QANGLI OVULIDA ChEGARA MASALALARIGA BAGʻIShLANGAN YIGʻILISh OʻTKAZILDI

Qangli ovulida chegara masalalari hamda Vazirlar Mahkamasining 2021-yil 4-dekabrdagi “Oʻzbekiston Respublikasi hududida chegara zonasi va chegara mintaqasini belgilashga oid qoʻshimcha chora-tadbirlar toʻgʻrisida”gi va “Oʻzbekiston Respublikasi hududida chegara rejimi toʻgʻrisidagi nizomni tasdiqlash” toʻgʻrisidagi qarorlari mazmun-mohiyatini tushuntirishga bagʻishlangan yigʻilish oʻtkazildi.

27-aprel kuni boʻlib oʻtgan tadbirda Davlat xavflik xizmati tuman boʻlimi, Davlat xavflik xizmatiga qarashli chegara qoʻshinlari xodimlari, fuqarolar yigʻiniga biriktirilgan profilaktika inspektori va mahalla faollari ishtirok etishdi.

Yigʻilishda soʻzga chiqqan masʼullar Vazirlar Mahkamasining 2021-yil 4-dekabrdagi “Oʻzbekiston Respublikasi hududida chegara zonasi va chegara mintaqasini belgilashga oid qoʻshimcha chora-tadbirlar toʻgʻrisida”gi qarori mazmun-mohiyati toʻgʻrisida batafsil tushunchalar berib, “Oʻzbekiston Respublikasining Davlat chegarasi toʻgʻrisida”gi Oʻzbekiston Respublikasi Qonuniga muvofiq chegara zonasi va chegara mintaqasini belgilash tartibi, shuningdek, chegara rejimi Oʻzbekiston Respublikasi Vazirlar Mahkamasi tomonidan belgilanishni aytib oʻtdilar.

Shunga muvofiq qabul qilingan Vazirlar Mahkamasining mazkur Qaroriga koʻra, 2022-yil 1-aprelga qadar joylarda chegara zonasi va chegara mintaqasi chizigʻini belgilanishi va kirish joylarida ogohlantiruvchi hamda axborot belgilarini oʻrnatish choralari koʻrilishi, chegara zonasi va chegara mintaqasida Vazirlar Mahkamasining 2018-yil 5-iyuldagi tegishli qarori bilan tasdiqlangan Oʻzbekiston Respublikasi hududida chegara rejimi toʻgʻrisidagi nizom talablari bajarilishi taʼminlanishi kerakligini taʼkidladilar.

Shuningdek, diniy-ekstremistik oqimlar tarkibida sodir etgan jinoyati uchun jazo oʻtagan, hozirda tuzalish yoʻliga kirgan va amnistiya tufayli ozodlikka chiqqan shaxslar bilan oʻtkaziladigan tarbiyaviy ishlarda qatnashish, ularga aqidaparastlikning asl mohiyati va zararli oqibatlarini tushuntirish orqali ijobiy taʼsir oʻtkazish kerakligi xususida keng toʻxtalib oʻtdilar.

Taʼkidlanganidek, tinchlikni asrash hushyorlik va ogohlikni talab qiladi. Shu nuqtai-nazardan, globallashuv jarayonlari shiddatli tus olgan hozirgi zamonda xalqimizda, ayniqsa, yoshlarda milliy gʻurur, iftixor, tuygʻusini, yanada chuqurroq shakllantirish, yot gʻoyalardan saqlovchi mafkuraviy immunitet shakllantirish Oʻzbekistondek buyuk Vatanimiz kelajagiga oʻzini maʼsul hisoblovchi barcha yurtdoshlarimizning, shu jumladan, diniy soha xodimlarining muhim vazifasi boʻlib qoladi.

Yigʻilish davomida davlat chegarasi rejimi, chegaraning shaxslar va transport vositalari tomonidan kesib oʻtilishi, tovarlar, boshqa mol-mulk va hayvonlarni olib oʻtish, xoʻjalik faoliyati va boshqa faoliyat yuritish, davlat chegarasini buzishda javobgarlik choralari xususidagi savollarga toʻliq javoblar berildi. Shuningdek, hududdagi aholining ijtimoiy-iqtisodiy muammolari ham oʻrganildi.

O.Xudoyberganova.