MAKTABLARDA BIRINChI QOʻNGʻIROQ JARANGLAB, MUSTAQILLIK DARSLARI OʻTILDI

5-sentyabr kuni mamlakatimiz hududidagi barcha maktablarda “Birinchi qoʻngʻiroq” jaranglab, oʻquv yilining dastlabki kuni boshlandi. Oʻqituvchi va oʻquvchilar hayajon bilan yana jonajon va qutlugʻ dargoh ostonasiga qadam qoʻyishdi.

5-sentyabr kuni tumandagi eng ilgʻor maktablardan biri – 40-sonli umumtaʼlim maktabida ham “Salom, maktabim!” nomli tadbir oʻtkazildi.

Tadbirda tuman hokimi oʻrinbosari Goʻzal Soburova, tuman Ichki ishlar boʻlimining Huquqbuzarliklar profilaktikasi boʻlinmasi inspektori Kumushoy Bekmanova, Doʻstlik mahallasi yoshlar yetakchisi Dilmurod Yodgorov, maktab direktori Sanobar Xoʻjamurodova hamda ota-onalar ishtirok etishdi.

Tadbir davomida maktabning oʻtgan oʻquv yili davomida erishgan yutuqlari, muvaffaqiyatlari sarhisob qilindi. Shuningdek, yangi oʻquv yilidagi yangi maqsadlar, rejalar xususda toʻxtalib oʻtildi.

Taʼkidlanganidek, mamlakatimizda yoshlarga qaratilayotgan eʼtibor bugungi katta muvaffaqiyat va yutuqlarning kaliti boʻlmoqda. Oʻtgan oʻquv yilida maktabni 117 nafar oʻquvchi bitirgan boʻlsa, ulardan 103 nafari oliy taʼlim muassasalariga hujjat topshirishdi. Shularning 67 nafari talabalik baxtiga muyassar boʻldi.

Ushbu bitiruvchilardan 51 nafari davlat oliy taʼlim muassasalari, 16 nafari esa nodavlat va xorijiy taʼlim muassasalariga talabalikka qabul qilindi.

Shuningdek, moliya-iqtisod yoʻnalishi boʻyicha tashkil qilingan variativ sinfda taʼlim olgan 29 nafar bitiruvchidan 28 nafari davlat, 1 nafari nodavlat oliy taʼlim dargohlari talabalari boʻlishdi. Ulardan 10 nafari davlat granti, 19 nafari kontrakt-toʻlov boʻyicha oʻqishga qabul qilindi. Bundan tashqari, 4 nafar bitiruvchilar texnikumlarga hujjat topshirishdi. Qolganlari esa oʻzini-oʻzi band qilib, ish bilan taʼminlandi.

Maktabda ayni paytda 13 nafar oliy toifali, 25 nafar  birinchi toifali oʻqituvchi yoshlarga taʼlim-tarbiya berib kelishmoqda. Oʻqituvchilardan yana 41 nafari oʻz ustida ishlab, navbatdan tashqari attestatsiyada qatnashish niyatida.

Shuningdek, 7 nafar oʻquvchi ingliz tilidan V2, oʻqituvchilardan 5 nafari S1, rus tilidan 4 nafari S1 darajalardagi sertifikatlarga ega  boʻlishgan. Matematika fanidan esa bir nafar oʻqituvchi Qoraqalpogʻistonda birinchilardan boʻlib, fanni bilish darajasi boʻyicha milliy sertifikatni qoʻlga kiritgan. Mazkur oʻquv yilida 8-11-sinf oʻquvchilari uchun 4 yoʻnalishda variativ sinf tashkil etilgan. Birinchi sinfga 151 nafar oʻquvchi qabul qilinib, oʻquvchilar soni 1400 nafardan oshdi.

Shu kuni 56-sonli maktabda ham “Birinchi qoʻngʻiroq” tadbiri oʻtkazildi. Tadbirda Byudjetdan tashqari pensiya jamgʻarmasi boshligʻi Qadam Ismoilov, Durunki mahalla fuqarolar yigʻini raisi Ergashali Bobojonov, maktab direktori Orzigul Xudoyberganova hamda ota-onalar qatnashishdi. Tadbirda soʻzga chiqqanlar barcha ustozlarni, oʻquvchilarni maktab ostonasiga ilk qadamini qoʻygan 1-sinf oʻquvchilarini yangi oʻquv yili bilan qutladilar.

Maktab direktori oʻtgan oʻquv yilida amalga oshirilgan ishlar, erishilgan yutuqlarni tilga olib, yangi oʻquv yilida ham barchaga muvaffaqiyat va yangi marralar, zafarlar tiladi.

