SANʼAT OShUFTASI

Inson zoti har qanday musiqiy ohangni befarq tinglay olmaydi. Prima rubobida Ulugʻbek Toʻliboyev ijrosidagi goh sokin, goh mahzun, goh shiddatli kuyni tinglash barobarida qalbingizda oʻzgacha tuygʻular uygʻonadi, uning hayotga intilishi, yaratishga ishtiyoqi kuchliligi sabab, taqdir sinovlariga boʻyin egmay, hayotda munosib oʻrnini topishga intilayotganini his qilasiz. Uning oʻzi ham rubob torlari uzra barmoqlarining harakatlaridan yaralayotgan ohanglarga shoʻngʻib ketayotganday tuyuladi tinglovchiga.

Imkoniyati cheklangan, yaʼni koʻzi ojiz boʻlsa-da, uyida oʻtirib oʻqishni, taqdirga tan berib, qiziqishlaridan kechishni istamadi. Bu yigit Mangʻit shahrining Durunki mahallasida istiqomat qiladi. Hududdagi 36-sonli maktabni tugatgan. Maktabda oʻqish davrida 9-sonli Bolalar musiqa va sanʼat maktabida oʻz qiziqishlariga koʻra, rubob sinfida rahmatlik Ahmad Xudoyberganovdan saboqlar olgan.

Musiqa maktabida soz chalishni oʻrganish bilan cheklanmay, taniqli xonanda, maktabning puflab chalinadigan asboblar sinfi oʻqituvchisi Anvar Xudoyberganovdan anʼanaviy xonandalik yoʻnalishi boʻyicha ham saboqlar oldi. Sanʼatkor unga ixlosiga koʻra, sinfdan tashqari anʼanaviy, mumtoz ashulalarni ijro etish mahoratini oʻrgatdi.

Musiqa maktabini tugatganidan soʻng Ulugʻbek Japaq Shomurodov  nomidagi Nukus madaniyat va sanʼat kollejiga oʻqishga kirdi va muvaffiyatli tugatdi. Bir necha  yillar tuman Koʻzi ojizlar jamiyatining ishlab chiqarish tsexida ishladi. Biroq sanʼatga qiziqishi uni sanʼatkorlar davrasiga chorlayverdi. Hozir “Uchqun” ashula va raqs xalq ansambli aʼzosi. Ansambl badiiy rahbari Anvar Xudoyberganov koʻmagida qoʻshiqlar oʻrganib, xalqimiz eʼtiboriga havola etayapti.

– U yaqindagina tumanimiz sanʼati dargʻalaridan biri, Qoraqalpogʻistonda xizmat koʻrsatgan artist, el dilida qoʻshiqlari bilan yashayotgan hofiz Nazir Rahimov xotirasiga bagʻishlab oʻtkazilgan adabiy kechada marhum ustozning qoʻshiqlaridan ijro etib, olqishlarga sazovor boʻldi, – deydi tuman Madaniyat boʻlimi xodimi O.Begimov.

Ayni kunda ustozlik qilib, qoʻshiqlarni maromiga yetkazib ijro etishni oʻrgatayotgan ustozi A.Xudoyberganov ham Ulugʻbekning yodlash qobiliyati kuchli, eshitgan ohangini xotirasida saqlab, ijro eta olishini taʼkidlaydi.

Eʼtiborlisi, U.Toʻliboyevning sanʼatga mehri oʻzgacha. Shu bois har kuni yoʻl bosib, qiyinchiliklarga qaramay, tuman Madaniyat boʻlimi binosiga, toʻgarak mashgʻulotlariga hammadan avval yetib keladi. Boʻlim tomonidan Xalqaro nogironlar kuniga bagʻishlab tayyorlangan katta xayriya kontsertda Ulugʻbek Nazir Rahimovning “Bandang erurman” qoʻshigʻini ijro etdi.

Imkoniyati cheklangan boʻlishiga qaramay, oʻzining hayotdagi intilishlari sari dadil odimlayotgan Ulugʻbekning ijodi barakali boʻlishini tilab qolamiz.

Oygul RAJABOVA.