“ERMANOV OʻROZBOY” FERMER XOʻJALIGIDA YIGʻIM-TERIM AVJIDA

Shu kunlarda yurtimizning barcha hududlarida paxta yigʻim-terimi avj pallaga kirgan. Yigʻim-terim jarayonlarida fermer xoʻjaliklari va klaster korxonalari ishchi-xizmatchilari bilan birga qoʻshimcha daromad topish istagidagi ish bilan band boʻlmagan mehnatga layoqatli aholi ham ixtiyoriy ravishda faol ishtirok etib, paxta xirmonlari yuksalishiga munosib hissa qoʻshishmoqda.

Amudaryo tumanidagi Oʻrta qalʼa ovulidagi Gulimbat Ahmedov raislik qilayotgan “Ermanov Oʻrozboy” fermer xoʻjaligida ham 110 gektar yerga mahalliy iqlimga mos, serhosil “Sulton” navli chigit ekilib, astoydil parvarish qilindi. Paxta dalalarida 62 nafar ishchi va pudratchilarning bahor-yoz oylari davomida qilgan tinimsiz va mashaqqatli mehnatlari evaziga moʻl koʻsak yetishtirilib, hosildorlik gektaridan 32 tsentnerga yetkazildi.

Hozirgi kunda terimchilarning gʻayrati bilan kuniga 10-12 tonna paxta terib topshirilmoqda. Mavsum davomida rejada belgilangan 367 tonnalik paxta xirmonini bunyod etishni oʻz oldilariga maqsad qilgan xoʻjalik pudratchilari va koʻngilli terimchilar, ayni kungacha 240 tonnadan ortiq “oq oltin” terib ulgurishdi.

“Ermanov Oʻrozboy” fermer xoʻjaligi hisobida 172 gektar yer maydoni mavjud. Koʻp tarmoqliga aylantirilgan ushbu xoʻjalik yer maydonlarining 110 gektariga paxta ekilgan boʻlsa, 31 gektarida shu kunlarda unib chiqqan bugʻdoy parvarish qilinmoqda. Qolgan qismida esa chorva uchun ozuqabop, sabzavot, poliz ekinlari yetishtiriladi. Xoʻjalikda asalarichilik, chorvachilik va baliqchilik yoʻnalishlari ham tashkil qilingan boʻlib, ayni paytda asalarilar oilasi 32 taga, chorva mollari 15 taga yetdi. Hududda tashkil qilingan koʻlda esa yiliga 4-5 tonna baliq yetishtiriladi.

Fermer xoʻjaligida ikkilamchi ekin ekish ishlariga ham alohida eʼtibor qaratiladi. Jumladan, gʻalladan boʻshagan maydonga kartoshka, sabzavot, dukkakli va ozuqabop ekinlar ekiladi. Turli mevali daraxtlar yetishtirilgan mevazor bogʻda ham hosil toʻkin. Bu esa qoʻshimcha daromad olish imkonini bermoqda.

Paxta hosilini nest-nobud qilmasdan yigʻib olish muhim masalalardan biri hisoblanadi. Buning uchun hududlardagi kabi tumanimizda ham jiddiy tayyorgarlik koʻrildi va paxta terimiga sentyabr oyi boshlaridanoq qizgʻin kirishildi. Joriy yilda qoʻlda terilgan paxtaning har bir kilogrammi uchun birinchi terimda 1500 soʻmdan, ikkinchi terimda 1800 soʻmdan kam boʻlmagan miqdorda haq toʻlanishi belgilangani esa terim surʼatini oshirishda asosiy omil boʻlib xizmat qilmoqda.

Yigʻim-terim tobora qizgʻin tusga kirayotgan ayni paytda dala mehnatkashlari uchun qulay ish va dam olish sharoiti yaratilgani “Ermanov Oʻrozboy” fermer xoʻjaligi terimchilariga ham gʻanimat kunlardan unumli foydalanishda muhim ahamiyat kasb etmoqda.

Terimchi, ishchi va hasharchilarga har kuni tushlik mahali issiq ovqat, choy beriladi. Terim pullarining oʻz vaqtida berib borilayotgani, ilgʻor terimchilarga ragʻbat sifatida taqdim etilayotgan turli sovgʻalar ularning gʻayratiga gʻayrat qoʻshmoqda. Xoʻjalik ishchilari daladagi moʻl hosilni qoldirmasdan terib, belgilangan rejadan ziyod paxta topshirish, koʻproq daromad topish maqsadida yanada jadal harakat qilishmoqda.

Yurtimizda paxta xirmonining yuksalishiga hissa qoʻshish oilaga foyda, roʻzgʻorga baraka keltiradigan daromad manbaiga aylanib bormoqda. Paxta yigʻim-terimida faol ishtirok etib, turli sovgʻalarga ega boʻlayotgan, mablagʻ topib, roʻzgʻoriga baraka kiritayotgan terimchilar buni oʻz hayotlarida yaqqol his etishmoqda.

Ozoda Xudoyberganova.