Oʻtgan oʻquv yilida maktabni 58 nafar oʻquvchi bitirgan boʻlsa, shundan 53 nafari oliy taʼlim muassasalariga hujjat topshirishdi. Ushbu bitiruvchilardan 30 nafari oliy taʼlim dargohlari talabalari boʻlishdi. Maktabda tashkil qilingan variativ sinfdagi 26 nafar bitiruvchidan esa 22 nafari talabalikka qabul qilinishdi. Natijada maktabning oʻquvchilarni oliy taʼlimga qamrab olish boʻyicha koʻrsatkichi 84 foizdan oshdi.

Joriy oʻquv yilida yana 71 nafar oʻquvchi qabul qilinib, oʻquvchilar soni 546 nafarga yetdi. Ayni paytda ularga 55 nafar oliy maʼlumotli, bilimli va tajribali oʻqituvchilar taʼlim-tarbiya berishmoqda.

Yangi oʻquv yili boshlanishi munosabati bilan oʻtkazilgan “Birinchi qoʻngʻiroq” tadbirida 1-sinfga qabul qilingan bolajonlarga Prezident sovgʻalari – maktab sumkasi va 12 turdagi predmetdan iborat darsliklar, oʻquv qurollari topshirildi. Tadbir davomida oʻquvchi-yoshlar tomonidan tayyorlangan Vatanni madh etuvchi sheʼr va qoʻshiqlardan iborat bayram dasturi namoyish etildi.

Xuddi shunday tadbir tumandagi 38-sonli kimyo-biologiya fanlariga ixtisoslashtirilgan davlat umumtaʼlim maktabida ham boʻlib oʻtdi.

“Yangi Oʻzbekistonda el aziz, inson aziz” shiori ostida oʻtkazilgan mazkur tadbirda Boʻston mahalla fuqarolar yigʻini raisi Yangiboy Hayitboyev, tuman Ichki ishlar boʻlimi Huquqbuzarliklar profilaktikasi boʻlinmasi inspektori Davronbek Karimov, maktab direktori Bahrom Boltaboyev hamda ota-onalar ishtirok etishdi.

Tadbirda soʻzga chiqqanlar oʻquvchilarni yangi oʻquv yili boshlanganligi bilan tabriklab, ularni barkamol avlod boʻlib voyaga yetishlari, maʼnaviy-ahloqiy va jismonan sogʻlom boʻlishlari, olib borilayotgan islohotlarning faol ishtirokchisiga aylanishlari uchun barcha shart-sharoitlar yaratilganligini qayd etib oʻtdi. 

Oʻtgan oʻquv yilida maktabni 44 nafar oʻquvchi bitirgan boʻlsa, shundan 33 nafari oliy taʼlim maskanlariga hujjat topshirib, 7 nafari talabalar safiga qabul qilinishdi va maktabning oliy taʼlimga qamrab olish boʻyicha koʻrsatkichi 61 foizga yetkazildi. Mazkur oʻquv yilida maktabning 1-sinfiga 76 nafar oʻquvchi qabul qilinib, jami oʻquvchilar soni 680 nafarga yetdi. Ularga 70 nafardan ziyod malakali oʻqituvchilar taʼlim-tarbiya berib kelshmoqda.

Tadbir davomida 1-sinf oʻquvchilariga Prezident sovgʻalari topshirildi va maktab uzra davlat madhiyasi jaranglab, har bir oʻgʻil-qizni oʻqishga, ilm choʻqqilarini zabt etishga va yangi maqsadlar sari dadil intilishga undadi.

Shundan soʻng, barcha sinflarda mustaqillik darslari boshlandi. Mustaqillik darslarida oʻquvchilarga xalqimizning 31-yil davomida erishgan yutuqlari, Prezidentimiz va Hukumatimiz tomonidan amalga oshirilayotgan islohotlarning mazmun-mohiyati borasida keng maʼlumotlar berildi.

Shuningdek, keyingi yillarda milliy taʼlim tizimidagi oʻzgarishlar misli koʻrilmagan mazmun kasb etayotgani eʼtirof etilib, bu jihatlar maktab taʼlimidagi milliy oʻquv dasturlarini yaratish va ularni oʻquv jarayoniga tatbiq etish, pedagoglar uchun milliy va xalqaro sertifikatlarni joriy etish, bitiruvchilarni oliy taʼlim dargohlariga qamrab olish koʻrsatkichlarining oshishi kabilarda yaqqol namoyon boʻlayotgani taʼkidlab oʻtildi.

O.Xudoyberganova.