YoNGʻINGA QARShI SUV OLGICh (GIDRANT)LARNING DOIMIY ShAY HOLATDA BOʻLIShI KOʻNGILSIZLIKLARNING OLDINI OLADI

Yongʻinga qarshi suv olgich (gidrant)lar yongʻin sodir boʻlganda yongʻin oʻchirish avtomashinalarini suv bilan taʼminlash va yongʻinlarni tezda bartaraf etishda muhim oʻrin tutadi.

Amudaryo tumani hududida jami 275 ta yongʻinga qarshi suv olgich (gidrant)lari mavjud boʻlib, tuman Favqulodda vaziyatlar boʻlimining yillik rejasiga asosan tumandagi barcha yongʻinga qarshi suv olgich (gidrant)larini yiliga kamida ikki marta nazoratdan oʻtkazib, texnik holatini oʻrganish belgilangan. Mazkur yongʻinga qarshi suv olgich (gidrant)larning texnik holatini amalda oʻrganish boʻyicha Amudaryo tumani Favqulodda vaziyatlar boʻlimi 3-sonli va 4-sonli Kasbiylashtirilgan yongʻin-qutqaruv qismlari va Suv tarmoqlari korxonasi bilan hamkorlikda yoʻl xaritasi ishlab chiqilgan. Ushbu yoʻl haritaga asosan yongʻinga qarshi suv olgich (gidrant)larning texnik holati Amudaryo tumani Favqulodda vaziyatlar boʻlimining 3-sonli va 4-sonli Kasbiylashtirilgan yongʻin-qutqaruv qismlari shaxsiy tarkibi va Suv tarmoqlari korxonasi xodimlari ishtirokida doimiy ravishda amalda oʻrganib borilmoqda.

Yaqinda oʻrganishlar jarayonida tumanimizning Gulzor MFY hududida joylashgan 16 dona yongʻinga qarshi suv olgich (gidrant)larining texnik holati talablar darajasida emasligi aniqlandi va mavjud nosozliklar tuman Favqulodda vaziyatlar boʻlimi xodimlari va Suv tarmoqlari korxonasi xodimlari tomonidan joyida bartaraf qilinib, uzluksiz suv bilan taʼminlanishi yoʻlga qoʻyildi.

Navbatdagi oʻrganish jarayoni tumanimizning “Amudaryo gaz servis” hamda “Amudaryo metan savdo” MChJlar hududida joylashgan yongʻinga qarshi suv olgich (gidrant)larining texnik holati bilan tanishish maqsadida amalga oshirildi. Mazkur korxonalar hududlaridagi yongʻinga qarshi suv olgich (gidrant)larining shtoklari qotib qolganligi aniqlanib, Suv tarmoqlari korxonasi xodimi Farhod Haytimbetov tomonidan aniqlangan kamchiliklar joyida bartaraf qilindi.

Favqulodda vaziyatlarda va yongʻin sodir boʻlganda yuz bergan ofatni tezlik bilan bartaraf etishda suv olgich (gidrant)larining doimiy shay holatda boʻlishini taʼminlash maqsadida idora va tashkilotlar, korxonalar masʼullari ham ushbu inshootlar atrofida ortiqcha qurilishlar yoki toʻsiqlar boʻlmasligiga eʼtibor qaratishlari zarur. Shu bois, tuman hududida joylashgan idora, korxona va tashkilotlar rahbarlariga hamda aholiga shuni aytmoqchi edikki, obʼekt hududida yoki koʻcha boʻylarida joylashgan yongʻinga qarshi suv olgich (gidrant)larning atroflarida doimiy ravishda obodonlashtirish ishlari olib borilishi, yongʻin oʻchirish avtomobillari erkin harakatlanishi uchun toʻsiqlar koʻyilmasligini, gidrantlar oʻrnatilgan joyni koʻmib tashlamasliklarini, koʻrsatkich belgilariga zarar yetkazmasliklarini iltimos qilamiz.

Ravshan Bahramov