TIBBIYoT BIRLAShMASIDA SOHADAGI VAZIFALAR IJROSINI TAʼMINLASh BOʻYIChA YIGʻILISh OʻTKAZILDI

Amudaryo tumani Tibbiyot birlashmasida Prezident Shavkat Mirziyoyev rahbarligida shu yil 17-iyun kungi kengaytirilgan tarzda oʻtkazilgan videoselektor yigʻilishida belgilab berilgan vazifalar ijrosini taʼminlash boʻyicha yigʻilish oʻtkazildi.

Oʻzbekiston Respublikasi Sogʻliqni saqlash vaziri oʻrinbosari Elmira Bositxonova ishtirokida oʻtkazilgan mazkur yigʻilishni Birlashma boshligʻi Farhod Abdullayev olib bordi. Unda Beruniy, Toʻrtkoʻl, Ellikqalʼa tumanlari Tibbiyot birlashmalarining Koʻp tarmoqli markaziy poliklinikalari mudirlari, Tibbiyot birlashmalari boshliqlarining Onalik va bolalikni muhofaza qilish boʻyicha oʻrinbosarlari, bosh shifokor oʻrinbosarlari, bosh akusher-ginekologlari va Amudaryo tumanida faoliyat yuritayotgan Koʻp tarmoqli markaziy poliklinika, oilaviy poliklinikalar, Markaziy shifoxona boʻlim mudirlari, tor doiradagi mutaxassislar ishtirok etishdi.

Kun tartibida Oʻzbekiston Respublikasi Prezident Shavkat Mirziyoyev rahbarligida 2022-yil 17-iyun kuni kengaytirilgan tarzda oʻtkazilgan videoselektor yigʻilishida belgilab berilgan vazifalar ijrosini taʼminlash, bu boʻyicha har bir tuman uchun “Yoʻl xaritalari”ni ishlab chiqish va tasdiqlash masalalari koʻrildi.

Kun tartibidagi masala yuzasidan Oʻzbekiston Respublikasi Sogʻliqni saqlash vaziri oʻrinbosari Elmira Bositxonova soʻzga chiqdi. Shuningdek, Prezident rahbarligida oʻtkazilgan videoselektor yigʻilishi bayonnomasida belgilangan bandlar yuzasidan interfaol usulda keng va batafsil tushunchalar berildi. Undan tashqari, onalik va bolalikni muhofaza qilish xizmatini 2022-23-yillarda yanada rivojlantirish chora-tadbirlari dasturini amalga oshirish borasida bajarilishi lozim boʻlgan vazifalarga keng toʻxtalib oʻtildi.

Taʼkidlanganidek, koʻp tarmoqli markaziy poliklinikalarda bolalarni ommaviy skrining qilish va selektiv yoʻllar bilan onkogemotologik kasalliklarni erta aniqlash, Ayollar maslahat xonalari va tugʻruq muassasalari hamda tibbiy brigada doyalari faoliyatini muvofiqlashtirish, tugʻish yoshidagi ayollarning elektron bazasini yaratish, voyaga yetmagan qizlarni erta turmushga berishga toʻliq barham berish eng dolzarb masalalar hisoblanadi.

Shu bilan birga istalmagan homiladorlikning oldini olishga qaratilgan targʻibot ishlarini kuchaytirish, tugʻish yoshidagi ayollar va homiladorlarning bazasini shakllantirish, har bir tuman uchun “Yoʻl xaritalari”ni ishlab chiqish bu boradagi ishlar samaradorligini oshirishda muhim ahamiyat kasb etadi.

Yigʻilish davomida barcha tumanlardan tashrif buyurgan tibbiyot sohasi masʼullari Oʻzbekiston Respublikasi Sogʻliqni saqlash vaziri oʻrinbosari Elmira Bositxonovaga oʻzlarini qiziqtirgan savollar bilan murojaat qildilar va tegishli javoblar oldilar.

Yigʻilish soʻngida barcha tumanlardagi Tibbiyot birlashmalari boshliqlari oʻrinbosarlariga, Onalik va bolalikni muhofaza qilish boʻyicha muovinlarga Oʻzbekiston Respublikasi Prezidenti Shavkat Mirziyoyev rahbarligida shu yil 17-iyun kuni kengaytirilgan tarzda oʻtkazilgan videoselektor yigilishining tegishli bayonida belgilangan tugʻish yoshidagi ayollar va homiladorlarning marshrutini belgilash ishlarini amalga oshirish, har bir hudud uchun “Yoʻl xaritalari”ni ishlab chiqish va tasdiqlatish vazifasi topshirildi.

Jumaboy Yavqashev, tuman TTB shifokori.