Yaqinim, hamfikrim
Har kim bolalikdan orzular olamida yashaydi. Men orzuimga binoan hayotimni adabiyot bilan, bolalar dunyosi bilan bogʻlaganman. Oʻquvchilik chogʻimizda oʻtkazilgan tadbirlar, dalada shijoat bilan mehnat qilayotgan paxtakorlar yutugʻi haqidagi ilk maqolalarim yuragimga quvonch bagʻishlagan. Vatan, tinchlik, ona, ota haqidagi sheʼrlarim "Amudaryo haqiqati” gazetasida dunyo yuzini koʻrsa, oilamiz, hatto maktabimiz, paxta dalasida mehnat qilayotgan ovuldoshlarim bilan birgalikda sevinganmiz, quvonganmiz. Bir soʻz bilan aytganda, gazeta bolaligimdan yaqin doʻstimga aylangan, qalamimni charxlagan. Ijodga boʻlgan ishtiyoqimni oshirgan.
Yillar oʻtib talabalikdan soʻng oilaviy tashvishlar, farzandlar tarbiyasi sabab bir necha yillar ijod qilmaganimda, gazeta xodimlari meni izlashganida, soʻrashganida bolalarcha quvonganman. Odamlar, tanishlarim agar gazetada sheʼrimni oʻqishsa, oʻsha sheʼring unaqa ekan, bu mavzuda ekan, desalar, odamlar sheʼrimni emas, gazeta oʻqiyotganligidan quvonganman.
Bozor iqtisodiyotiga oʻtishdek qiyin bir davrda men aytamanki, gazeta xodimlari sidqidildan mehnat qilishdi, tuman gazetasini tuman taraqqiyotining koʻzgusi darajasiga koʻtardi. Shaxsan men faoliyat koʻrsatayotgan 11-sonli maktab jamoasi gazetaning har bir sonini intiqlik bilan kutadi. Oʻqituvchilarimiz oʻz ijodlari bilan gazeta sahifalarida ishtirok etib kelishmoqda.
Men oddiygina adabiyot fani oʻqituvchisi boʻlishimga qaramasdan gazeta hayotimning bir boʻlagiga aylangan. Bolalikdagi orzularim, ustozlarimga ehtiromlarim, ota-onamga aytilmagan dil rozlarim, yutuqlarim, farzandlarim dunyoga kelgandagi quvonchlarim, hatto yoʻqotishlarim, yurak dardlarim jo boʻlgan sheʼriy satrlarim avvalo "Amudaryo haqiqati”da, keyinchalik "Taraqqiyot koʻzgusi”da dunyo yuzini koʻrgan. Gazeta xodimlarining ijodiy mehnatlarimga bergan xolisona bahosi, toʻgʻri koʻrsatmalari yanada koʻproq ijod qilishimga, toʻgʻri yoʻl topishimga katta yordam bermoqda. Shuning uchun ham u mening yaqinim, hamfikrim. Tumanimiz hayotining koʻzgusi boʻlgan gazetamizning 80-yillik yubileyi qutlugʻ boʻlsin. Nuroniy siymoga, donishmand yoshga yetgan "Taraqqiyot koʻzgusi”ning umri bardavom, saviyasi yuqori, qadri baland boʻlsin! "Taraqqiyot koʻzgusi”ga va gazeta xodimlariga chuqur hurmat va ehtirom ila
Guloyim BEGJANOVA,
11-sonli maktab oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
