakana (intensiv) yangi mevali bogʻlar 154 gektarga yetkazildi.

Tumanimizda meva eksporti hajmini koʻpaytirish hamda yurtimiz dasturxoniga sifatli va arzon meva mahsulotlarini yetkazib berish maqsadida 2021-yilda jaxon standartlariga mos keladigan, Turkiya texnologiyalari asosida, intensiv usulda yana 500 gektar maydonda yangi bogʻlar barpo etish rejalashtirilgan boʻlib, bugungi kunda qishloq xoʻjaligi korxonalari tomonidan jami 413 ming dona koʻchat yetkazib berish boʻyicha shartnomalar tuzilgan.

Bundan tashqari, 2021-yilda tumanimizda uzumchilikni rivojlantirish maqsadida 1000 gektar maydonda, yaʼni 339 ta qishloq xoʻjaligi korxonalariga qarashli yer maydonlarida tokzorlar barpo etish va yangi, serhosil navli koʻchatlar yetkazib berish boʻyicha shartnomalar tuzish ishlari boshlab yuborildi hamda tokzorlar barpo qilinadigan maydonlarda shoʻr yuvish, shudgorlash, yer tekislash ishlari olib borilmoqda.

Koʻrgazmali seminarda “Mangʻit Omad savdo” masʼuliyati cheklangan jamiyati rahbari Azimboy Jumamurodov oʻzi rahbarlik qilayotgan agrofirmada amalga oshirilayotgan ishlar bilan ishtirokchilarni batafsil tanishtirib, yangi tok koʻchatlarini oʻtqazish hamda ilk oziqlantirish boʻyicha oʻz tajribalarini amalda koʻrsatib berdi. Lazerli uskuna yordamida tekislangan yerda tok koʻchatlarini joylashtirish, yil davomida yosh nihollarni parvarishlash, agrotexnik tadbirlarni toʻgʻri tashkil etish, shuningdek, uzum mevalarini turli zararkunanda hashoratlardan saqlash boʻyicha himoya tizimlarini yaratish haqida ishtirokchilarga batafsil maʼlumotlar berdi.

Koʻrgazmali seminar-kengashda tumanimiz bogʻdorchilik korxonalari rahbarlari hamda bogʻbon va ishchilari tomonidan tushgan savollarga tajribali bogʻbon va soha masʼullari batafsil javob berdilar.

Robiya YOʻLDOShEVA.