HAR QATRA SUV HISOBDA

Tumanimizda qishloq xoʻjaligi ekinlarini sugʻorishda suv resurslaridan tejamli va oqilona foydalanish borasida tuman Irrigatsiya boʻlimi tomonidan tizimli ishlar olib borilmoqda.

2021-yil dehqonchilik mavsumida shoʻr yuvish davri uchun ajratilgan suv limiti  suv isteʼmolchilariga oʻn kunliklar boʻyicha taqsimlanib, suv isteʼmolchilari uyushmasi bilan suvdan foydalanish boʻyicha shartnomalar toʻliq tuzildi. Irrigatsiya boʻlimi va suv isteʼmolchilari uyushmasi oʻrtasida suvdan foydalanish boʻyicha 328 ta doimiy hisob-kitob jurnallari tashkil etildi. Unga koʻra, 2021-yilgi shoʻr yuvish davri uchun tuman boʻyicha 157,5 mln. kubometr suv limiti   belgilangan boʻlib,  amalda 121,3 mln. kubometr suv isteʼmolchilarga yetkazib berildi va 24142 gektar maydonda sugʻorish ishlari bajarilib, suvdan foydalanish koeffitsiyenti 0,91 foizni tashkil qilmoqda.

Sugʻorish ishlarini sifatli tashkil etish hamda suvni tejash maqsadida tumanda sugʻorish shtabi tashkil qilindi. Fermer xoʻjaliklariga suv xoʻjaligi tashkilotlaridan 310 nafar xodim, fermer xoʻjaliklaridan esa 3050 nafar ishchi va mutaxassislar biriktirildi.

Shu kungacha tuman boʻyicha 15904 gektar yer maydoni shoʻr yuvishga toʻliq tayyorlanib, 12821 gektar maydonda bir marta shoʻr yuvish, 2902 gektar maydonda 2-marta shoʻr yuvish ishlari olib borildi.

Dehqonchilik mavsumining muvaffaqiyatli oʻtishi irrigatsiya tarmoqlarining sozligiga, shu bilan birga sugʻorish ishlarining toʻgʻri tashkil etilishiga bogʻliq. Shu bois, tuman Irrigatsiya boʻlimi tomonidan 70 km. uzunlikda xoʻjaliklararo kanallarni tozalash, gidrotexnik inshootlar, suv oʻlchash postlarini, ichki sugʻorish tarmoqlarini, fermerlarning suv olish quloqlarini jihozlash ishlari rejalashtirildi.

Xoʻjaliklararo kanallarni tozalash ishlariga 3 ta ekskavator, 1 ta buldozer, ichki xoʻjalik sugʻorish tarmoqlarini tozalash ishlariga 3 ta ekskavator jalb qilindi.

Tumanimizda 2021-yilda suvdan foydalanish samaradorligini oshirish maqsadida 3600 gektar paxta maydonida, 50 gektar bogʻ, 20 gektar tok, 60 gektar sabzavot va poliz yetishtiriladigan maydonlarda tomchilatib sugʻorish, 30  gektar gʻalla maydonida yomgʻirlatib sugʻorish, 40 gektar paxta maydonida pulsar sugʻorish tizimini joriy qilish belgilangan. Shu kungacha tuman boʻyicha 156 ta fermer xoʻjaliklari va bitta klaster korxonasi bilan pudrat tashkilotlari oʻrtasida 2818,9 gektar maydonda suv tejovchi texnologiyalarni qurish boʻyicha shartnomalar tuzildi.

44 ta fermer xoʻjaligiga 2784,4  gektar uchun 19295 mln. soʻm, 1 ta klaster korxonasiga 34 gektar uchun 862 mln. soʻm, jami 20157 mln. soʻm kredit mablagʻlari ajratildi. Hozirgi kunda suv tejovchi texnologiyalar joriy qilinadigan maydonlarda hovuz qazish ishlari olib borilmoqda.

J.RAJABOV,

tuman Irrigatsiya boʻlimi boshligʻi.