OʻzLiDePdan Prezidentlikka nomzod Shavkat Mirziyoyevning Qoraqalpogʻiston Respublikasi boʻyicha ishonchli vakili saylovchilar bilan uchrashdi

Tadbirkorlar va ishbilarmonlar harakati Oʻzbekiston Liberal Demokratik partiyasidan prezidentlikka koʻrsatilgan nomzod Shavkat Mirziyoyevning Qoraqalpogʻiston Respublikasi boʻyicha ishonchli vakili, Qoraqalpogʻiston Respublikasi Joʻqorgʻi Kengesi deputati, Oliy Majlis Senati aʼzosi Abatbay Daniyarov 7-oktyabr kuni Amudaryo tumani saylovchilari bilan uchrashdi. Tuman Madaniyat markazida boʻlib oʻtgan Prezidentlikka nomzodning ishonchli vakili bilan saylovchilar uchrashuviga bagʻishlangan tadbirni Oʻzbekiston Liberal Demokratik partiyasi tuman Kengashi apparat rahbari Madamin Kazakov ochdi va olib bordi.

Saylovchilar bilan uchrashuv davomida Abatbay Daniyarov prezidentlikka nomzodning saylovoldi dasturi bilan uchrashuv tadbiri ishtirokchilarini batafsil tanishtirdi. Prezidentlikka nomzodning saylovoldi dasturida ilgari surilgan tashabbuslar, puxta oʻylangan rejalar, yangi gʻoya va fikrlarga, xususan, Qoraqalpogʻiston Respublikasini ijtimoiy-iqtisodiy rivojlantirish, ayniqsa, qishloqlar infratuzilmasini zamon talablari darajasiga koʻtarish, tibbiyot, taʼlim, energetika, madaniy-maʼrifiy, qishloq xoʻjaligi sohalari boʻyicha belgilangan ustuvor vazifalarga alohida toʻxtalib oʻtdi.

Prezidentlikka nomzodning saylovoldi dasturida belgilanganidek, Qoraqalpogʻiston Respublikasi qishloq xoʻjaligini ilmiy asosda intensiv rivojlantirish orqali dehqon va fermerlar daromadlari kamida 2 barobar oshirilib, uning yillik oʻsish surʼatlari esa kamida 5 foizga yetkazlishi, qishloq xoʻjaligida davlat aralashuviga barham berilib, erkin bozor munosabatlari joriy qilinishi, dehqonlar uchun subsidiyalar ajratilishi, sohadagi klasterlar va fermerlar faoliyatini moliyalashtirish va sugʻurtalashning mutlaqo yangi mexanizmlari joriy qilinishi koʻzda tutilayotgani haqida taʼkidlab oʻtildi.

Bundan tashqari, nomzodning  saylovoldi dasturida har bir yoʻnalishda amalga oshirilishi koʻzda tutilgan strategik maqsad va vazifalar aniq ifodalab berilgan. Xususan, 2030  yilga borib aholi jon boshiga  toʻgʻri keladigan daromad 4 ming dollardan oshirilishi va mamlakatimizni daromadi oʻrtachadan yuqori boʻlgan davlatlar qatoriga kiritish, sanoat mahsulotlari hajmi va unumdorligini oshirish uchun sharoit yaratilishi, raqamli iqtisodiyot asosiy “drayver” sohaga aylantirilib, uning hajmini kamida 2 yarim barobar oshirishga qaratilgan ishlarni olib borish kabi koʻplab strategik vazifalar xususida ishonchli vakil tomonidan saylovchilarga toʻliq maʼlumotlar berildi.

Uchrashuv davomida soʻzga chiqqan Yangiobod mahalla fuqarolar yigʻini raisi Zebogul Rajabova, mehnat faxriysi Tursunboy Abdullayev, 16-sonli ixtisoslashtirilgan davlat umumtaʼlim maktabining ijodiy-madaniy masalalar boʻyicha targʻibotchisi Yulduz Tursunboyevalar oʻzlari istiqomat qilayotgan mahallalar, mehnat qilayotgan sohalarini,  oilalar va yoshlarni qoʻllab-quvvatlash borasida amalga oshirilayotgan qamrovi keng ishlar misolida soʻnggi yillarda hayotimizdan mustahkam oʻrin olgan yangiliklar, ijobiy oʻzgarishlar haqida  gapirdilar hamda barchani  24-oktyabr – Oʻzbekiston Respublikasi Prezidenti saylovi kunida Oʻzbekiston Liberal-Demokratik partiyasidan koʻrsatilgan nomzod Shavkat Mirziyoyevni qoʻllab-quvvatlashga chaqirdilar.

Robiya YOʻLDOShEVA.