TIBBIYoTDAGI ISLOHOTLAR INSON QADRINI ULUGʻLAShGA XIZMAT QILMOQDA

Prezidentimiz joriy yil 18-mart kungi sogʻliqni saqlash sohasi vakillari bilan oʻtkazgan “Tibbiyotdagi islohotlar – inson qadri uchun” mavzusidagi ochiq muloqotida aholi sogʻligʻini saqlash, tibbiy xizmat sifatini yaxshilash boʻyicha koʻpgina vazifalar belgilangan edi.

Ushbu topshiriqlar ijrosini taʼminlash maqsadida qabul qilingan “Birlamchi tibbiy-sanitariya yordamini aholiga yaqinlashtirish va tibbiy xizmatlar samaradorligini oshirish boʻyicha qoʻshimcha chora-tadbirlar toʻgʻrisida”gi Prezident qarorida birlamchi tibbiy-sanitariya yordami muassasalaridan uzoq masofada joylashgan mahallalarda konteyner mahalla tibbiyot punktlarini tashkil etish belgilangan edi.

Qaror ijrosini yuzasidan Amudaryo tumanida ham amaliy saʼy-harakatlar olib borilmoqda. Shu kungacha tumanimizda 11 ta konteyner tipidagi mahalla tibbiyot punktlari, ularda faoliyat yurituvchi tibbiy brigadalar tashkil etildi.

Bogʻ mahallasidagi mahalla tibbiyot punkti ayni kunda 2005 nafar aholiga tibbiy xizmat koʻrsatmoqda. Umumiy amaliyot shifokori Gulbahor Toʻrayeva rahbarlik qilayotgan mahalla tibbiyot punkti tibbiy brigadasida Malika Abdullayeva, Mehribon Norboyevalar hamshira, Umida Sobirova esa doya boʻlib mehnat qilishadi.

Hududda 555 nafar tugʻish yoshidagi ayollardan, 37 nafar turli yoshdagi nogironligi boʻlgan fuqarolardan, bolalar ahvolidan xabar olish, zarurat tugʻilganlarini statsionar davolanishga jalb etish, nuroniylar, keksayib, erkin harakat qila olmay qolganlarning sogʻligʻini nazorat qilish ularning zimmasida.

Shuningdek, aholi turli guruhlari orasida sogʻlom hayot kechirish afzalliklarini targʻib etish, sogʻlom avlodni tarbiyalash, kasalliklar profilaktikasi boʻyicha ommaviy va induvidual targʻibot tadbirlarini olib borish, profilaktik immunoprofilaktik, diagnostik va davolash muolajalarini amalga oshirish kabi tibbiy xizmatlar uchun endi Bogʻ mahallasi aholisida necha chaqirim yoʻl bosib, Mangʻitga qatnab yurmaydigan boʻldi. Mahalla tibbiyot punkti tibbiy brigadasi aʼzolari chaqiruvga binoan uylariga borib ham koʻrikdan oʻtkazayotgani, zarur hollarda muolaja qilib, kerakli dori-darmonlarni berayotgani aholining orzulari roʻyobi boʻlayotir.

Mahallada sogʻlom turmush barqaror boʻlishida mahalla fuqarolar yigʻini masʼullari, profilaktika inspektori hamkorligi yoʻlga qoʻyilgani kutilgan samarani berayapti.

Mahallada istiqomat qiluvchi 1993-yilda tugʻilgan Muhayyo Adamova bir hafta muqaddam jarrohliq operatsiyasini boshidan oʻtkazdi.

Uni endilikda nafas yetishmovchiligi, umumiy holsizlik va badanining kesilgan joylarida surunkali ogʻriq bezvota qilayotgani uchun tibbiyot punktiga koʻrikka keldi. Oliy toifali, malakali shifokor Gulbahor Toʻrayeva uni sinchiklab tekshirib, davo muolajalarini buyurib, zurar dorilar berdi va ularni qay tarzda qabul qilish yoʻl-yoʻriqlarini tushuntirdi. Qon bosimi oshishidan shikoyat qilib kelgan fuqaroga ham zarur dori-darmonlar punkt hisobidan bepul berildi.

Tibbiyot punkti faoliyatini kuzatgan kishi bu yerga tashrif buyurayotganlar yoʻl bosib tuman markaziga borib yurmay, oʻz hududlarida malakali tibbiy xizmatdan foydalanayotganliklaridan mamnun boʻlib ketayotganiga guvoh boʻladi. Bu esa tibbiyotdagi islohotlar inson qadri uchun ekanligining amaldagi ifodasidir.

Oygul RAJABOVA.