Prezident: “Mamlakatimizda keyingi yillarda zamonaviy uy-joylar qurish boʻyicha yangi davr boshlandi”

Yurtboshimiz Shavkat Mirziyoyevning “Yangi Oʻzbekiston” gazetasiga bergan intervyularida xalq farovonligi aholining turmush sharoitlarining yaxshilanishiga bogʻliq ekanligini taʼkidlab, bu borada zamonaviy, arzon turar joylar qurilishini yanada jadallashtirish yusasidan bildirgan fikr-mulohazalari meni juda ruhlantirdi. Prezident oʻz soʻzlarida keyingi yillarda mamlakatimizda uy-joylar qurilishi 4-5 barobar koʻpayganini, joriy yining oʻzida 54 ming oila yangi uy-joy bilan taʼminlash boʻyicha keng koʻlamli qurilish ishlari amalga oshirilayotganini qayd etdi.

Darhaqiqat, soʻnggi toʻrt yilda xalq roziligi, insonlarning turmush tarzini tubdan yaxshilash borasidagi muhim islohotlardan biri zamonaviy, arzon uy-joylarning qurilishi jadallashtirilib, sifat jihatdan ham yangi bosqichga koʻtarildi. Bu borada olib borilayotgan keng koʻlamli islohotlar samarasi oʻlaroq, aholi keng, shinam, barcha qulaylik va shart-sharoitlar yaratilgan, hamyonbop uy-joylar bilan taʼminlanib, ularda tinch va farovon hayot kechirmoqdalar. Hashamatli, zamonaviy, yangi qiyofadagi koʻp qavatli uy-joylar oldidan oʻtar ekansiz, bolalar maydonchalarida oʻynayotgan bolajonlarning quvnoq kulgulari, shoʻxliklari ovozini eshitib, yana bir bor shukronalik tuygʻusini his qilasiz.

Shuningdek, davlatimiz rahbari: “Kelgusida uy-joy fondini shunday darajaga olib chiqishimiz kerakki, aholining barcha qatlamlari uy-joy sotib olish va bu borada tanlash imkoniga ega boʻlishi lozim”, deya taʼkidlab, bu borada mavjud muammo va kamchiliklarni bartaraf qilish ustuvor vazifa ekanligini qayd etgan.

Ilhom Polvonov, Xalq deputatlari Amudaryo tuman kengashi deputati.