OʻZ KELAJAGIM UChUN OVOZ BERAMAN!

Men 32-umumtaʼlim maktabini tugatib, uzluksiz taʼlimning keyingi bosqichini 3-sonli Amudaryo akademik litseyining aniq fanlar yoʻnalishida davom ettirdim.

Ustozlarimizning oʻquvchilarga bilim asoslarini chuqur oʻrgatishga intilishi, oʻquvchilarning toʻlaqonli bilim olishi uchun yaratilgan imkoniyatlar, oʻz bilimlarini boyitishi, oʻqib-oʻrganishi uchun yaratilgan sharoitlardan unumli foydalanishga intildim. Natijada Nukus Davlat Pedagogika institutining matematika fakultetiga talabalikka qabul qilindim. Hozir 3-kursda taʼlim olayapman.

Shu oʻrinda mamlakatimizda oʻsib kelayotgan yosh avlodning komil insonlar boʻlib voyaga yetishi, oʻqib, malakali kadrlar boʻlib yetishishi uchun qilinayotgan gʻamxoʻrliklar har bir talaba-yoshni ilm sirlarini puxta egallab, gʻamxoʻrliklarga munosib insonlar boʻlishga undab turishini aytmogʻim joiz.

Joriy yil men uchun esda qolarli voqealarga boy yil boʻldi. Mamlakatimizda muhim siyosiy voqea - Oʻzbekiston Respublikasi Oliy Majlisi Qonunchilik palatasiga, viloyat, tuman va shahar Kengashlariga saylovlar boʻlib oʻtadigan 21 dekabr kunini esa hayajon bilan kutayapman. Boisi, men ilk bor saylovlarda qatnashaman va ovoz beraman. Buning uchun saylovlarga doir bilimlarimni boyitib, konstitutsion burchimni chuqur anglab yetdim. Asosiy Qonunimizda taʼkidlanganiday, Oʻzbekiston Respublikasining fuqarolari davlat hokimiyati vakillik organlariga saylash va saylanish huquqiga egadirlar. Har bir saylovchi bir ovozga ega. Ovoz berish huquqi, oʻz xohish irodasini bildirish tengligi va erkinligi qonun bilan kafolatlangani menga, barcha tengdoshlarimga faxr-iftixor bagʻishlamoqda.

Men saylovlarda eng munosib nomzodlar uchun ovoz beraman.

Asal Sobirova, NDPIning 3-kurs talabasi.

Foto: http://www.uza.uz