Deputatlar jamiyat hayotida faol ishtirok etishmoqda

Ayni kunlarda butun mamlakatimiz boʻylab paxta yigʻim-terimi qizgʻin davom etmoqda. Mavsum davomida terimchilar astoyidil mehnat qilib, oilaviy byudjetiga hamda yurtimiz iqtisodiyoti rivojiga oʻz hissalarini qoʻshib kelmoqdalar.

Paxta mavsumi davomida majburiy mehnatga va bolalar mehnatiga yoʻl qoʻymaslik, terimchilar uchun qulay shart-sharoitlar yaratilishiga alohida ahamiyat berilmoqda. Har kuni terimchilar uchun dala boshida issiq ovqat va choy tashkil etilib, terim pullari oʻz vaqtida berib borilmoqda. Shuningdek, ilgʻor terimchilar sektor rahbarlari, masʼuliyati cheklangan jamiyat shaklidagi “Amudaryotex” xorijiy korxonasi masʼullari tomonidan ragʻbatlantirilmoqda.

Kuzning goh issiq, goh sovuq ob-havosiga qaramasdan mehnat qilayotgan terimchilarga yordam berish maqsadida koʻngilli ravishda deputatlar, korxona-tashkilot masʼullari ham hasharlar tashkil etishmoqda.

Mana shunday hasharlarning yana biri 7-oktyabr kuni Amudaryo tumanining Choykoʻl ovuli hududida joylashgan Arslan Maxsudov rahbarlik qilayotgan fermer xoʻjaligining paxta dalalarida boʻlib oʻtdi.

Hasharda tumandan saylangan Qoraqalpogʻiston Respublikasi Joʻqorgʻi Kengesi deputatlari, Xalq deputatlari tuman Kengashi deputatlari, siyosiy partiyalarning tuman Kengashi rahbarlari ishtirok etishdi.

Dalalarda oppoq boʻlib ochilgan paxtani terishning ham oʻzgacha zavqi bor. Paxta qut-baraka ramzi, moʻl daromad manbaidir. Buni chuqur anglagan yurtdoshlarimiz bugun dalaga oshiqishmoqda, peshona teri bilan “oq oltin” xirmonlarining yuksalishiga munosib hissa qoʻshishmoqda.

Shu kuni Qoraqalpogʻiston Respublikasida xizmat koʻrsatgan madaniyat xodimi Xonimjon Rajabova, Qoraqalpogʻiston Respublikasi Joʻqorgʻi Kengesi deputati Sanobar Xoʻjamuratova hamda tuman Mahalla va nuroniylarni qoʻllab-quvvatlash boʻlimi qoshida tashkil etilgan “Buvijonlar maktabi”, tuman Oila va xotin-qizlar boʻlimi qoshida tashkil etilgan “Oqila ayollar” harakati aʼzolari Xizir eli mahallasi hududida joylashgan 46-sonli umumiy oʻrta taʼlim maktabining 10-11-sinf oʻquvchi qizlari bilan uchrashib, davra suhbati tashkil etishdi.

Davra suhbatida tuman “Barkamol avlod” bolalar maktabi direktori Xonimjon Rajabova qizlarni uy-roʻzgʻor ishlariga oʻrgatish, qizlarning ota-ona, aka-uka oldidagi vazifalari qanday boʻlishi lozimligi haqida oʻz nasihatlarini berib oʻtdi.

Qoraqalpogʻiston Respublikasi Joʻqorgʻi Kengesi deputati Sanobar Xoʻjamuratova esa Oʻzbekiston Respublikasi Prezidentining 2022-yil 31-avgust kungi “Qoraqalpogʻiston Respublikasida tadbirkorlik, innovatsion texnalogiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari” toʻgʻrisidagi farmonining mazmun-mohiyatini batafsil tushuntirib berdi.

Davra suhbati davomida soʻzga chiqqanlar buguni kunda yoshlar uchun yaratilayotgan imkoniyatlar, shart-sharoitlar haqida gapirib, yoshlarni yanada shijoat bilan bilim olishga, olgʻa intilishga undashdi.

 Shuningdek, qizlarga vaqtdan unumli foydalanib, kasb-hunar egallash, Oliy oʻquv yurtlariga kirish uchun astoyidil harakat qilishlari lozimligi aytib oʻtildi. Davra suhbati davomida oʻquvchi qizlar soʻzga chiqib, uchrashuvdan olgan taassurotlari haqida gapirdilar.

Shundan soʻng, masʼullar Xizir eli mahallasida uzoq yillar davomida yosh avlodga taʼlim va tarbiya berib nafaqaga chiqqan 5 nafar oʻqituvchining holidan xabar olishdi. Ularga esdalik sovgʻalarini topshirishdi.

Yaqindagina nishonlangan Oʻqituvchi va murabbiylar kuni bayrami munosabati bilan “Keksalar haftaligi” doirasida oʻtkazilgan mazkur uchrashuvlar taʼlim faxriylariga katta quvonch bagʻishladi. Mehmonlar faxriy oʻqituvchilarning uzoq yillar davomida qilgan mehnatlarini eʼtirof etib, bugun ham yosh avlod tarbiyasida ularning pandu nasihatlari, hayotiy yoʻl-yoʻriqlari muhim ahamiyat kasb etishini taʼkidladilar.

Shuningdek, masʼullar Rajabov Omon fermer xoʻjaligining paxta dalalarida mehnat qilayotgan ilgʻor terimchilar bilan ham uchrashib, ularga yaratilgan shart-sharoitlar bilan tanishdi.

Mazkur hududdan saylangan Qoraqalpogʻiston Respublikasi Joʻqorgʻi Kengesi deputati Sanobar Xoʻjamurodova terimchilar bilan muloqot qilib, yurtimizda qishloq xoʻjaligiga bozor mexanizmlarining joriy qilingani, paxta-toʻqimachilik klasterlarini tashkil qilish orqali fermerlarning manfaatdorligi oshgani, terim pullarining koʻpayganini taʼkidlab oʻtdi. Natijada majburiy mehnat, ayniqsa bolalar mehnatining har qanday shakllariga barham berilib, aholi moddiy manfaatdorlik uchun paxta yigʻim-terimida ishtirok etayogani eʼtirof etildi.

Deputatlar dala boshida terimchilarga issiq ovqat va choy tashkil etilib, terim pullari oʻz vaqtida hisob-kitob qilinayotganligining guvohi boʻldilar hamda ilgʻor terimchlarga esdalik sovgʻalarini topshirdilar.

Tuman hokimligining Axborot xizmati.