GʻOʻZA QATOR ORALARI KULTIVATsIYa QILINMOQDA

Paxta – tumanimiz qishloq xoʻjaligi asosiy ekinlaridandir.

Joriy yilda 2021-yil hosili uchun 350 ta fermer xoʻjaliklari ekin dalalarining 15030 gektariga paxta ekish rejalashtirildi va MChJ shaklidagi “Amudaryotex” XJ paxtachilik klasteri bilan fermer xoʻjaliklar hamda qishloq xoʻjaligi korxonalari oʻrtasida paxta yetishtirib berish boʻyicha kontraktatsiya shartnomalari tuzildi. Jami paxta maydonlarining 3762 gektariga “S-47-27”, 9517 gektariga “Sulton”, 251 gektariga “Mangʻit-1” 1500 gektariga “Yangi” navini ekish rejalashtirilgan.

Chigit ekish mavsumini qisqa muddatlarda va sifatli oʻtkazish uchun 65 ta ekish otryadlari tuzilib, ushbu  otryadlarga 145 dona haydov, 385 dona chopiq, 220 dona transport traktorlari, 213 komplekt boronalar, 293 ta mola, 60 ta chizel, 211 ta chigit ekish seyalkalar, 50 ta oddiy, 33 ta lazerli yer tekislagichlar, 350 ta tirkamalar, 17 ta yoqilgʻi tashish agregatlari va har bir otyadga bir donadan xizmat koʻrsatuvchi koʻchma taʼmirlash ustaxonalari biriktirildi.

Tumanda 4-apreldan boshlab puxta tayyorgarliklar asosida chigit ekish ishlariga kirishildi.

Ayni kunlarda unib chiqqan gʻoʻza niholariga dastlabki ishlov berish yaʼni kultivatsiya qilish ishlari boshlanib ketdi. Ushbu muhim agrotexnik tadbirni sifatli oʻtkazish maqsadida 90 ta otyadlar tuzildi va ularga 365 ta kultivatorlar biriktirildi.

Har bir kultivator agregatidan unumli foydalangan holda tadbirni 10-12 kunda sifatli tamomlash choralari koʻrildi. Xususan, mexanizatorlarning uzluksiz ishlashiga erishish uchun dalalar boshlarida koʻchmali mexanizatorlar uylari tashkil etilib, ularda barcha zarur sharoitlar yaratildi. Shuningdek, 365 nafar mexanizatorlarning ish haqlari har besh kunda hisob-kitob qilinib, ragʻbatlantirilmoqda.

Oq oltin ovulidagi “Polvonov Raxmon” fermer xoʻjaligiga Qahramon Polvonov rahbarlik qiladi.

Xoʻjalik aʼzolari qishloq xoʻjalik ekinlaridan moʻl hosil yetishtirishda oʻziga xos tajriba toʻplashgan. Ular gʻoʻza chigitini oʻz muddatlarida ekish, unib chiqqan nihollarga dastlabki ishlov berish, gʻoʻza parvarishi davridagi har bir agrotexnik tadbirning oʻz vaqtida, sifatli oʻtkazilishi kuzgi moʻl hosilga puxta zamin yaratishini yaxshi bilishadi.

Usta dehqonlar joriy yilgi chigit ekish mavsumini 6-apreldan 12-aprelgacha sifatli oʻtkazishdi, 60 gektar yerga paxta ekishdi.

Hozirgi kunda unib chiqqan gʻoʻza nihollarini birinchi kultivatsiyalash ishlarini ham boshlab yuborishdi.

Xoʻjalikda paxtadan tashqari 10 gektar bugʻdoy maydoni ham mavjud. Ushbu bugʻdoyzorlar qondirib sugʻorilib, oziqlantirilgani bois bir tekis rivojlanmoqda.

Bahorgi harakat – kuzgi barakat, deydi xalqimiz. Ha, bahorning har daqiqasidan unumli foydalanib, erta ekkan, ekiniga gʻamxoʻrlik qilgan dehqon yutqazmaydi. Yaratilajak hosil xalqimiz turmushi obod, dasturxoni toʻkin boʻlishiga xizmat qiladi, albatta.

O.RAJABOVA.