MUZAFFARNING ISh KUNLARI

Mamlakat ijtimoiy-siyosiy hayotida faol ishtirok qilish, xalq hayotiga oid muammolar yechimini topish va bu muammolarni ijobiy hal etish – deputatning birinchi galdagi vazifasidir. Chunki bugungi xalq va saylovchi bundan 30-yillar oldingi davr odamidan dunyoqarashi, orzu-intilishlari, hatto oldiga qoʻygan maqsad va rejalari jihatidan ham keskin farq qiladi.

Shu bois, Amudaryo tumanidagi Xalq deputatlari Amudaryo tuman Kengashining 18-Xitoy saylov okrugidan deputati Muzaffar Yeshchanov har gal saylovchilari bilan uchrashganida saylov okrugi hududida istiqomat qiluvchi har bir fuqaro, har bitta oila va xonadon hayotiga doir yutuq va muammolarni avvaldan sinchiklab oʻrganadi. Oʻzbekiston “Adolat” sotsial-demokratik partiyasidan nomzodi koʻrsatilgan deputat aholi tomorqa xoʻjaligini yuritish boʻyicha erishilayotgan muvaffaqiyatlar zamiridagi fidoyi mehnat, ilgʻor tomorqachilarning tajribalari, innovatsion gʻoyalarini ommalashtirish orqali hududdagi kam daromadli, tomorqa yeridan unumli foydalanmayotgan oilalarda har bir qarich yerdan samarali foydalanish boʻyicha tashviqot ishlarini olib boradi. Bu esa aholining oʻzini oʻzi ish bilan bandligini taʼminlash imkonini beribgina qolmay, hudud aholisi farovonligini oshirishda tomorqa xoʻjaligining ahamiyati qanchalik muhimligini anglash imkonini beradi.

U Toshkent Davlat agrar Universitetini tugatib, 2008-yilda “Shoʻr qalʼa” fermer xoʻjaligi ish yurituvchisi sifatida ilk mehnat faoliyatini boshlagan kunlaridanoq xalq ichiga kirib borish, ular bilan birga mehnat qilish, quvonch-u tashvishlarini birgalikda baham koʻrish orqali kundalik ish rejalarini muvaffaqiyatli, toʻsiqlarsiz amalga oshirish mumkinligini anglab yetdi.

Oʻzi faoliyat yuritayotgan fermer xoʻjaligi ishchilarining orzu-niyatlariga yoʻldosh boʻldi, mummolariga yelka tutdi. Keksalarning duosini olib, yoshlar bilan bamaslahat ish yuritdi. Natijada u kasbidan kamol topdi, nainki xalq, balki tuman rahbariyati ishonchiga sazovor boʻldi.

Keyinchalik Amudaryo tuman qishloq va suv xoʻjaligi boʻlimining irrigatsiya-melioratsiya tarmoqlari va qurilmalari boʻyicha yetakchi mutaxassisi, Amudaryo tumani Namuna muqobil mashina-traktor parki raisi, “Amudaryotex” xorijiy korxonasi agronomi, Qoraqalpogʻiston Respublikasi suv xoʻjaligi vazirligi huzuridagi meliorativ ekspeditsiyasi Amudaryo meliorativ uchastkasi boshligʻi vazifalarida sidqidildan xizmat qildi.

Oʻzi mehnat qilgan jamoalarda hamkasblarining, rahbar sifatida ishchi-xodimlarining, tugʻilib-oʻsgan mahallasida esa eldoshlarining ishonch va hurmatiga sazovor boʻldi.

U qaysi jamoada, qay lavozimda ishlashidan qatʼiy nazar, bir vaqtning oʻzida “Muzaffar Yeshchanov” fermer xoʻjaligiga ham rahbarlik qildi. Paxta va boshqa qishloq xoʻjaligi mahsulotlari yetishtirish boʻyicha “Muzaffar Yeshchanov” fermer xoʻjaligini tumandagi ilgʻor qishloq xoʻjalik korxonalari safiga olib chiqdi.

U saylov okrugi hududidagi mahallalarda xotin-qizlar faollari, koʻcha boshchilari va nuroniylar ishtirokidagi har bir uchrashuvida Prezidentimiz tashabbusi bilan ishlab chiqilgan Yangi Oʻzbekistonning taraqqiyot strategiyasi mazmun-mohiyati xususida tushunchalar berib kelmoqda. Xususan, kam daromadli, ehtiyojmand oilalarni kambagʻallikdan chiqarish boʻyicha oʻz rejalari, bu borada davlatimiz tomonidan koʻrsatilayotgan eʼtibor yuzasidan saylovchilarning fikrlari, takliflarini oʻrganishdan aslo charchamaydi.

Muzaffar Yeshchanov ayni paytda Namuna mahallasida tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman hokimi yordamchisi sifatida faoliyat yuritib, deyarli har kuni xalq bilan birga. U Namuna mahallasi hududidagi barcha koʻchalar va aholi punktlarida amalga oshirilayotgan obodonlashtirish va koʻkalamzorlashtirish ishlariga bosh-qosh. Qolaversa, “Ayollar daftari”, “Yoshlar daftari”, “Temir daftar” roʻyxatlariga kiritilgan fuqarolarning muammolari va murojaatlarini masʼullarni jalb qilgan holda joyiga chiqib oʻrganish, ishsiz fuqarolarning bandligini taʼminlash boʻyicha amalga oshirilayotgan saʼy-harakatlaridan saylovchilar ham, mahalla ahli ham mamnun.

Muzaffar Yeshchanovning ham deputat, hokim yordamchisi sifatidagi faoliyat koʻlami ancha keng. Oʻzi tugʻilib-oʻsgan Namuna mahallasi, qolaversa, 18-Xitoy saylov okrugi hududida yashovchi saylovchilar ishonchini oqlash, xalqning dard-u tashvishlariga sherik boʻlib yashashni oʻz zimmasidagi masʼuliyatli vazifa deb biladi. Oilada esa amunali umr yoʻldosh va mehribon ota. Rafiqasi bilan ikki oʻgʻil, ikki qizni ilmli-maʼrifatli qilib voyaga yetkazishmoqda.

Deputat va hokim yordamchisi, namunali fermer xoʻjaligi rahbari, ibratli oila sohibi Muzaffar Yeshchanovning har bir ish kuni xalq bilan birga, unga ishonch bildirgan saylovchilar davrasida oʻtadi. Zero, insonlarning dardu tashvishlari bilan yashash odamiylikning eng oliy mezonidir.

Robiya YOʻLDOShEVA.