BOBUR NOMLI OVULIDAGI OILAVIY POLIKLINIKA AHOLIGA SIFATLI TIBBIY XIZMAT KOʻRSATIB KELMOQDA

Yurtimizda aholiga malakali tibbiy xizmat koʻrsatilishini taʼminlash maqsadida kam samarali qishloq vrachlik punktlari maqbullashtirilib, ularning negizida qishloq oilaviy poliklinikalari tashkil etilgan edi. Ayni paytda ulardagi kunduzgi statsionarlarda bemorlarga pediatr, terapevt, akusher-ginekolog, stomatolog, jarroh kabi tor soha mutaxassislari xizmat koʻrsatishi yoʻlga qoʻyilgan.

Salomatlikni mustahkamlash, har tomonlama sogʻlom va barkamol avlodni voyaga yetkazish, xalqimiz turmush farovonligini yanada yuksaltirish yoʻlida zamonaviy sharoit yaratishga qaratilayotgan bu kabi alohida eʼtibor odamlarning hayotdan rozi boʻlib yashashida, ertangi kunga ishonchi yanada ortishida muhim ahamiyat kasb etmoqda.

Amudaryo tumanidagi Bobur nomli ovulda joylashgan 4-sonli oilaviy poliklinikada ham tibbiy xizmat koʻrsatish sifatini yanada yaxshilash maqsadida aniq tadbirlar belgilab olingan boʻlib, ularning ijrosi toʻliq taʼminlanmoqda. Tuman tibbiyot birlashmasiga qarashli ushbu oilaviy poliklinkada koʻrsatilayotgan tibbiy xizmatdan hudud aholisi juda mamnun.

Mazkur tibbiyot maskanida hududdagi 10 ming 891 nafar aholiga xizmat koʻrsatiladi. Shundan 5 ming 529 nafarini erkaklar, 5 ming 362 nafarini ayollar, 3 ming 378 nafarini 14 yoshgacha boʻlganlar, 576 nafarini 15-17 yoshgacha boʻlganlar, 6932 nafarni esa 18 yoshdan kattalar tashkil qiladi. Shuningdek, 1 yoshgacha boʻlgan bolalar 240 nafar, tugʻish yoshidagi ayollar 2 ming 781 nafardan iborat. Oilaviy poliklinika hududida 7 ta maktab, 4 ta davlat va 1 ta nodavlat maktabgacha taʼlim muassasalari mavjud.

Muassasadagi tibbiy xizmatlardan Bobur nomli ovul aholisidan tashqari, Jumurovul mahallasi va Jumurtov shaharchasi fuqarolari ham foydalanadi. Hududdagi 1 ming 960 ta xonadonga 6 nafar umumiy amaliyot shifokori va 30 nafar oʻrta tibbiyot xodimi, shundan 17 nafari patronaj hamshiralari biriktirilgan.

Oilaviy poliklinikada shifokor va patronaj hamshiralar oʻzlariga biriktirilgan hududlardagi oilalar tibbiy-ijtimoiy holatini oʻrganish borasida ham tegishli chora-tadbirlarni amalga oshirishmoqda. Ayrim hollarda bemorlarni uyida koʻrikdan oʻtkazish va zarur muolajalarni amalga oshirish, emlash orqali turli yuqumli kasalliklarning oldini olish ishlari yoʻlga qoʻyilgan.

Hududda roʻyxatga olingan fertil yoshidagi ayollar salomatligi ham doimiy nazoratda. Oʻtgan 2021-yilning 9 oyi davomida hududda 174 nafar, joriy 2022-yilning 9 oyi davomida esa 170 nafar chaqaloq tugʻilishi qayd etildi. Joriy yilning 9 oyda roʻyxatga olingan 234 nafar homilador ayollarga Vazirlar Mahkamasining “Respublikaning qishloq tumanlarida onalar va bolalarning reproduktiv salomatligini mustahkamlashga doir qoʻshimcha chora-tadbirlar toʻgʻrisida”gi qarori ijrosini taʼminlash maqsadida polivitamin, vitamin komplekslari berilib borilmoqda. Hisobdagi ayollarning 17 nafari respublika Skrining markazida toʻliq tekshiruvdan oʻtishga yuborildi. Shuningdek, hududdagi 70 yoshdan katta boʻlgan 285 nafar qariyalarga kaltsiy D3 preparatlari tarqatildi.

Poliklinikada birlamchi tibbiy yordam koʻrsatish, tashxis qoʻyish, laboratoriya, sogʻlomlashtirish muolajalarini amalga oshirish xonalari ishlab turibdi. Ayniqsa, tor doiradagi mutaxassislarning faoliyat koʻrsatayotgani aholiga koʻplab qulayliklar yaratmoqda.

Tuman markazidan olisda joylashgan hududdagi ushbu maskan tibbiyot xodimlarining samarali faoliyati va bu yerda yaratilgan zamonaviy sharoitlar aholiga sifatli tibbiy xizmat koʻrsatish va salomatligini yanada yaxshilash, yuqumli kasalliklar boʻyicha barqaror holatni saqlash hamda bolalar oʻrtasida kasallikka chalinish holatlarini kamaytirish imkonini bermoqda. Tibbiy koʻrik va maslahat uchun tuman markaziga qatnashlariga hojat qolmagani, uzogʻi yaqin boʻlganidan, shu yerning oʻzida sifatli tibbiy xizmatdan foydalanish imkoniyati yaratilgandan Bobur nomli ovul aholisi juda mamnun.

O.Xudoyberganova.