QILIChBOYDA TARGʻIBOT TADBIRI OʻTKAZILDI

Maʼlumki, Oʻzbekiston Respublikasi dunyodagi barcha mamlakatlar bilan oʻzaro munosabatlarda tinchlikparvarlik tamoyiliga amal qiladi. Uning tashqi siyosatida davlatlarning suveren tengligi, kuch ishlatmaslik yoki kuch bilan tahdid qilmaslik, chegaralarning daxlsizligini saqlash kabi qoidalar mustahkam oʻrin olgan. Shuningdek, xalqimizning tinch-osoyishta yashashini taʼminlash, turli xavf-xatarlardan himoya qilishga alohida eʼtibor qaratiladi.

Oʻzbekiston Qurolli Kuchlari jangovar shayligini, qudratini oshirish, Milliy Armiyamiz saflarini vatanparvar, bilimdon, dovyurak askarlar bilan butlab borish doimiy eʼtiborda. Ayniqsa, harbiy xizmatchilar va xodimlarning harbiy vatanparvarlik tuygʻusini, maʼnaviy saviyasini va intellektual salohiyatini yuksaltirish, ularda mamlakatimizning qadimiy va boy madaniyati, azaliy qadriyatlari, urf-odatlari va anʼanalariga asoslangan keng dunyoqarashni shakllantirish juda muhim.

Harbiy xizmatchilar ongiga Vatan himoyasi har bir fuqaroning sharafli va muqaddas burchi ekanligini, milliy armiyamiz bilan faxrlanish, davlat va jamiyat xavfsizligi uchun masʼuliyat tuygʻusini shakllantirishga alohida eʼtibor qaratilmoqda. Bular oʻz navbatida armiyamiz qudrati yana ham oshishiga xizmat qiladi.

Shu boisdan ham harbiy xizmatchilar, chegaralarimizda sobit turib el osudaligini taʼminlab harbiy qismlarda muddatli harbiy xizmat burchini oʻtayotgan askarlar bilan maʼnaviy-maʼrifiy targʻibot tadbirlari tez-tez oʻtkazib turiladi.

Shuningdek, chegaraoldi hududlarda yashovchi aholi orasida chegaralar daxlsizligini saqlash qonun-qoidalarini keng targʻib etish, ular koʻnglida mamlakatimiz qonunlariga hurmat ruhini tarbiyalash va boʻysunishlariga erishish, chegaraoldi taʼqiqlangan hududlarga kirishlariga yoʻl qoʻymaslik ham osoyishtalikni asrashning asosiy shartlaridandir.

8-sentyabr kuni mamlakatimizning Turkmaniston davlati bilan chegara hududida joylashgan Amudaryo tumanining Qilichboy ovulida ushbu hududda joylashgan Davlat xavfsizlik xizmati Chegara qoʻshinlariga qarashli harbiy qism xizmatchilari, muddatli xizmat burchini oʻtayotgan askarlar, hudud aholisi uchun maʼnaviy-maʼrifiy targʻibot tadbiri oʻtkazildi.

Respublika Maʼnaviyat va maʼrifat markazi, Davlat xavfsizlik xizmati Chegara qoʻshinlari, “Maʼrifat” targʻibotchilar jamiyati, Yoshlar ishlari agentligi hamkorligida tashkil etilgan tadbirda taniqli shoira Zulfiya Moʻminova, Oʻzbekistonda xizmat koʻrsatgan artist Gavhar Zokirova, Alisher Otaboyev va boshqa el sevgan shoirlar, yozuvchilar, sanʼatkorlar ishtirok etishdi.

Qilichboy Madaniyat markazida boʻlib oʻtgan tadbir bayram tusini oldi. Dastlab mamlakatimizdagi tinchlik-osoyishtalikning ahamiyati, yoshlar uchun yaratilayotgan gʻamxoʻrliklar haqida, barcha sohalarda amalga oshirilayotgan islohotlar tufayli hayotimizda yuz berayotgan yangilanishlar, oʻzgarishlar xususida soʻz bordi.

Taniqli shoira Zulfiya Moʻminovaning Vatan madhiga bagʻishlangan sheʼrini yigʻilganlarning barchasi qarsaklar bilan olqishladi. Tadbir targʻibot guruhi aʼzolari boʻlgan sanʼatkorlarning kontserti bilan davom etdi.

Oygul RAJABOVA