MILLIY ARMIYaMIZ –FAXRIMIZ, IFTIXORIMIZ

1853-yilda Qoʻqon xonligiga qarashli Oqmachit Rusiya tomonidan istilo qilindi. Bundan ruhlangan rus armiyasining shiddat bilan olib borgan janglari natijasida Buxoro amirligi va Qoʻqon xonligi Rusiya mustamlakasiga aylanadi. 1880-yilda mamlakat imperatori davlatida tinchlikni saqlab turish uchun oʻz hududida yashaydigan barcha erkaklarni olti yillik majburiy harbiy xizmatga jalb qilish haqida farmon qabul qiladi. Biroq bu farmon Turkiston oʻlkasi uchun tatbiq etilmaydi. Ularning fikricha, bizning turkistonlik erkaklar olti yil harbiy xizmatga olinsa, harbiy texnikani puxta egallab, harbiy mahorati oshib, ruslarning oʻlkamizdagi hukmronligini xavf ostida qoldirishi mumkin edi.

Bundan bir necha yuz yil oldin hatto rus armiyasini ham oʻzlarining vatanparvarligi, yurtiga fidoyiligi va qoʻrqmasligi bilan tahlikaga solgan qadimiy va hamisha navqiron yurtimiz yigitlari, Manguberdi urpoqlari xizmat qilayotgan, bundan 23-yil muqaddam tashkil topgan Milliy armiyamizga yuragida yurt mehri mujassam, harbiy qasamyodiga sodiq oʻgʻlonlarni saralab berayotgan tuman mudofaa ishlari boʻlimi boshligʻi, podpolkovnik Faxriddin Musulmonov bilan bayram arafasida boʻlgan suhbatda bizga quyidagilarni soʻzlab berdi:

– Istiqlol yillarida Yurtboshimiz rahnamoligida izchil amalga oshirilayotgan islohotlar tufayli Qurolli Kuchlarimiz har jihatdan mustahkamlandi, kuch-qudrati oshdi. Ona yurtimizni koʻz qorachigʻiday asrash, milliy armiya safida xizmat qilish yigitlarimiz uchun muqaddas burch va sharafga aylandi. Yigitlarni harbiy xizmatga kuzatish, zahiraga boʻshatilgan askarlarni kutib olish bayram tusini oldi.

Yurtboshimizning 2008-yil 20-noyabrdagi "Fuqarolarning Oʻzbekiston Respublikasi Qurolli Kuchlarida muddatli harbiy xizmatni oʻtash shart-sharoitlarini takomillashtirish chora-tadbirlari toʻgʻrisida”gi Farmoniga binoan yigitlar muddatli harbiy xizmatga yiliga bir marta chaqiriladigan boʻldi. Mudofaaishlari boshqarmalari, boʻlimlari chaqiruv maskanlari infratuzilmasi takomillashtirildi, zarur moddiy-texnik ashyolar va uskunalar bilan jihozlandi.

Oʻgʻlonlarimizning oʻz yurtimizda harbiy xizmat burchlarini ado etayotganliklari, oʻz yurti ravnaqi va osoyishtaligi yoʻlida xizmat qilayotgani ularning koʻnglini faxr-iftixorga toʻldirmoqda.

Shuni alohida taʼkidlash joizki, bugun milliy armiyamiz saflarida har tomonlama chiniqqan, mard yigitlar xizmat qilayapti. Ona Oʻzbekistonimizga, ezgu qadriyatlarimizga sodiq oʻgʻlonlardan tarkib topgan Armiyamiz yurtimiz tinchligining ishonchli tayanchidir.

Shuningdek, Oʻzbekiston Respublikasi Vazirlar Mahkamasining 2003-yil 22-fevraldagi "Oʻzbekiston Respublikasi fuqarolarining safarbarlik chaqiruv rezervidagi xizmatini tashkil etish chora-tadbirlari toʻgʻrisida”gi qarorining hayotga tatbiq etilishi ham mamlakatimizning mudofaa qudratiga qudrat qoʻshmoqda.

Shuni ham aytib oʻtish oʻrinliki, harbiy xizmatning mazkur turida oʻz burchini oʻtab, bugungi kunda tumanimiz ravnaqiga munosib hissa qoʻshib kelayotgan yigitlarimiz talay. Tuman iqtisodiyot boʻlimi mutaxassisi Rashid Salayev, Xalq banki tuman boʻlimi xodimi Salomat Oʻrozboyev, Mikrokreditbank Mangʻit filiali boshqaruvchisi Alibek Omonov, tuman prokuraturasi devonxonasi katta noziri Obid Yoʻldoshev, tuman Davlat soliq inspektsiyasi xodimlari Ikrom Salayev, Inomjon Karimov, "Mangʻit pochta” aloqa tarmogʻi boshligʻi Islom Matkarimovlar shular jumlasidandir.

Oʻtgan yilning oʻzida muddatli harbiy xizmatni oʻtab qaytgan yigitlarning 51 nafari oʻzlari tanlagan soha boʻyicha ishga joylashtirildi. Oʻzlari xizmat qilgan qism qoʻmondonligining tavsiyanomasiga ega boʻlgan 5 nafar yigit turli oliy oʻquv yurtlariga imtiyozli ravishda oʻqishga qabul qilindi.

Mamlakatimiz Qurolli Kuchlarining bugungidek yuksak salohiyatga ega boʻlishida malakali harbiy mutaxassis kadrlarni tayyorlab berayotgan Mudofaa Vazirligi tasarrufidagi oliy harbiy bilim yurtlarining oʻrni alohidadir. Toshkent oliy umumqoʻshin qoʻmondonlik bilim yurti, Chirchiq oliy tank qoʻmondonlik-muhandislik bilim yurti, Samarqand oliy harbiy avtomobil qoʻmondonlik-muhandislik bilim yurti , Jizzax oliy harbiy aviatsiya bilim yurti, Toshkent axborot texnologiyalari universitetining maxsus fakulteti, Toshkent tibbiyot akademiyasi huzuridagi harbiy tibbiyot fakulteti shular jumlasidandir. Ana shu maskanlarda ayni kunda tumanimizdan 8 nafar oʻgʻlonlar taʼlim olishmoqda. Mudofaa vazirligiga qarashli harbiy qismlarda tumanimizning 130 nafardan ortiq ofitser va serjant kadrlari mamlakatimiz osoyishtaligini saqlashdek muqaddas va ezgu ishga hissa qoʻshmoqdalar.

Har safar navbatdagi harbiy xizmatga chaqiruv boshlanishi bilan: "men ham Armiyaga borishni xohlayman”, deb murojaat qiladigan yigitlarni koʻrganimda quvonib ketaman. Bu ularning mamlakatimiz osoyishtaligiga oʻzlarini burchli, deb bilganidan. Milliy Armiyamiz ana shunday vatanparvar, otashqalb yigitlardan tarkib topgan ekan, yurt tinchligi ishonchli qoʻllarda, deya baralla aytishga haqlimiz. Tinchligimiz posbonlarini 14-yanvar - Vatan himoyachilari kuni bilan samimiy tabriklayman!

Suhbatdosh: Oygul Rajabova.