TUMANIMIZ GʻALLAKORLARI YuKSAK QIRMIZI DON XIRMONINI BUNYoD ETDILAR

Tumanda oʻtgan yil kuz mavsumida 2021-yil hosili uchun 324 ta fermer xoʻjaliklari hamda qishloq xoʻjaligi korxonalari tomonidan 3800 gektar maydonga gʻalla ekilib, davlatga 9500 tonna qirmizi don yetkazib berish boʻyicha shartnomalar tuzilgan edi. Shundan 25 ta fermer xoʻjaliklarida 316,8 gektar maydonda urugʻlik gʻalla ekilib, 950 tonna urugʻlik don yetishtirish rejalashtirildi va barcha gʻalla ekilgan maydonlarda kuzgi-qishki va bahorgi agrotexnik tadbirlar oʻz vaqtida amalga oshirildi.

Gʻalla oʻrim-yigʻim ishlarini uyushqoqlik  bilan tashkil etish boʻyicha tuman shtabi tashkil etilib, chora-tadbirlar dasturi ishlab chiqildi. Unga koʻra, 324 ta fermer  xoʻjaliklarida 18 ta oʻrim-yigʻim otryadlari tuzildi. Gʻalla isrofgarchiligining oldini olish maqsadida oʻrim-yigʻim mavsumida 18 ta otryadga jami 109 nafar masʼullar, shundan  54 nafar IIB xodimlari biriktirildi.

Mavsum jarayonida 18 ta kombayn yuksak unum bilan ishlatildi. Shuningdek, gʻallani zahira omboriga talofatsiz yetkazib berishda 54 ta  yuk  avtomobillari, 36 ta  transport traktorlari, 18 ta koʻchma taʼmirlash ustaxonasi, 18 ta yoqilgʻi  tashish agregatlari samarali faoliyat olib bordi. Natijada gʻallakor dehqonlarimiz peshona teri evaziga yetishtirilgan yuksak qirmizi don xirmoni bunyod etildi. Deyarli barcha gʻalla ekilgan maydonlardan yuqori navli gʻalla yigʻishtirib olindi. Tumanimiz gʻallakorlari zimmalaridagi shartnomaviy rejalarini sharaf bilan ado etdilar.

Ayni kunlarda esa gʻalladan boʻshagan maydonlarga rejadagi takroriy ekinlarni ekish ishlari ham nihoyasiga yetkazilib, vaqtincha ishsiz yoshlarga, ijtimoiy himoyaga muhtoj aholiga ekin ekib, foydalanishlari uchun hosildan boʻshagan gʻalla maydonlaridan yer ajratib berilmoqda.

F.Saʼdullayev, tuman hokimining qishloq va

suv xoʻjaligi masalalari boʻyicha oʻrinbosari.