FIDOYI MUALLIMA VA ELIM, YuRTIM DEGAN TADBIRKOR

Hayotda yaxshi inson va yaxshi mutaxassis boʻlish uchun el-yurt manfaati yoʻlida oʻzni safarbar etish, xalqqa manzur ishlar qilish, oʻz atrofingdagilarning qalblariga xotirjamlik baxsh etib yashash kerakki, toki el-u yurting sendan rozi boʻlsin. Elni rozi qilib, koʻpning duolarini olib yashash esa hammaga ham nasib etavermaydi.

Agar taʼbir joiz boʻlsa, Choykoʻl ovulida istiqomat qiluvchi Muyassarxon Matkarimova oʻzining fidoyiligi bilan el-yurtga chin dildan qayishib, koʻplab insonlarning hurmat va eʼtirofiga sazovor boʻlgan, pirovardida  el duosini olib yashayotgan insonlardan.

Asli kasbi til va adabiyot oʻqituvchisi boʻlgan Muyassarxon Matkarimova 22-yillik pedagogik tajribaga ega. Tabiatan bolajon, yangilikka intiluvchan boʻlgan Muyassarxon oʻzining asosiy kasbiy faoliyatidan ajralmagan holda tadbirkorlik bilan shugʻullanishga qaror qildi. Choykoʻl ovulining “Choqcha” aholi punktidagi qarovsizlikdan xaroba holatga kelib qolgan, bir vaqtlar bolalar bogʻchasi, keyinchalik qishloq shifokorlik punkti vazifalarini oʻtagan binoning 2020-yilda kim oshdi savdosiga qoʻyilayotganini eshitib, oʻzini sinab koʻrmoqchi boʻldi. Omadi kelib, binoni kimoshdi savdosida yutib olgan Muyassarxon binoning haqiqiy holati bilan tanishgach, hatto: “bekor oldimmikan?” – deya ikkilanib ham yurdi. Unga qaynotasi Yangiboy ota Oʻrozaliyev va umr yoʻldoshi Maqsudjon yaqin masalahatgoʻy hamda koʻmakchi boʻlishdi. Maqsudjon tadbirkor emasmi, bino taʼmiri uchun 1 mlrd. soʻmdan ziyod mablagʻ ajratdi. Joriy rekonstruktsiyadan soʻng “chiroyi” ochilib qolgan binoni quvona-quvona jihozladi. Zamonaviy divan-karavotlar, yumshoq mebellar toʻplamlari, 3 yoshdan 6 yoshgacha boʻlgan bolalarga moʻljallangan oʻyinchoqlar olib kelib, binoning ichkarisi va hovlisini ertak qahramonlarining rasmlari, haykalchalar bilan bezatdi. 2022-yilda 50-oʻringa moʻljallangan “Shirintoy” nodavlat maktabgacha taʼlim tashkiloti oʻz faoliyatini boshladi.

Nihoyatda koʻrimsiz holga kelib qolgan binoda “Shirintoy” nodavlat maktabgacha taʼlim tashkiloti faoliyatini yoʻlga qoʻyish istagida ikki yildan ortiq vaqt yelib-yugurgan Muyassar Matkarimovaning uddaburonligidan, “choqcha”lik yosh oilalar uchun yaratib bergan sharoitidan, nodavlat MTTdagi namunali taʼlim-tarbiya muhitidan eldoshlari bugun mamnun.

Eʼtiborlisi shundaki, mazkur nodavlat MTT tashkil etilishi bilan choykoʻlllik 8 nafar ayol-qizlarning doimiy ish bilan bandligi taʼminlandi. Farzandini MTTga berish uchun oylab navbat kutadigan yosh onalar uchun qulaylik yaratildi, bolajonlari shundoq oʻzlari yashab turgan mahallaning oʻzida, koʻzlari oldida taʼlim-tarbiya olish imkoniga ega boʻldilar.

Qolaversa, onalar oʻz farzandlarining har tomonlama qulay shart-sharoitlarga ega muassasada tarbiyalanishlarini xohlashadi. “Shirintoy” nodavlat MTTda ana shunday qulay maʼnaviy-maʼrifiy muhit yaratilgan. Farzandlarini mazkur muassasaga berish istagida boʻlgan onalar safi kun sayin oshib borayotganini hisobga olgan Muyassarxon shartnoma asosida bolalarni muassasaga xavfsiz olib kelish va olib ketish boʻyicha xizmatni ham yoʻlga qoʻydi. Endilikda ikkita “Damas” rusumli atomoshinada ovulning olis mahallalaridagi yosh onalarning xotirjam ishlashlari uchun bolajonlar MTTga har kuni oʻz vaqtida olib kelinadi va kechqurun ularni ota onalariga beminnat olib-borib topshirishadi.

Muyassarxonning rejalari koʻp. Kelajakda nodavlat MTTda yasli guruhini ham ochish niyatida. Bundan tashqari, bolajonlar uchun ingliz, rus tili, sport toʻgaraklari faoliyatini yoʻlga qoʻyish orqali maktabgacha tayyorlov guruhida tarbiyalanayotgan bolajonlarning til oʻrganish va jismoniy chiniqish koʻnikmalarini rivojlantirish, maktabgacha taʼlim guruhini tashkil etib, alfavitni va karra jadvalini oʻzlashtirgan bolajonlarni tarbiyalash orzusini roʻyobga chiqarish uchun fidoyilik bilan mehnat qilmoqda.

- Maqsadim, har tomonlama yetuk va bilimga intiluvchan bolajonlarni tarbiyalash orqali mamlakatimiz taʼlim-tarbiya sohasiga oʻz hissamni qoʻshish – deydi Muyassarxon Matkarimova.

Biz esa tinib-tinchimas fidoyi oʻqituvchi, el-yurt farovonligi, oilalar xotirjamligini taʼminlash yoʻlida beminnat xizmat qilayotgan tadbirkor Muyassarxon Matkarimovaga tolmas kuch-quvvat, ishlariga muvaffaqiyat tilaymiz.

Robiya YOʻLDOShEVA.