OʻZBEKISTON XALQ DEMOKRATIK PARTIYaSIDAN PREZIDENTLIKKA NOMZODI KOʻRSATILGAN MAQSUDA VORISOVANING IShONChLI VAKILI SAYLOVChILAR BILAN UChRAShDI

Mamlakatimizda muhim siyosiy jarayon – Oʻzbekiston Respublikasi Prezidenti saylovi oʻtkaziladigan sana tobora yaqinlashmoqda. Barcha partiyalar singari Oʻzbekiston Xalq demokratik partiyasi ham nomzodning saylovoldi targʻibot-tashviqot tadbirlarini tashkil etishga alohida eʼtibor qaratmoqda. Shunday tadbirlar Amudaryo tumanida ham oʻtkazildi.

13-oktyabr kuni Prezidentlikka nomzod Maqsuda Vorisovaning Qoraqalpogʻiston Respublikasi boʻyicha ishonchli vakili Xalillo Yeshimbetov saylovchilar bilan uchrashdi.

Tuman madaniyat boʻlimida boʻlib oʻtgan yigʻilishda Oʻzbekiston Xalq demokratik partiyasi Qoraqalpogʻiston va tuman Kengashlari masʼullari, mahalliy kengash deputatlari, partiya faollari, saylov yoshidagi fuqarolar ishtirok etdilar. Yigʻilishni partiyaning tuman Kengashi raisi Maqsud Saʼdullayev ochdi va olib bordi.

Maqsud Saʼdullayev mazkur uchrashuv Prezidentlikka nomzod – Oʻzbekiston Xalq demokratik partiyasi Markaziy Kengashi raisi oʻrinbosari, Oʻzbekiston Respublikasi Oliy Majlisi Qonunchilik palatasi deputati Maqsuda Vorisovaning faoliyati, uning Saylovoldi dasturi bilan tanishtirish hamda saylovchilar bilan ochiq, erkin muloqot qilish maqsadida tashkil etilganini taʼkidlab oʻtdi. Shundan soʻng, nomzodning ishonchli vakili partiyaning Qoraqalpogʻiston Respublikasi Kengashi raisi Xallilo Yeshimbetov soʻzga taklif etildi.

Ishonchli vakil, partiyaning Qoraqalpogʻiston Respublikasi Kengashi raisi Xalillo Yeshimbetov uchrashuv ishtirokchilariga ilk marta Saylov kodeksi asosida oʻtkazilayotgan Oʻzbekiston Prezidenti saylovining mamlakat va xalq taqdiridagi ahamiyati, partiyaning saylovga tayyorgarlik jarayoni xususida maʼlumot berdi. Maʼruzada asosiy eʼtibor nomzodning saylovoldi dasturiga qaratilib, undagi ustuvor yoʻnalishlar boʻyicha saylovchilarga batafsil tushuntirish berildi.

Maqsuda Vorisova xalq haqida gʻamxoʻrlik qiluvchi, odamlarning dard va tashvishlarini yurakdan his qiladigan partiya arbobi sifatida tanilganligi, nomzodning 9 ta ustuvor yoʻnalish va 115 banddan iborat Saylovoldi dasturida belgilangan vazifalar, keltirilgan tashabbuslarni xalqni qiynab turgan muammolarning yechimi sifatida koʻrish mumkinligi alohida eʼtirof etildi. Aholi manfaatlarini taʼminlashga qaratilgan, kuchli ijtimoiy siyosat yuritish asosiy yoʻnalish qilib olingan ushbu dasturdagi barcha maqsad va gʻoyalar xalq, jamiyat ravnaqiga xizmat qilishi taʼkidlandi.

Ishonchli vakil dasturda kam taʼminlangan, lekin, boqimandalik kayfiyatida yurgan fuqarolarni jamiyatning faol ishtirokchisiga aylantirish, yolgʻiz keksalar, ota-ona qaramogʻisiz qolgan bolalar hamda oʻzgalar parvarishiga muhtoj nogironligi boʻlgan shaxslarning hayotiy ehtiyojlariga eʼtiborni kuchaytirish taklif etilganini, “Muruvvat”, “Saxovat” va “Mehribonlik” uylari faoliyatini yanada yaxshilash, “Mehribonlik” uylarini bitirib chiqqan yoshlarni uy-joy bilan taʼminlash, ishga joylashtirishning samarali mexanizmlarini joriy etish boʻyicha aniq vazifalari ilgari surilganini qayd etib oʻtdi.

Tadbirda soʻzga chiqqan Yoshlar agentligi mutaxassisi Umida Yangiboyeva, Nogironlar jamiyati tuman boʻlimi rahbari Nilufar Xolboyeva, tuman Kengashi deputati Gulshod Yusupova, 31-sonli maktab oʻqituvchisi Nodira Yoʻldoshevalar nomzodning Saylovoldi dasturida mamlakatni har tomonlama taraqqiy ettirish, olib borilayotgan barcha yoʻnalishdagi islohotlarning ijtimoiy samaradorligini oshirish, aholi turmush darajasini yuksaltirish, demokratik oʻzgarishlarni chuqurlashtirish va fuqarolik jamiyatini rivojlantirishga qaratilgan eng muhim masalalar qamrab olinganligini eʼtirof etishdi.

Soʻzga chiqqanlar Maqsuda Vorisovaning saylovoldi dasturida ilgari surilgan yoʻnalishlar va tashabbuslarni qoʻllab-quvvatlab, barchani boʻlajak saylovda faol ishtirok etishga, Oʻzbekiston xalq demokratik partiyasi nomzodiga ovoz berishga chaqirdilar.

Ozoda Xudoyberganova.