BUGUN BIZ KIM BOʻLDIK – OZOD, HUR DAVLAT!

Bozor toʻkin – el badavlat

"Bozori obodning eli obod”, - deydilar. Xalqimiz tilidagi "bozor toʻlmasa, xalq toʻymaydi”, - degan ibora ham bekorga aytilmagan. Chunki bozorlarimiz – avvalo xalqimizning ham maʼnaviy, ham iqtisodiy qiyofasi hisoblanadi.

Rivoyat

Shikorda charchagan bir shoh yaqin oʻrtadagi bozorga kirib, koʻnglini yozmoqchi boʻladi. Kirsaki, bozor molga toʻla. Mulozimlariga koʻngliga kelgan narsani keltirishni buyuradi. Mulozimlar shohning amrini ado etaman, deb toliqib qolishadi. Shunda shoh:

- Bu bozor ahlining barchasi mendan ham badavlat ekan, - degan xulosaga keladi.

- Nechuk? – hayratlanishadi mulozimlar. – Biz axir bu bozorda Siz hazrat kabi badavlat odamlarni uchratmadik, ularning barchasi sotuvchi va oluvchi (xaridor)lar edilar, - deyishadi.

- Sotuvchining molini oluvchi qancha koʻp boʻlsa, el-yurt farovon boʻladi, bozori obod elning turmushi ham obodonda, - deydi shoh sipolik bilan.

Haqiqat

Ana endi, azizlar, bizning Mangʻit bozorimizga bir boqing-da, amudaryoliklarning bugungi hayotiga baho beravering.

- Mangʻit bozorlarida joningga ne kerak – hammasi bor, - deyishadi respublikamizning turli hududlaridan tumanimizga kelib-ketguvchi mehmonlar.

Bozorimiz – maʼnaviyatimiz oynasi. Sababki, bunda otning taqasidan tortib, ixtirochi-tadbirkorlar tomonidan yaratilgan kichik motoblok yer haydash agregati-yu, bolalar mashinasigacha, tumanimiz bogʻlarining tarovatini oʻzida jam etgan quruq mevalardan tortib har donasi naq yarim kilo tosh bosguday, shirasi jonga darmon shaftoli-yu chanqovbosdi anorgacha bor. Keling, mazasini totib koʻring! Va bogʻini soʻrang!

- Qilichboy, - deydilar eng avval.

- "Oq oltin”, Qangli, "Choykoʻl”, Xitoy, "Chorbogʻ”... Eh-he, Siz soʻrayverasiz, yuzlab bogʻ-rogʻlar taʼrifini eshitasiz.

- Olmasangiz ham Qilichboyning gurvagidan totib keting, - deya marhamat qilgan dehqonning oldidagi turfa navli qovun-tarvuzlarning shirasidan totgan tillaringizdan ham sharbat toʻkiladi-yov!

- Haftaning seshanba, payshanba, shanba kunlari ham xuddi katta bozor kunidagiday savdo qilamiz, - deydi qilichboylik tadbirkor dehqon Tursunboy Yoʻldoshev. – Chunki aynan ana shu kunlari Qoraqalpogʻiston Respublikasining Chimboy, Boʻzatov, Nukus, Shoʻmanoy, Taxtakoʻpir, Qoraoʻzak tumanlaridan, hatto Qoʻngʻirot va Moʻynoq tumanlaridan koʻplab yurtdoshlarimiz Mangʻit dehqon bozoriga kelishib, koʻplab meva-cheva xarid qilib ketishadi. Ularning kelishi bozorimizga ham, bizning savdomizga ham baraka kiritadi.

- Boshqa tumanlardan kelganlar meva-chevaning eng saralarini olib ketishsa, bozorimizda narx-navo oshib ketmaydimi?

- Aksincha, - oʻylashib olishganday javob berishadi sotuvchi-dehqonlar. – Olib kelgan mahsulotlarimiz tez sotilgan sari biz tomorqamizda yangi yetilgan mahsulotlarimizni bozorga olib chiqaveramiz. Birinchidan, molimiz isrof boʻlmaydi, ikkinchidan, daragiyam moʻlda, opa!

Ana, koʻrdingizmi! Mangʻit Dehqon bozorini sarhil mahsulotlar bilan toʻldirib, hatto tumanimiz xalqi ehtiyojidan orttirib, qoʻshni tumanlar xalqini ham meva-cheva, sabzavot va poliz mahsulotlari bilan taʼminlashning uddasidan chiqayotir bugungi tomorqa sohiblari. Bozorlarimizdagi bu toʻkinchilik elimiz hayotini ziynatlaganini aytmaysizmi?! Bugun xalqimiz bozorga shunchaki xarid uchun kirmaydi: olma-anorning eng sarxilini oladi, nashvati-yu gilosni, anjir-u shaftolini bir totib koʻrmasdan taroziga bosdirmaydi. Chunki – bozor toʻlib-toshgan, rastalarda eng sarxil mahsulotlar terilgan. Tanlashga, savdolashib xarid qilishga imkoniyat bor.

- Bunday toʻkin-sochinlikni, toʻgʻrisi, xalqimiz hech qachon koʻrmagan, dehqonlarimizga rahmat!

Bu xaridorning eʼtirofi, balki shukronasi, mustaqillik tufayli xalqimiz hayotiga kirib kelgan ijtimoiy-iqtisodiy yuksalish, yaxshilik, ezgulik tomon evrilish – Istiqlol haqiqatlari!

Robiya YOʻLDOShEVA.