SEKTORLAR RAHBARLARI BOZORLARDA NARX-NAVO BARQAROR BOʻLIShIGA EʼTIBOR QARATMOQDALAR

Jahonda yuz berayotgan iqtisodiy tebranishlar tufayli bozorlarda narx-navo spekulyatsiyasining ildiz otishiga, ayrim mahsulot turlarining sunʼiy taqchilligiga sabab boʻlmoqda. Ayniqsa, qishloq xoʻjaligi mahsulotlari ulgurji bozori va dehqon bozorlarida kunlik kirib keladigan meva-sabzavot, gʻalla, goʻsht va non mahsulotlarining narxi soʻnggi haftalarda jiddiy oshgani xaridorlarning noroziligiga sabab boʻlmoqda.

Shu bois, bozorlarimizdagi narx-navoning sunʼiy oshishiga chek qoʻyish, sotuvchi bilan xaridor oʻrtasida tushunmovchiliklar kelib chiqishining oldini olish maqsadida Amudaryo tumanidagi sektorlar rahbarlari – 1-sektor rahbari, tuman hokimi Sultonboy Yoʻldashev, 2-sektor rahbari, tuman prokurori Aziz Roʻzmetov, 3-sektor rahbari, tuman Ichki ishlar boʻlimi boshligʻi Ulugʻbek Xudoyberganov va 4-sektor rahbari, tuman davlat soliq inspektsiyasi boshligʻi Aydos Seitovlar har kungi ish faoliyatini bozordagi narx-navoni nazorat qilishdan boshlamoqdalar.

Maʼlumki, bugʻdoy yetishtiruvchi fermer va dehqonlardan tortib, ishlab chiqaruvchi va isteʼmolchilar manfaatini koʻzlagan holda un mahsuloti realizatsiya qilinishining bozor tamoyillariga asoslangan mexanizmi joriy qilindi. Ushbu masalada tushunmovchiliklar kelib chiqishining hamda narxlar asossiz oshirilishining oldini olish, nazorat oʻrnatish maqsadida sektorlar rahbarlari tadbirkorlar bilan uchrashuvlar oʻtkazmoqda.

Aholi bilan ham uchrashuvlar oʻtkazilib, un mahsuloti joriy yil iyun oyidan boshlab birja savdolariga yetarli miqdorda qoʻyilayotgani va bu jarayon ustidan doimiy nazorat oʻrnatilgani, Respublikada un mahsuloti zahirasi shakllantirilgani, narx navolarning keskin oshib ketmasligi uchun zarur miqdorda un savdolarga qoʻyib borilishi tushuntirilmoqda.

Shulardan kelib chiqqan holda prokuratura va soliq organlari mutasaddilari ham non ishlab chiqaruvchi va sotuvchilarni hamda aholini bu borada havotirga tushmaslikka, sunʼiy taqchillik vujudga keltirmaslikka chaqirmoqdalar.

Qolaversa, asosiy turdagi kundalik isteʼmol mahsulotlarining rastalarda doimiy savdoda boʻlishini taʼminlash, narx-navoning asossiz ravishda oshirilishiga yoʻl qoʻymaslik, sunʼiy taqchillik kelib chiqishining oldini olish maqsadida toʻrtta sektor rahbarlari deyarli har kuni bozorlarda va savdo doʻkonlarida nazorat ishlarini olib borishayotganidan xaridorlar ham mamnun.

Amalga oshirilayotgan nazorat tadbirlari tufayli ayni kunlarda Mangʻit Dehqon bozorida mahsulotlar narxi sunʼiy oshishining oldi olinmoqda.

Sektor rahbarlari narx-navoning sunʼiy oshirib yuborilishiga hech qanday asos yoʻqligini, mamlakatimizda, xususan, Amudaryo tumanida ham xalqimiz ehtiyojini toʻliq taʼminlaydigan darajada oziq-ovqat mahsulotlari zahiralari mavjudligini taʼkidlab, sotuvchi va xaridorlarga bu borada zarur maʼlumotlarni ham taqdim etishmoqda.

Shu oʻrinda yurtdoshlarimizdan shuni iltimos qilamizki, qaysidir mahsulot narxi oshib ketar ekan yoki tugab qolar ekan degan asossiz mish-mishlarga ishonib, ehtiyojdan ortiq miqdorda sotib olish sunʼiy taqchillik kelib chiqishiga sabab boʻladi. Shunday ekan, barcha yurtdoshlarimizni savdo va isteʼmol madaniyatiga rioya qilishga chaqirib qolamiz.

Robiya YOʻLDOShEVA.