BIRINChI USTOZGA EHTIROM KOʻRSATILDI

Maktab – qutlugʻ dargoh. Ming turfa hayajon, hayrat ila shu dargohga qadam qoʻygan jajji oʻgʻil-qizlarning ertaga qanday insonlar boʻlib voyaga yetishi ularga maktabdagi taʼlim berish sifati-samaradorligiga koʻp jihatdan bogʻliq. Oilada ilk hayotiy tushunchalari shakllangan bola maktab taʼlimidan savodi chiqadi, ilm oʻrganadi. Uygʻun tarbiya yosh niholsifat bolaning kamolga yetishini taʼminlaydi. Bunda albatta boshlangʻich taʼlimning oʻrni juda muhim.

Umumiy oʻrta taʼlimning poydevori hisoblanmish boshlangʻich taʼlimga ilk qadam qoʻygan bolada poydevorning mustahkam boʻlishi koʻp jihatdan oʻqituvchiga bogʻliq.

6-7 yoshli bola misli oq qogʻoz, unda nimalar aks etishi oila tarbiyasi va boshlangʻich taʼlim sifatiga bogʻliq. Boshlangʻich taʼlim fani oʻqituvchisi dastur boʻyicha oʻqitiladigan barcha fanlarni chuqur bilishidan tashqari, oʻqitish mahoratiga ham ega boʻlishi talab etiladi.

Mangʻit shahridagi 16-sonli maktab taʼlim samaradorligi boʻyicha tumanimizda koʻzga koʻringan namunali muassasalardan hisoblanadi. Maktab oʻquvchilari asosiy fanlar olimpiadalarida, turli koʻrik-tanlovlarda ishtirok etishib, koʻpgina yutuqlarni qoʻlga kiritib kelishmoqda.

Erishilayotgan yutuqlarda maktabning boshlangʻich sinf oʻqituvchilarining munosib hissalari bor. Sharofat Jumatova ularning biri. Tajribali muallima har safar 1-sinfga bolalarni qabul qilganida ota-onalar farzandlarini shu sinfga joylashtirishga intilishadi.

Sharofat Jumatova tabiatan mehrli, koʻngli ochiq, bolajon. U taʼlim berayotgan sinfi oʻquvchilarining puxta bilim olishlari uchun gʻamxoʻrlik qiladi, dars jarayonida turli ilgʻor pedagogik texnologiyalarni qoʻllab, darsiga oʻquvchilar eʼtiborini jalb qila oladi. Shu boisdan ham taʼlim berayotgan oʻquvchilari boshlangʻich sinflardayoq koʻpgina yutuqlarga erishib, oʻzligini namoyon etishadi.

Mahoratli muallima 2019-2020 oʻquv yilida maktabga ilk qadam qoʻygan 31 nafar jajji oʻgʻil-qizlarni qabul qilib olgan edi. Joriy oʻquv yili yakunida u 4-yil davomida fidoyilik bilan ilk saboq bergan oʻquvchilari boshlangʻich taʼlimni tugatayaptilar.

Shu munosabat bilan oʻtkazilgan “Xayr, birinchi ustozim!” nomli maʼnaviy-madaniy tadbir barcha ishtirokchilarda oʻchmas taassurotlar qoldirdi. Tadbirga maktab maʼmuriyati vakillari, oʻqituvchilar, oʻquvchilar, ularning ota-onalari ishtirok etdilar.

Maktab majlislar xonasi bayramona bezatilgan. Bir ota-ona farzandlariday chiroyli kiyinib, qoʻllarida guldastalar tutib sahnaga chiqib kelgan oʻquvchilarni ota-onalar, barcha ishtirokchilar – qarsaklar bilan olqishlab turishdi. Ularni ustozi Sharofat Jumatova boshlangʻich taʼlimni tugatayotganliklari bilan qizgʻin tabrikladi, kelgusi oʻqishlarida muvaffaqiyatlar tiladi.

Boshlangʻich sinf bitiruvchilari qoʻllaridan tutib, yozishni, oʻqishni oʻrgatgan, har birining bilimli, aqlli va kuchli boʻlib ulgʻayishiga gʻamxoʻrlik qilib, fidoyilik bilan taʼlim-tarbiya bergan ustoziga mehri va ehtiromini sheʼrlar, qoʻshiqlar, raqslar bilan izhor etdilar.

Tadbirda ishtirok etgan ota-onalar Sharofat Jumatovaga cheksiz minnatdorchiliklarini bildirdilar.

Tadbirda davrada oʻquvchilari taqdim etgan guldastalarni bagʻriga bosib oʻtirgan muallima ham, barcha ishtirokchilar ham oʻquvchilar tayyorlagan “Xayr, birinchi ustozim!” nomli musiqiy dasturdan ulkan taassurotlar oldilar.

Oygul Rajabova