2014-YILDA TUMANNI IQTISODIY-IJTIMOIY RIVOJLANTIRISh YaKUNLARI HAMDA 2015-YILGI REJALAR

IQTISODIYoT

2014-yil yakunlariga koʻra xalq isteʼmol mollari ishlab chiqarish hajmi 20.8 mlrd. soʻmni tashkil qilib, 2013-yilning shu davriga nisbatan 120 foizga, qishloq xoʻjaligi yalpi mahsuloti 141,3 mlrd. soʻmni tashkil qilib, 106,5 foizga, pudrat ishlari 67,5 mlrd. soʻmni tashkil qilib, 114,8 foizga, chakana savdo aylanmasi 130,1 mlrd. soʻmni tashkil qilib, 113,5 foizga, pullik xizmat koʻrsatish 55,7 mlrd. soʻmni tashkil qilib, 125,2 foizga oshishi kutilmoqda.

Sanoat salohiyatini rivojlantirish Dasturiga asosan 32 ta loyihalar toʻliq amalga oshirilib, ularga 5161,0 mln. soʻm, shu jumladan loyiha tashabbuskorlari tomonidan 2608,0 mln. bank kreditlari hisobidan 2553,0 mln. soʻm mablagʻ sarflandi.

Servis va xizmat koʻrsatish sohalarini rivojlantirish dasturiga asosan 101 ta servis va xizmat koʻrsatish obʼektlari ishga tushirilishi natijasida 186 ta yangi ish oʻrinlari tashkil qilindi.

Tumanda qishloq xoʻjalik mahsulotlari ishlab chiqarishni, yaʼni chorvachilik, parrandachilik, baliqchilik, asalarichilikni rivojlantirish dasturi ishlab chiqilib, mazkur dasturga jami qiymati 2 mlrd. 443 mln. soʻmlik 49 ta loyihalar kiritildi. Bu yoʻnalishda olib borilgan ishlar natijasida jami 2 mlrd. 461 mln. soʻmlik investitsiyalar oʻzlashtirilib, 49 ta loyiha toʻliq amalga oshirilib, ularda 204 ta yangi ish oʻrni yaratildi.

Bugungi kunda tumanda jami 1301 ta kichik biznes subʼektlari davlat roʻyxatidan oʻtkazilgan boʻlib, shundan 1260 tasi faoliyat koʻrsatmoqda. Tuman tijorat banklari tomonidan ularni qoʻllab-quvvatlash maqsadida jami 13 mlrd. 782 mln. soʻm kredit mablagʻlari ajratildi. Natijada 240 ta kichik biznes subʼektlari tashkil qilinib, oʻz faoliyatini boshladi. Bundan tashqari, yakka tadbirkor sifatida 218 ta fuqaro davlat roʻyxatidan oʻtib, oʻz faoliyatini boshladi.

2014-yilda "Amudaryo paxta tozalash” AJga qarashli paxta tozalash zavodi Mangʻit shahri markazidan "Oq oltin” ovuliga koʻchirib oʻtkazildi. Ovuldagi paxta qabul qilish maskani hududida 5 milliard soʻmlikdan ortiq qurilish va taʼmirlash ishlari amalga oshirilib, korxona yangidan ish boshladi.

2014-yilda tumanimizda ip-kalava ishlab chiqarishga moʻljallangan, umumiy qiymati 32,0 mln. YeVRO (51 mln. 300 ming AQSh dollari) miqdoridagi zamonaviy uskunalar bilan jihozlangan yangi korxona – "AMUDARYOTEX” MChJ koʻrinishidagi xorijiy korxonasi ishga tushirilib, korxona tomonidan ip-kalava ishlab chiqarish yoʻlga qoʻyildi. Loyihani amalga oshirish natijasida 320 ta yangi ish oʻrinlari yaratildi.

2014-yilga moʻljallangan bandlik dasturi toʻliq ijro etilib, 5258 ta yangi ish oʻrinlari yaratildi.

"Sogʻlom bola yili” davlat dasturi ijrosini taʼminlash uchun 24 mlrd. 54 mln. 100 ming soʻm, 375.9 ming AQSh dollari va 36.0 ming YeVRO miqdorida mablagʻ sarflandi.