“Kuzatuvchilar va siyosiy partiyalar vakolatli vakillarining huquq va majburiyatlari” mavzusida oʻquv seminari tashkil qilindi

Mamlakatimizda muhim ahamiyatga ega boʻlgan, tarixiy, siyosiy jarayon – Oʻzbekiston Respublikasi Preizdenti saylovini munosib oʻtkazish maqsadida, uni tashkil etishda ishtirok etuvchi masʼullarning saylov qonunchiligi borasidagi bilim, koʻnikma va malakalarini oshririshga alohida eʼtibor qaratilmoqda.

Hududlarda saylov jarayonida ishtirok etuvchi kuzatuvchilar hamda siyosiy partiyalarning vakolatli vakillarining saylovga oid bilimlarini yanada oshirish maqsadida turli mavzularda oʻquv-seminarlari tashkil etilmoqda.

Joriy yilning 20-oktyabr sanasida Amudaryo tumanida Oʻzbekiston “Milliy tiklanish” demokratik partiyasi tuman kengashi tomonidan “Kuzatuvchilar va siyosiy partiyalar vakolatli vakillarining huquq va majburiyatlari” mavzusida oʻquv seminari tashkil qilindi.

Partiyaning saylov jarayonidagi munosib ishtirokini taʼminlash maqsadida tashkil etilgan oʻquv-seminarda partiyaning Qoraqalpogʻiston Respublikasi Kengashi va tuman kengashi masʼullari, tuman Adliya boʻlimi masʼullari, deputatlar, kuzatuvchilar, vakolatli vakillar hamda ommaviy axborot vositalari vakillari ishtirok etdilar.

Oʻquv seminarda tuman Adliya boʻlimi bosh mutaxassisi, Prezident saylovini oʻtkazish boʻyicha hududiy trener Jamshid Bekimbetov “Oʻzbekiston Respublikasi Prezidenti saylovining Konstitutsiyaviy-huquqiy asoslari” mavzusida maʼruza qildi.

Jamshid Bekimbetov oʻz soʻzida Prezident saylovining mamlakat siyosiy hayotidagi muhim ahamiyati, uning oʻziga xos jihatlari, Saylov kodeksi va saylov qonunchiligiga kiritilgan oʻzgartirish hamda qoʻshimchalarning mazmun-mohiyati, saylov jarayonlarining ochiq va oshkoraligini taʼminlashda kuzatuvchilar va siyosiy partiyalar vakolatli vakillarining tutgan oʻrni va ahamiyati, kuzatuvchilarning huquq va majburiyatlari, siyosiy partiyalarning vakolatli vakillarining huquqiy maqomi haqida batafsil maʼlumot berdi.

Shundan soʻng Oʻzbekiston “Milliy tiklanish” demokratik partiyasi Qoraqalpogʻiston Respublikasi Kengashi bosh mutaxassisi Mirzaxmet Tajimuratovning «Kuzatuvchi va siyosiy partiyalar vakolatli vakillarining huquq va majburiyatlari» mavzusidagi maʼruzasi tinglandi.

Taʼkidlanganishicha, kuzatuvchi – tegishli tartibda beriladigan mandatga binoan saylov uchastkalarida hozir boʻladigan siyosiy partiyalarning, fuqarolarning oʻzini oʻzi boshqarish organlari, boshqa davlatlar va xalqaro tashkilotlar vakillari hisoblanadi. Kuzatuvchilar hamda siyosiy partiyalarning vakolatli vakillari faoliyatining huquqiy asoslari Oʻzbekiston Respublikasi Saylov kodeksi, “Siyosiy partiyalar toʻgʻrisida”gi, “Fuqarolarning oʻzini oʻzi boshqarish organlari toʻgʻrisida”gi qonuni, “Siyosiy partiyalar va oʻzini oʻzi boshqarish organlarining kuzatuvchilari toʻgʻrisida”gi Nizom hamda “Oʻzbekiston Respublikasi saylovlarida xorijiy davlatlar va xalqaro tashkilotlardan qatnashadigan kuzatuvchilar toʻgʻrisida”gi Nizom kabi qonun hujjatlari bilan mustahkamlangan.

Xususan, Oʻzbekiston Respublikasi Saylov Kodeksining 34-moddasida Oʻzbekiston Respublikasi Prezidentligiga nomzodlar, Qonunchilik palatasi deputatligiga nomzodlar, mahalliy Kengashlar deputatligiga nomzodlar koʻrsatgan siyosiy partiya saylov komissiyasining majlislarida, hujjatlarni topshirishda, imzo varaqalari toʻgʻri toʻldirilganligini tekshirishda, saylov uchastkasida ovozlarni sanab chiqishda ishtirok etish uchun vakolatli vakil tayinlashga haqli ekanligi belgilab qoʻyilgan.

Tadbirda ishtirok etayotganlar oʻzlarining saylovga oid qator savollari bidan murojaat qildilar hamda masʼullar savollarga tegishlicha javob berdilar.

Fotima Eshimbetova, OʻzMTDP Amudaryo tuman kengashi ijrochi kotibi.