Muddatidan oldin ovoz berish jarayoni davom etmoqda

Maʼlumki, dunyodagi eng muhim demokratik jarayonlardan biri – bu saylovlardir. Oʻtkaziladigan har bir saylov jamiyat hayotining ertasini belgilab berishda beqiyos oʻrin tutadi. Chunki erkin va adolatli fuqarolik jamiyatini demokratik saylovlarsiz tasavvur qilib boʻlmaydi.

Ushbu jarayonda har bir davlat va jamiyatda xilma-xil fikrlar, odamlarning xohish irodasi, orzu-umidlari, ijtimoiy kayfiyati yaqqol namoyon boʻladi. Shu sababli, mazkur siyosiy jarayonni qonun normalari va xalqaro standartlar asosida tashkil etishga alohida eʼtibor qaratiladi.

Mamlakatimizda joriy yil oʻtkaziladigan muhim siyosiy jarayon – Oʻzbekiston Respublikasi Prezidenti saylovida saylovchilarning faol ishtirokini taʼminlash maqsadida barcha shart-sharoitlar, qulayliklar hamda imkoniyatlar yaratilmoqda.

Ayni kunlarda Prezident saylovini oʻtkazish maqsadida tuzilgan barcha saylov uchaskalarida boʻlgani kabi Amudaryo tumanidagi saylov uchastkalarida ham muddatidan oldin ovoz berish jarayonlari boʻlib oʻtmoqda. Saylov qonunchiligiga koʻra saylov kuni oʻz yashash joyida boʻlish imkoniyatiga ega boʻlmagan saylovchi muddatidan oldin ovoz berish huquqiga ega ekanligi belgilangan boʻlib, muddatidan oldin ovoz berish saylovga oʻn kun qolganida boshlanadi va saylovga uch kun qolganida tugallanadi. Shundan kelib chiqib, 2021-yil 14-20-oktyabr kunlari Oʻzbekiston Respublikasi Prezidenti saylovida muddatidan oldin ovoz berish jarayonlari tashkil etilmoqda.

Aytish kerakki, qonunchilikda saylov kuni yashash hududida boʻla olmaydigan saylovchilar uchun muddatidan oldin ovoz berish va axborot texnologiyalari orqali turgan joyda saylov uchastkasini boshqa hududdagi saylov uchastkasiga oʻzgartirish kabi qator imkoniyatlar mavjud boʻlib, muddatdan oldin ovoz berish huquqi saylov kuni oʻz yashash joyida boʻlish imkoniyatiga ega boʻlmagan saylovchiga beriladi hamda saylovchi muddatdan oldin oʻzi munosib deb topgan nomzodiga ovoz beradi.

Ushbu jarayonning amalga oshirilishi Oʻzbekiston Respublikasi Saylov kodeksining 57-moddasida belgilab qoʻyilgan boʻlib, unga koʻra muddatidan oldin ovoz berishni amalga oshirish uchun saylovchi saylov kunida boʻla olmasligining sabablari koʻrsatilgan ariza asosida tegishli uchastka saylov komissiyasidan saylov byulletenini oladi. Saylovchi saylov byulletenini olganligi haqida tegishli uchastka komissiyasining kamida ikki nafar aʼzosi hozirligida saylovchilar roʻyxatiga imzo qoʻyadi.

Saylov byulleteni maxsus jihozlangan yashirin ovoz berish kabinasida yoki xonasida saylovchi tomonidan toʻldiriladi. Saylovchi qaror qabul qiladi va toʻldirilgan saylov byulletenini yopiq konvertda qoldiradi, konvert tegishli uchastka saylov komissiyasining seyfida saqlanadi. Konvertning yelimlangan joyiga uchastka komissiyasining ikki nafar aʼzosining imzolari qoʻyilib, ular komissiyaning muhri bilan tasdiqlanadi.

Qonunchilikka koʻra tumanimizdagi saylov uchastkalarida oʻtkazilayotgan muddatidan oldin ovoz berish jarayonlari soat 9:00 dan soat 19:00 ga qadar davom etmoqda. Shuningdek, muddatidan oldin ovoz berish jarayonlarini tashkil etishda saylovchilarning barcha karantin qoidalariga amal qilishlariga alohida eʼtibor qaratilmoqda. Saylovchilarning binoga kirishida tana harorati oʻlchanib, ularning himoya niqobi bilan taʼminlanganligi, ijtimoiy masofaga rioya qilishi nazorat qilinmoqda. Saylovchilarning qoʻllariga antiseptik vositalar sepilib, dezinfektsiya qilinmoqda.

Shu oʻrinda saylash huquqiga ega boʻlgan barcha yurtdoshlarimizni ushbu muhim siyosiy tadbirda faol ishtirok etib, oʻz konstitutsiyaviy burchlaridan foydalangan holda oʻzlari munosib deb bilgan nomzodga ovoz berishga chaqiramiz.

Javohir Oʻrozboyev, Qoraqalpogʻiston Respublikasi “Kelajak liderlari” klubi aʼzosi.