Erkin faoliyatning ishonchli kafolati

Biroq bu oʻz-oʻzidan boʻlayotgani yoʻq. Bu borada Konstitutsiyamiz mustahkam huquqiy asos boʻlib xizmat qilmoqda, desak, ayni haqiqatni aytgan boʻlamiz. Zero, Asosiy Qonunimizda erkin ishlash va kasb tanlash huquqi, hamma kasb egalari faoliyati erkinligi mustahkam kafolatlangan.
Darhaqiqat, hayotimizda Asosiy Qonunimizning oʻrni beqiyos. Mazkur hujjat zamon bilan hamqadamligi, mukammalligi, xalqimiz dilidagi ezgu gʻoyalarni oʻzida ifoda etganligi bilan har birimiz uchun nihoyatda qadrlidir. Xususan, uning 36-moddasida: "Har bir shaxs mulkdor boʻlishga haqli” deb belgilab qoʻyilganki, bu yurtimizda mulkchilikning barcha shakliga keng oʻrin berilib, mulkdorlar faoliyati davlat himoyasiga olinganidan dalolatdir.
Fermer xoʻjaligimizni 2002 yilda tashkil etgan boʻlsak, oʻtgan davrda yaratib berilgan qulay shart-sharoitlardan unumli foydalanib, muayyan yutuqlarga erishayapmiz. Eng muhimi, mehnatimizning rohatini koʻrayapmiz.
Hozirgi kunda ixtiyorimizda 184,9 gektar yer bor. Bu yerda paxta va gʻalladan moʻl hosil yetishtirishdan tashqari, bogʻdorchilik, sabzavotchilik, asalarichilik, baliqchilik kabi qoʻshimcha tarmoqlarni rivojlantirishga ham katta eʼtibor qaratayapmiz. Daromad esa shunga yarasha boʻlmoqda. Foydaning bir qismini zamonaviy texnikalar sotib olish hamda faoliyatimizni yanada kengaytirishga yoʻnaltirayapmiz.
Xoʻjaligimizda 147 kishi mehnat qiladi. Ularning fidokorona mehnati tufayli oʻtgan yili el dasturxoniga 14 tonna meva, 1,4 tonna baliq va boshqa qishloq xoʻjaligi mahsulotlarini tortiq etgan boʻlsak, bu yil ularning miqdorini yanada koʻpaytirishga harakat qilayapmiz. Gʻalla va paxta xirmonlarimiz ham tobora yuksalib bormoqda.
Joriy yilda, shuningdek, "Qilichboy” ovul fuqarolar yigʻini hududida avtomobillarga texnik xizmat koʻrsatish shoxobchasini ishga tushirib, qoʻshimcha ish oʻrni yaratdik. Shu kunlarda tikuvchilik tsexini ham tashkil etish harakatidamiz. Nasib qilsa, bu loyihamiz roʻyobga chiqqach, kasb-hunar kollejlarini bitirgan oʻnga yaqin chevar qizlarni ish bilan taʼminlaymiz. 
Shu bilan birga, kelgusi yil hosili uchun zamin yaratishni ham eʼtibordan chetda qoldirmayapmiz. Yerni ekin-tikin ishlariga hozirlash va kuzgi bugʻdoy ekish ishlari jadal olib borilmoqda. Bundan koʻzlagan asosiy maqsadimiz yurtimiz ravnaqi, xalqimiz turmush farovonligi oshishiga munosib hissa qoʻshishdan iboratdir.

Otaxon QURBONIYoZOV,
Amudaryo tumanidagi «Amirxon» fermer xoʻjaligi rahbari,
«Shuhrat» medali sohibi.