BAXTLI KUNLAR OʻZ-OʻZIDAN KELMAGAN
Mustaqillik… sen bulutlarni yorib chiqqan quyoshsan, qancha-qancha bobokalonlarimizning koʻnglidagi asriy armon, asriy orzusan!
Haqiqatan, mustaqillik bizning qadr-qimmatimizni, milliyligimizni va muxtasar qilib aytganda, oʻzligimizni qaytarib bergan ulugʻ neʼmatdir.
Mustaqillik toʻgʻrisida soʻz ketganida: mustaqillik bizga nima berdi? kecha kim edig-u bugun kim boʻldik? kabi savollar xayolimizni chulgʻab oladi. Beshak, mustaqillik bizga erkin nafas va yangi farovon hayot ato yetdi. Yaqin oʻtmishga nazar soladigan boʻlsak, bizning xalqimiz tahqirlangan, insoniy shaʼni va qadr-qimmati toptalgan, Respublikamiz agrar va qoloq hudud edi. Bugun esa har tomonlama rivojlangan, har bir soha taraqqiy topgan, barkamol farzandlari iqtidorlari bilan dunyoni lol qoldirayotgan, yuksak maʼnaviyatli, hur millatga aylandik. Istiqlolga erishishimiz natijasi oʻlaroq, asrlar silsilasida oʻz mahobatini yoʻqotmay kelayotgan muqaddas qadamjolarimiz, masjid-u madrasalarimiz qayta boʻy tikladi. Yurtimizga kelayotgan sayyohlarning soni kundan-kunga ortib borayotganligi buning yorqin misolidir.
Bugun Oʻzbekistonimiz mustaqilligi yigirma uch yoshda. Mana shu qisqa fursat ichida ona xalqimizning moddiy va maʼnaviy ahvoli tubdan oʻzgarib ketdi. Yurtimiz jamoli tanib boʻlmas darajada chiroy ochib, bugun dunyo ahli havas qilgulik darajada yuksalib bormoqda. Albatta, bu oʻzgarishlar, bu yuksalishlar zamirida istiqlol bergan ulkan imkoniyatlar yotadi.
Ayniqsa biz yoshlarga qaratilayotgan eʼtiborni koʻrib, qalblarimiz faxru-iftixorga toʻladi. Chunki istiqlolning ilk kunlaridan boshlab yoshlarga eʼtibor davlat siyosati darajasiga koʻtarildi. Oʻquv maskanlarimizdagi zamon talablariga toʻliq javob beradigan, yorugʻ va shinam xonalarimiz, barcha talablarga javob beradigan qanchadan-qancha oʻquv laboratoriya xonalari va sport zallari, biz yoshlarning ilm olishga qanchalik gʻamxoʻrliklar qilinayotganini koʻrsatib turibdi.
Prezidentimiz I.A.Karimovning Oʻzbekiston respublikasi mustaqilligining yigirma uch yilligiga bagʻishlangan tantanali marosimidagi tabrigini tinglab, toʻgʻrisini aytsam, koʻzimdan yosh chiqib ketdi. Davlatimiz rahbari biz yoshlarga shunday bir ishonch bilan, shunday bir gʻurur bilan murojaat qilayaptilarki, mening ham koʻnglimda mana shunday ozod elning farzandi ekanligimdan faxrlanish, iftixor tuygʻulari joʻsh urdi.
Prezidentimizning:
-Aziz bolalarim!
Mening farzandlarim boʻlmish butun Oʻzbekiston yoshlariga qalbimda, yuragimda boʻlgan fikrni aytmoqchiman: har qachon sizlar bilan uchrashganda, sizlarning yonib turgan koʻzlaringizni, navqiron qaddi-qomatingizni, sizlar erishayotgan yutuqlarni kuzatganda, koʻpchilik qatori men ham oʻzimda xuddiki qanot paydo boʻlgandek his qilaman.
Sizlar qayerda, qaysi sohada boʻlmasin-bilim olish, ilmu-hunar choʻqqilarini egallash, eng zamonaviy kasb-hunarlarni oʻzlashtirish, biznes sohasini rivojlantirishda, sport maydonlarida Oʻzbekistonning shuhratini tarannum yetishda barchaga namuna boʻlayotganingiz, soʻzsiz hammamizni quvontiradi, - dyeya ishonch bildirgani hurmat va ehtirom bilan, ishonch va samimiyat bilan alqaganliklarini koʻrib qalbim yorishib ketdi. Mana shunday oʻylar mendan boshqa yana necha-necha oʻzbekistonlik yoshlarning koʻnglidan oʻtgan boʻlsa ajab yemas. Sobiq ittifoq hukmron boʻlgan oʻsha yillarda, hali ona suti ogʻzidan ketmagan goʻdaklarning qahraton qishda sovuq qorlarni kechib paxta terganliklarini, ularning ayni oʻqib ilm oladigan pallalari mana shunday qora mehnatda, paykallarda kechganini oʻylasam,bugungi kunimizning qadrini teranroq anglaganday boʻlaman. Har qadamimda, har nafasimda. Va shu barobarida farzandlik burchimni, bunday dorilomon kunlar oʻz-oʻzidan kelmaganini ham. Bizga ana shunday ulugʻ baxtni ato etgan eng ulugʻ, eng aziz bayramimiz muborak boʻlsin, azizlar!
Aziza MADRAHIMOVA,
Mangʻit shahridagi Iqtisodiyot kasb-hunar kolleji 3-bosqich oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
