Gʻoʻza dalalarida hosil toʻplash oyligi davom etmoqda

Joriy yilgi mavsum ob-havo ancha oʻzgaruvchanligi va oqar suv tanqisligi bilan kechayotgani tufayli paxtakor dehqonlar ushbu murakkab sharoitda ham moʻl va sifatli hosil yetishtirish uchun mavjud vaziyatdan kelib chiqib ish yuritmoqdalar. Paxtachilikka, ayniqsa, paxta urugʻchiligiga ixtisoslashgan fermer xoʻjaliklarida agrotexnika tadbirlarini oʻz vaqtida bajarish, mavjud resurslar, mineral va mahalliy oʻgʻitlar hamda suvdan unumli foydalanish evaziga dalalarda moʻl hosil toʻplashga erishilmoqda.

Tumanimizning Namuna mahallasi hududidagi «Sobir Eshchan» fermer xoʻjaligida asosan urugʻlik paxta yetishtiriladi. Xoʻjalikning umumiy yer maydoni 206 gektardan iborat boʻlib, shundan 161 gektari ekishlik maydoni hisoblanadi.

Joriy yilda xoʻjalik dehqonlari 80 gektar yerga gʻoʻzaning serhosil «Sulton» navini ekishdi. Moʻljal – gektaridan 40 tsentnerdan, jami 320 tonna hosil olish. Shundan 128 tonnasi urugʻlik chigit uchun saralab terib olinishi koʻzda tutilgan.

Deyarli har yili paxta va boshqa qishloq xoʻjalik ekinlaridan moʻl va sifatli hosil yetishtirib kelayotgan fermer xoʻjaligi dehqonlari bu yilgi ekish-tikish mavsumi yumushlarini ham agrotexnika qoidalariga muvofiq ravishda tashkil etdilar.

Avvalo, xoʻjalik dalalarida chigit toʻliq unib chiqishiga eʼtibor qaratildi. 80 gektar yer 80 nafar ijarachiga teng taqsimlab berildi. Chigit unib chiqqandan soʻng, dalalarning tuproq sharoiti va gʻoʻza navining xususiyatlariga muvofiq ravishda yaganalash ishlari olib borildi.

Yaʼni, qatorlar orasi 60 sm.da ekilgani uchun fermer xoʻjaligining tuproq unumdorligi yuqori boʻlgan dalalarida bir metrda 5-6 tup, oʻrtacha va undan past unumdor yerlarda 6-7 va 7-8 tup gʻoʻza niholi  olishga erishildi.

Bundan tashqari, gʻoʻzani oziqlantirishda oʻgʻitni tuproq qatlamiga chuqurroq berishga, qolaversa, nihollarning yaxshi oʻsib-rivojlanishini taʼminlash maqsadida nihollarni qoʻshimcha ravishda oziqlantirishga alohida eʼtibor qaratilib, gʻoʻza nihollarining bargi va poyasidan oziqlanishi uchun suspenziya sepildi.

Zararkunanda hashoratlarga qarshi olib borilgan kurash choralari, gʻoʻza qator oralariga ishlov berish, chilpish kabi agrotexnik tadbirlar oʻz vaqtida amalga oshirilgani bois, ayni paytda fermer xoʻjaligi dalalarida moʻl hosil toʻplandi. Har bir tup gʻoʻzada kamida 20-30 ta boʻliq koʻsaklar, yana qoʻshimcha hosil nishonalari borligining  oʻzi xoʻjalik dehqonlarining fidoyilik  bilan mehnat qilishayotganidan dalolatdir.

Albatta, paxtachilikda koʻzlangan natijalarga erishishda texnika – dehqonning  qoʻl-qanotidir. Fermer  xoʻjaligi raisi Xudoybergan Sobirovning ishning koʻzini bilganligi, qishloq  xoʻjaligi sohasi yangiliklaridan doimiy xabardor boʻlib turishi bois, xoʻjalikning moddiy-texnik bazasi mustahkam. 2 ta chopiq traktorlari, 1 dona yer haydovchi traktor, kombayn va ekskavator dehqonlarning ogʻirini yengil, mushkulini oson qilishga hamisha shay. Shuning uchun ham fermer xoʻjaligida gʻalla oʻrim-yigʻimi va ipak qurti boqish mavsumlarida umuman muammo boʻlmaydi.

Ayni kunlarda fermer xoʻjaligi dalalarida gʻoʻza parvarishi bilan bogʻliq, soʻnggi agrotexnik tadbirlar, yaʼni gʻoʻzaga sharbat suvi berish, qonib suv ichgan gʻoʻza maydonlarini begona oʻtlardan tozalab, yigʻim-terim mavsumiga tayyorlash kabi ishlar davom ettirilmoqda.

R.YOʻLDOShEVA, M.ShOMURODOV surat-lahvasi.