MAKTABLAR REYTINGI MEZONLARINI TUShUNTIRIShGA BAGʻIShLANGAN OʻQUV-AMALIY SEMINAR OʻTKAZILDI

“Milliy reyting natijalari va pedagog kadrlar attestatsiyasini tashkil qilishda taʼlim tashkilotlari rahbarlarining roli” mavzusida oʻquv-amaliy seminar tashkil qilindi.

23-dekabr kuni Amudaryo tumanidagi 38-sonli maktabda tuman Xalq taʼlimi boʻlimining Taʼlim sifati monitoringi boʻlimi tomonidan tashkil etilgan seminarda boʻlim masʼullari, mutaxassislari va tumandagi barcha umumtaʼlim maktablarining oʻquv ishlari boʻyicha direktor oʻrinbosarlari ishtirok etishdi.

Oʻquv-amaliy seminarni tuman Xalq taʼlimi boʻlimi mudiri oʻrinbosari Ibragim Rajabov kirish soʻzi bilan ochib berdi va amaliy seminarda oʻrganiladigan mavzular bugungi kunda taʼlim sifatini oshirishda juda dolzarbligini aytib, fikrlarini bildirdi.

Shundan soʻng, Taʼlim sifati monitoringi boʻlimi bosh inspektor-metodisti Rayhon Yakubova soʻzga chiqib, maʼruza qildi. U oʻz maʼruzasida bugungi kunda pedagog kadrlarning salohiyatini oshirishga qaratilgan tadbirlar, ularning ahamiyati toʻgʻrisida batafsil soʻz yuritdi. Shuningdek, taʼlim-tarbiya va ilm-fan sohalarini rivojlantirishga doir Prezident farmonlari va hukumat qarorlari mazmun-mohiyatini ham tushuntirib oʻtdi.

Taʼkidlanganidek, endilikda umumiy oʻrta taʼlim muassasalari reytingini aniqlash tartibga koʻra amalga oshiriladi. Reyting aniqlashning asosiy maqsadi – umumiy oʻrta taʼlim muassasalari oʻrtasida sogʻlom raqobat muhitini shakllantirish, muassasalarining rahbarlari va pedagoglarining jamiyatdagi oʻrni va maqomini oshirish, mehnatini munosib qadrlash, faoliyat samaradorligiga qarab, moddiy ragʻbatlantirish, mahalliy boshqaruv organlarining oʻz hududlarida taʼlim sifatini oshirishga qaratilgan faoliyatini kuchaytirishdan iboratdir. Xorijiy tajribaga koʻra maktablar reytingida asosiy bosh mezon – bu oʻquvchilarning bilim darajasidir. Shu sababli umumiy oʻrta taʼlim muassasalari reytingi Finlyandiya, AQSh, Janubiy Koreya, Rossiya, Yaponiya, Estoniya, Singapur, Gollandiya kabi davlatlarining ilgʻor tajribasiga muvofiq, toʻrtta muhim yoʻnalishda 8 ta indikator asosida aniqlanadi.

Seminar ishtirokchilariga mazkur yoʻnalish va indikatorlar haqida keng tushunchalar berilib, endilikda shu asosda taʼlim sifatiga baho berilishi maʼlum qilindi. Shu bilan birga tumandagi umumtaʼlim muassasalarining oʻtgan oʻquv yilidagi faoliyati samaradorligi boʻyicha “Milliy reyting – 2022” natijalari tahlil etildi.

Taʼlim sifati monitoringi boʻlimi inspektor-metodisti Farhod Avezov ham “Maktabgacha, umumiy oʻrta, oʻrta-maxsus, professional va maktabdan tashqari taʼlim tashkilotlari pedagog kadrlarini attestatsiyadan oʻtkazish toʻgʻrisida”gi nizomga kiritilgan oʻzgartirish va qoʻshimchalar toʻgʻrisida maʼlumot berib oʻtdi. Undan tashqari, Vazirlar Mahkamasining “Maktabgacha, umumiy oʻrta, oʻrta maxsus, professional va maktabdan tashqari taʼlim tashkilotlari pedagog kadrlarini attestatsiyadan oʻtkazish tartibini takomillashtirish chora-tadbirlari toʻgʻrisida»gi, “Nodavlat sektorda professional taʼlimni rivojlantirishga shart-sharoitlar yaratilishi hamda pedagog kadrlarni attestatsiyadan oʻtkazish tizimi takomillashtirilishi munosabati bilan Oʻzbekiston Respublikasi hukumatining ayrim qarorlariga oʻzgartirish va qoʻshimchalar kiritish toʻgʻrisida”gi qarorlari mazmun-mohiyatini tushuntirib oʻtdi. Shu bilan birga, oʻqituvchilarning pedagogik mahorati va psixologik tayyorgarligini odilona baholash boʻyicha muhim tavsiyalar berdi.

Oʻquv-amaliy seminardagi maʼruzalar qizgʻin muhokama etildi. Taʼlim sifati monitoringi boʻlimi bosh inspektor-metodisti Rayxon Yakubova hamda inspektor-metodist Farhod Avezovlar seminar ishtirokchilarini qiziqtirgan savollarga toʻliq va batafsil javoblar berishdi.

O.Xudoyberganova.