“MENING MAHALLAM – MENING SUDYaM” GʻOYaSI OSTIDA SAYYoR QABUL OʻTKAZILDI

Huquqbuzarliklar profilaktikasi, jinoyatchilikka qarshi kurashish, shuningdek fuqarolarning huquqiy masalalari yuzasidan muammolarini tizimli hal etish va aholining huquqiy ongini doimiy oshirib borish yuzasidan barcha hududlarda sud masʼullari tomonidan “Mening mahallam – mening sudyam” gʻoyasi ostida sayyor qabullar va uchrashuvlar oʻtkazilmoqda.

Shu yil 17-avgust kuni Amudaryo tumanida Qoraqalpogʻiston Respublikasi sudi masʼullari ham Mahalla va nuroniylarni qoʻllab-quvvatlash boʻlimi binosida xuddi shunday sayyor qabul, fuqarolar bilan uchrashuv tashkil etishdi. Unda Qoraqalpogʻiston Respublikasi sudi raisi Kamol Tarixov, Respublika Maʼmuriy sudi sudyasi Poʻlat Doshmuradov, Respublika sudi raisning oʻrinbosari, Jinoyat ishlari boʻyicha sudlov hayʼati raisi Abilay Adilov, Respublika sudi raisining oʻrinbosari, Fuqarolik ishlari boʻyicha sudlov hayʼati raisi Abdimurat Kerimbayev, Respublika sudi sudyasi Oʻtkir Sabirov va mutasaddi tashkilot rahbarlari qatnashishdi.

Soʻzga chiqqan masʼullar dastlab sud-huquq sohasida amalga oshirilayotgan islohotlar xususida batafsil maʼlumot berishdi. Shuningdek, sohadagi tub oʻzgarishlar, eng avvalo, mamlakatimizda sud hokimiyatining mustaqilligini taʼminlash, odil sudlov samaradorligini, shu orqali xalqimizning sudlarga boʻlgan qatʼiy ishonchini oshirish va munosabatini oʻzgartirishga qaratilganligini, ularning amaliyotga joriy etilishi bugungi kunda oʻzining ijobiy natijalarini koʻrsatayotganini taʼkidlashdi. Sud-huquq tizimidagi barcha islohotlar sudyalar mustaqilligini taʼminlash, sudning nufuzini oshirish, tizimni demokratlashtirish va takomillashtirishga, fuqarolarning huquq va erkinliklari ishonchli himoya qilinishiga xizmat qilishini eʼtirof etishdi.

Shundan soʻng sud masʼullari sayyor tartibda qabul oʻtkazib, tuman fuqarolarining murojaatlarini qabul qilishdi. Qabulda 31 nafar fuqaro turli murojaatlar bilan ishtirok etdi. Fuqarolardan 5 nafari meros boʻlib qolgan uy-joyiga kadastr hujjat tayyorlash yuzasidan, 4 nafari farzandiga jarrohlik amaliyotini oʻtkazilishiga yordam soʻrab, 5 nafari oʻzining mutaxassisligi boʻyicha ishga joylashish va boshqa masalalar yuzasidan amaliy yordam soʻrab, murojaat qilishdi. Barcha murojaatlar atroflicha oʻrganildi va fuqarolarni qiynab kelayotgan muammolarni bartaraf etish choralari koʻrildi.

Qoraqalpogʻiston Respublikasi sudi raisi tumandagi “Ayollar daftari” roʻyxatiga kiritilgan 7 nafar ayol-qizlarga bugungi kunda davlatimiz tomonidan berilayotgan imtiyoz va yengilliklar xususida maʼlumotlar, huquqiy maslahatlar berib oʻtdi. Shuningdek, ularga sovgʻa-salomlar ham topshirildi.

Tadbir Tosh yop ovulida davom ettirildi hamda Qoraqalpogʻiston Respublikasi sudi raisi, oʻrinbosarlari, Jinoyat ishlari boʻyicha Amudaryo tuman sudi raisi Jasur Oʻrazboyev va Fuqarolik ishlari boʻyicha Amudaryo tuman sudi raisi Xayrulla Atamuradovlar shu hududda yashovchi fuqarolar bilan uchrashishdi.

Uchrashuv davomida fuqarolarning turli xil muammolari eshitilib, ijobiy hal etish choralari koʻrildi. Bundan tashqari, aholining huquqiy madaniyati va savodxonligini oshirish maqsadida ularni qiziqtirgan savollarga javoblar berilib, mamlakatimizda sud-huquq sohasida olib borilayotgan islohotlar toʻgʻrisida maʼlumotlar berildi.

Jasur Oʻrazboyev, Jinoyat ishlari boʻyicha tuman sudi raisi.