Gʻallachilik sohasiga suv tejovchi texnologiyalar joriy qilinmoqda

Dehqonlar yil davomida mehnat qilib, taqir yerdan moʻl hosil undirib, el-dasturxonini boyitishga qodir insonlardir.

Amudaryo tumanida ham bugʻdoy, paxta va boshqa ekinlaridan yuqori hosil olib, xalqimiz farovonligiga hissa qoʻshayotgan mirishkor-dehqonlar va ularning izdoshlari juda koʻplab topiladi. Tumanimizdagi Bobur nomli ovul hududida boʻlganimizda dehqonchilik turlarining barcha yoʻnalishlarida olib borilayotgan ijobiy ishlarning guvohi boʻldik. Hududda 22 fermer xoʻjaligi boʻlib ular koʻp tarmoqli faoliyat yuritadi. Ularga “Zarbdor” muqobil mashina-traktor parki xizmat koʻrsatadi. Fermer xoʻjaliklari pilla, bugʻdoy, paxta hosilidan tashqari koʻplab donli ekinlarni, sabzavot turlarini ekib, oʻstirib, tarbiyalab moʻl hosil yetishtirib kelmoqdalar.

Hududdagi “Abdulla” fermer xoʻjaligi ham shular jumlasidan. Mazkur xoʻjalik ham koʻp tarmoqli xoʻjaliklaridan hisoblanadi. Fermer xoʻjaligiga Poʻlat Abdullayev rahbarlik qilib kelmoqda. Dehqonchilik sirlarini elga mashhur bobolaridan meros qilib olgan Poʻlat oʻz vazifasiga astoydil mehr qoʻyib, xoʻjalikning yildan yilga rivojlanib borishiga erishdi. Aniq reja, maqsadli qoʻyilgan qadamlar oʻzining samarasini berib, xoʻjalikning moddiy texnika bazasi ham mustahkamlanib bordi. Hozirgi kunda xoʻjalikda 4 ta zamonaviy surim traktori, qudratli don kombayni, barcha zarur qishloq xoʻjaligi uskunalari mavjud.

Xoʻjalik aʼzolari oʻtgan yili dastlabki hosil 17 quti ipak qurti boqib-oʻstirib 53 kilogramm pilla hosili yetishtirdilar. Dastlabki hosil olish boʻyicha davlat rejasining muvaffaqiyatli ado etilishi xoʻjalik aʼzolarini yangi marralar sari yetakladi. Xoʻjalikda davlatga bugʻdoy, paxta hosili yetishtirib berish rejalari ham ortigʻi bilan bajarildi. Fermer xoʻjaligi yil oxiriga kelib 1 milliard soʻmga yaqin daromad olishga erishdi. Bu mablagʻ qishloq xoʻjaligi uchun sarf qilingan xarajatlarni qoplash bilan birga kelasi yil uchun mineral oʻgʻitlar, yonilgʻi-moylash mahsulotlari, ehtiyoj qismlar zahirasini yaratishga ham imkoniyat yaratdi.

Xoʻjalikda oʻtgan yili kuzda bu yilgi hosil uchun 36 gektar maydonga “Grom” navli urugʻlik bugʻdoy ekildi. Shu maydonning 10 gektarida yomgʻirlatib sugʻorish yoʻlga qoʻyilgan. Bu yangicha usul suvni tejashga, shu bilan birga yerni sugʻorishga ketadigan xarajatni tejashga qaratilgani bilan ahamiyatlidir. Suv taqchiligi kuzatilayotgan sharoitda bu usul oʻz samarasini berishi koʻzda tutilmoqda. Yuksak agrotexnika qoidalari asosida tarbiyalanayotgan bugʻdoy maysalari kelgusidagi moʻl hosildan darak berib turibdi. Xoʻjalik aʼzolari har bir gektar bugʻdoy maydonidan kamida 45-50 tsentnerdan hosil olish uchun astoydil mehnat qilmoqdalar.

Shu bilan bir qatorda bahorgi ekish ishlari oldidan chigit ekiladigan maydonlarning ham shoʻri yuvilib, qondirib sugʻorilgan.

Xoʻjalik aʼzolari 51 gektar maydonga “Sulton” navli chigit ekib, gektaridan oʻrtaga 40 tsentnerdan paxta hosili undirishga bel bogʻlaganlar. Xoʻjalikda 29 nafar ijarachi barakali mehnat qilmoqda.

Fermer xoʻjaligi rahbariyati va ishchilarining oldiga qoʻygan maqsadlari ulugʻ. Shunday ekan, ulugʻ maqsadlarni koʻzlab olgʻa intilayotgan yurtdoshlarimizning kelgusi ishlarida omadlar tilaymiz.

Oʻrozali REYIMOV.