69-SONLI MAKTABDA “YoSh TABIATShUNOSLAR” TADBIRI OʻTKAZILDI

Ayoqchi mahallasidagi 69-sonli maktabda kimyo va biologiya fanlari toʻgaragi aʼzolari ishtirokida buyuk olim Charlz Darvin tavalludining 214-yilligi va Dmitriy Mendeleyev tavalludining 189-yilligi munosabati bilan “Yosh tabiatshunoslar” bayram tadbiri tashkil etildi.

13 arel kuni boʻlib oʻtgan mazkur tadbirda maktab oʻqituvchilari va oʻquvchilari ishtirok etishdi. Maktabning oliy toifali kimyo va biologiya fani oʻqituvchilari Minavar Matchonova hamda Xosiyat Oʻrozboyevalar tomonidan tashkil etilgan ushbu tadbirni 10-sinf oʻquvchilari Mashhura Jumaniyozova, Oʻgʻiljon Otajonovalar olib borishdi.

Tadbirda maktabning 9-11-sinf oʻquvchilari faol ishtirok etishdi. Dastlab oʻquvchilar kimyoviy elementlarga sheʼriy taʼrif berib, oʻzlarini tanishtirib chiqishdi. Bir guruh oʻquvchilar esa elementlarni raqs tarzida koʻrsatib berishdi.

Tadbirda taʼkidlanganidek, kimyo va biologiya fanlari farmatsevtika, oziq-ovqat, neft va gazni qayta ishlash, qurilish materiallarini ishlab chiqarish, togʻ-kon sanoati, ekologiya va atrof-muhitni muhofaza qilish, tibbiyotning turli tarmoqlarida oʻta muhim hisoblanadi. Oʻta murakkab boʻlishiga qaramasdan bu fanlar juda qiziqarli boʻlgani sababli maktabda tashkil etilgan toʻgarakda yuqori sinf oʻquvchilari faol ishtirok etishadi.

Maktabda dars va toʻgarak mashgʻulotlari davomida ochiq darslar, seminarlar, laboratoriya darslari tashkil etiladi va oʻquvchilar bilan birgalikda elementlar tanishtirib boriladi. Chunki hozirgi davrda kimyo va oziq-ovqat sanoatlari rivojlanib borgan sari malakali kadrlarga ham ehtiyoj ortayotgani sababli kimyo va biologiya fanlarini chuqur oʻqitilishi oliy taʼlim muassasalarida sanoat korxonalariga malakali kadrlarni yetishtirishda, keyinchalik yetuk ilmiy xodimlar, tibbiyot xodimlarini tayyorlashda tayyorlashda muhim omil sanaladi.

Tadbir davomida oʻquvchilar kimyo fani bilan birga biologiya fanidan ham bilimdonliklarini namoyish etib, yer yuzidagi noyob oʻsimliklarni tanishtirib oʻtishdi. Biologiya fanida hayotdagi tirik organizmlar va tabiiy jamoalarning tuzilishi, funktsiyasi, tirik mavjudotlarning kelib chiqishi va tarqalishi, ularning bir-biri va tirik tabiat bilan oʻzaro bogʻlanishini oʻrganishayotganini aytib, tarixda bobokalonlarimiz fanning rivojiga oʻz hissasini qoʻshgani toʻgʻrisida gapirib oʻtishdi. Shuningdek, Abu Rayhon Beruniyning tabiat 5 elementga, yaʼni boʻshliq, havo, olov, suv va tuproqdan yaratilgan deb eʼtirof etgani,  u oʻzining «Hindiston» asarida tabiatni daraxtdagi eng baquvvat va sogʻlom novdalarining oʻsishiga imkon beradigan bogʻbonga oʻxshatganini, bu bilan u tirik organizmlar oʻrtasida yashash uchun kurash borishi va tabiiy tanlanish sodir boʻlishini bashorat kilganini, zamonaviy fanda bu oʻzining isbotini topgani haqidagi maʼlumotlarni soʻzlab berishdi.

Tadbirda maktabning 10-11-sinf oʻquvchilari ishtirokida tabiatni asrash, unga doʻstona munosabatda boʻlish, ekologik muammolarni bartaraf etishga birgalikda harakat etish kabilarni aks ettirgan chuqur maʼno va mazmunga, tarbiyaviy ahamiyatga ega boʻlgan sahna koʻrinishlarini taqdim etishdi. Qiziqarli oʻtgan tadbirda oʻquvchilar kimyo va biologiya fanlari hamda uning rivojiga munosib hissa qoʻshgan alloma bobokalonlarimiz, buyuk olimlar Charlz Darvin va Dmitriy Mendeleyevlar haqida keng va batafsil maʼlumotlarga ega boʻldilar. Qiziqarli oʻtgan tadbir barchaga manzur boʻldi.

Xosiyat Oʻrozboyeva, shu maktab oʻqituvchisi.