PARVOZING BALAND BOʻLSIN, SEVINChOY!

Iqtidorli, ilmli va intiluvchan yoshlar nafaqat oilasining, balki, yurtimizning ham faxridir. Chunki Vatanimiz kelajagi, xalqimiz taqdiri yoshlar qoʻlida.

Shuning uchun ham mamlakatimiz umumiy oʻrta taʼlim maktablarida pedagoglar jamoasi oldiga qoʻyiladigan asosiy talab – oʻquvchilarga bilim asoslarini chuqur oʻrgatish, iqtidorli oʻquvchilarni aniqlash, iqtidorini qiziqishi yuqori yoʻnalishda rivojlantirishga koʻmaklashish, uni yuzaga chiqarishi uchun shart-sharoit yaratishdir.

Shuningdek, taʼlim muassasalarida yoshlarni mustaqil fikrlashga oʻrgatish, boʻsh vaqtlarini mazmunli tashkil etish lozim. Ularning biror kasb-hunarni yo mutaxassislikni egallashi uchun poydevor yaratish, iqtidorli oʻquvchilarni ragʻbatlantirib, ularni yana ham oʻz ustida ishlashga, intilishga jalb etmoq lozim.

Amudaryo tumanidagi umumiy oʻrta taʼlim maktablarida ham ana shunday ulugʻvor maqsad masʼuliyat bilan ado etilayotgani bois, ularda koʻpgina iqtidorli oʻquvchilar kamolga yetmoqda.

Joriy oʻquv yilida tumandagi umumiy oʻrta taʼlim maktablarini bitirgan 2704 nafar yoshlarning 36 nafari oltin, 11 nafari kumush medallar bilan taʼlim muassasasini tugatib, qizil attestat olishga erishdilar.

Mangʻit shahrida faoliyat yuritayotgan 16-sonli maktabning bitiruvchisi Rustambekova Sevinch Nurbek qizi ham umumiy oʻrta taʼlimni oltin medal bilan tugatib, nafaqat oilasi, ustozlarining ham faxriga aylandi.

2005-yilda tugʻilgan Sevinch Rustambekova birinchi sinfga ilk qadam qoʻygan davridanoq dars mashgʻulotlarini hech qiynalmay oʻzlashtirishi, namunali xulqi bilan ajralib turardi. Yuqori sinflarga koʻtarilganida uning ayniqsa xorijiy – ingliz tilini bilishga, oʻrganishga qiziqishi yuqori ekanini sezgan ustozi Marhabo Shomurodova u bilan jiddiy shugʻullandi, darsdan boʻsh vaqtlarida mutolaa qilib bilimini oshirishi uchun qoʻshimcha adabiyotlar berdi.

Maktabda ustozlar saʼy-harakatiga oilasidagi uning taʼlim-tarbiyasiga berilgan eʼtibor Sevinchoyning ingliz tilini mukammal oʻrganishiga asos boʻldi. Mazkur maktabda uzoq yillar matematika oʻqituvchisi boʻlib ishlagan buvisi Oʻgʻiljon Sultonova, ota-onasi uning darsdan soʻng oʻquv markaziga qatnab, ingliz tilini chuqur oʻrganishiga gʻamxoʻrlik qildilar va natijada Sevinchoy IELTS sertifikati uchun ingliz tilidan imtihon topshirib, 7 ball, ona tilidan bilim darajasini aniqlashda esa 84 ball toʻplashga erishib, milliy sertifikat olishga erishdi.

Sevinchoy oʻzi oʻquvchi boʻlaturib, “ICEBERG” oʻquv markazida oʻzi kabi ingliz tilini bilishga qiziquvchi yoshlarga ingliz tilidan dars ham berdi.

Maktabni muvaffaqiyatli, oltin medal bilan tugatib, ingliz tilini yuqori darajada oʻzlashtirgan qiz hozirgi kunda yettita xorijiy oliygohlarga grant asosida talabalikka qabul qilinish huquqini qoʻlga kiritdi. Biroq u oʻz kelajagini ancha oldin rejalashtirib qoʻygan edi. Yaʼni ota-onasi, buvisi tavsiyasiga koʻra, Toshkentdagi Jahon tillari universitetida oʻqib, yetuk ingliz tili mutaxassisi boʻlish va tumanimiz yoshlarining ingliz tili bilimdoni boʻlishlariga koʻmaklashish uchun zamonaviy sharoitlarda faoliyat yuritadigan oʻquv markazini tashkil etish.

Orzular qanotida kelajagi sari parvozga dadil shaylanayotgan Sevinch Rustambekovaga kelgusida muvaffaqiyatlar yor boʻlishini tilab qolamiz.

Oygul RAJABOVA.