“UMID NIHOLLARI - 2022” SPORT MUSOBAQASI GʻOLIBLARI MUNOSIB TAQDIRLANDI

Yoshlarning sportga boʻlgan havas va intilishlarini oshirish, ularni ommaviy sportga jalb etish orqali sogʻlom turmush koʻnikmalarini shakllantirish, umidli sportchilarni tanlab olish va ularning mahorat koʻnikmalarini rivojlantirish maqsadida umumtaʼlim maktab oʻquvchilari oʻrtasida har yili “Umid nihollari” sport musobaqalarini oʻtkazish yaxshi anʼanaga aylandi. “Umid nihollari – 2022” sport musobaqalari Amudaryo tumanida ham zoʻr uyushqoqlik bilan oʻtkazildi.

Uch bosqichli “Umid nihollari – 2022” sport musobaqasining Qoraqalpogʻiston Respublikasi final bosqichida amudaryolik oʻquvchi-yoshlar sportning basketbol, gandbol, gimnastika, yengil atletika, kurash, shaxmat turlari boʻyicha ishtirok etishib, yuqori natijalarni qoʻlga kiritdilar.

Xususan, sportning basketbol turi boʻyicha 33- va 52-sonli maktablar terma jamoalari oʻsmirlar oʻrtasida faxrli 1-oʻrinni, 19-, 33-, 53-maktablarning qizlar terma jamoalari 3-oʻrinni egallashdi. Sportning gandbol turi boʻyicha boʻlib oʻtgan musobaqalarda 41-maktab qizlar jamoasi 2-oʻrin sohibi boʻldilar.

Shuningdek, 20-sonli maktabning gimnastikachi qizlari Dilnura Davlatboyeva hamda Barchinoy Baxtiyorovalar musobaqaning 3-pogʻonasidan joy oldilar.

Sportning yengil atletika turi boʻyicha boʻlib oʻtgan qizgʻin baholarda 100 metrga yugurishda oʻsmirlar oʻrtasida 1-maktab oʻquvchisi Sardor Rahimov 1-oʻrinni, 200 va 400 metrga yugurishda 19-maktab oʻquvchisi Gulbonu Oʻrinboyeva 2-, va 3-oʻrinlarni, 800 metrlik masofada 35-maktab oʻquvchisi Dinora Matyoqubova, uzunlikka sakrash boʻyicha musobaqalarda 50-maktab oʻquvchisi Dilfuza Mamurodovalar 2-oʻrinlarni egallashdi.

Shuningdek, estafetali yugurish va kurash boʻyicha musobaqalarda ham amudaryolik oʻquvchi-yoshlar yuqori natijalarga erishdilar.

Sportning shaxmat turi boʻyicha musobaqalar yanada qiziqarli va taassurotlarga boy boʻldi. Unda 15 yoshgacha boʻlgan qizlar oʻrtasida 56-maktab oʻquvchisi Umida Toʻliboyeva 2-oʻrin sohibasi boʻldi. 13 yoshgacha boʻlgan qizlar oʻrtasida 69-sonli maktab oʻquvchisi Xolida Otajonova 3-oʻrinni, 17 yoshgacha boʻlgan oʻsmirlar oʻrtasida 46-maktab oʻquvchisi Azizbek Rajabov faxrli 2-oʻrinni egalladilar.

Mazkur final musobaqalarda gʻolib va sovrindor boʻlgan har bir yosh sportchiga sport liboslari jamlanmasi, 1-oʻringa noutbuk, 2-oʻringa televizor va 3-oʻringa velosiped sovgʻa qilindi.

Sportning shaxmat turi boʻyicha 13 yoshgacha boʻlgan oʻsmir qizlar oʻrtasida 3-oʻrinni egallagan 69-sonli maktab oʻquvchisi Xolidaxon Otajonovaning sportdagi bu yutugʻi nafaqat oila aʼzolari, balki 69-sonli maktab pedagogika jamoasi, ustozlari va maktabdoshlariga ham cheksiz quvonch bagʻishladi.

Maktabda oʻtkazilgan gʻolib sportchini taqdirlash marosimida yosh sportchining ustozlari, maktabdosh doʻstlari soʻzga chiqishib, mamlakatimizda, qolaversa, tumanimizda bolalar sportini, rivojlantirish borasida amalga oshirilayotgan keng koʻlamli islohotlar haqida mamnuniyat bilan soʻz yuritdilar.

Ayni paytda 69-sonli umumtaʼlim maktabida oʻquvchi-yoshlarning ilm asoslarini chuqur oʻzlashtirishlari, oʻzlari xohlagan fan yoʻnalishlari boʻyicha qoʻshimcha dars-mashgʻulotlarida ishtirok etishlari, sportning olimpiada turlari boʻyicha shugʻullanishlari uchun zarur sharoit-sharoitlar yaratilib, toʻgaraklar faoliyati yoʻlga qoʻyilganini, bu esa taʼlim-tarbiya sohasida yuqori natijalarga erishish uchun zarur imkoniyat ekanligini taʼkidladilar. Oʻz navbatida yosh shaxmatchi Xolidaxon Otajonovaga kelajakda kuchli shaxmatchi boʻlib yetishishida yutuqlar tiladilar.

Taqdirlash marosimida Xolida Otajonovaga gʻoliblik Diplomi, sport formasi jamlanmasi va velosiped topshirildi.

Shuni alohida qayd etish kerakki, “Umid nihollari – 2022” sport musobaqalarida sovrindor boʻlgan oʻquvchilarga taʼlim berayotgan 7 nafar jismoniy tarbiya fani oʻqituvchilariga ham sport libosi jamlanmasi va sport sumkasi sovgʻa qilindi. Quvonchlisi shundaki, “Umid nihollari-2022” sport musobaqasining Qoraqalpogʻiston final bosqichida amudaryolik sportchi-oʻquvchilar 14 ta oltin, 21 ta kumush va 20 ta bronza medal, jami 55 ta medal bilan umumjamoa hisobida faxrli 2-oʻrinni egalladilar.

Robiya YOʻLDOShEVA.