YoSh IJODKORNING ILK KITOBI TAQDIMOTIGA BAGʻIShLANGAN TADBIR OʻTKAZILDI

Amudaryo telekanali tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida yoshlar maʼnaviyatini yuksaltirish, kitobxonlikka jalb etish, intellektual salohiyatini oshirish maqsadida turli tanlovlar, kitoblar koʻrgazmasi, yangi asarlar taqdimotlari oʻtkazilib borilmoqda. Loyiha rejasiga koʻra oʻtkazilayotgan bunday tadbirlar yoshlar maʼnaviy dunyosini boyitish, kitob oʻqishga qiziqishlarini oshirishda muhim ahamiyat kasb etmoqda.

Ushbu grant loyihasi ish rejasiga muvofiq Ixtisoslashtirilgan taʼlim muassasalari agentligi tizimidagi Amudaryo tumani ixtisoslashtirilgan maktabida yosh ijodkor Mashhura Rajabovaning yaqinda nashrdan chiqqan “Koʻnglim” deb nomlangan ilk sheʼriy toʻplami taqdimotiga bagʻishlangan tadbir tashkil etildi.

12-oktyabr kuni boʻlib oʻtgan ushbu tadbirda tahririyat xodimlari, maktabning maʼnaviy-maʼrifiy ishlar boʻyicha direktor oʻrinbosari Muyassar Rahmatullayeva, ona tili va adabiyot fani oʻqituvchisi Mohira Sobirova, tuman Axborot kutubxona markazi xodimlari hamda oʻquvchi-yoshlar qatnashishdi.

Tadbirda maktabning ona tili va adabiyot fani oʻqituvchisi Mohira Sobirova inson hayotida kitoblar va kitobxonlikning ahamiyati, tafakkur va dunyoqarashni kengaytirishdagi oʻrni haqida soʻzladi. Shuningdek, tahririyat xodimlari grant loyihasi doirasida oʻtkazilayotgan tadbirlar, turli tanlovlar, ularda ishtirok etib gʻolib boʻlayotgan, kitobxonlikka qiziqishi yanada ortayotgan yoshlar, yosh ijodkorlarni qoʻllab-quvvatlash borasida amalga oshirilayotgan ishlar xususida maʼlumotlar berishdi. Iqtidorli ijodkor Mashhura Rajabova hamda uning “Koʻnglim” deb nomlangan ilk sheʼriy toʻplami bilan tanishtirib oʻtishdi.

Mashhura Rajabova 2009-yilda Mangʻit shahrida tavallud topgan. U hozir tumandagi 82-sonli maktabning 9-sinfida oʻqiydi. Mashhura badiiy adabiyotga bolaligidan juda qiziqadi, koʻp badiiy kitoblar mutolaa qiladi. Uning uyidagi kitob javonidan oʻzbek adiblarining turli janrlardagi asarlari, atoqli shoirlarning sheʼriy toʻplamlari bilan birga mumtoz va chet el adabiyotiga doir kitoblar oʻrin olgan. Boʻsh vaqtlarida sheʼrlar mashq qilib turadigan ijodkor qiz tumandagi “Taraqqiyot koʻzgusi” gazetasi tahririyatidagi tajribali jurnalistlarga oʻz ijod namunalarini koʻrsatib, maslahat va tavsiyalarini tinglaydi. Har bir ijodiy ishi ustida qayta va qayta ishlab, mukammallashtirishga harakat qiladi.

Mashhuraning “Koʻnglim” deb nomlangan ilk sheʼriy toʻplamidan Vatan, doʻstlik, tabiat, mehr-oqibat, ezgulik haqidagi qirqqa yaqin sheʼrlar joy olgan. Havaskor shoiraning ustozi, Qoraqalpogʻistonda xizmat koʻrsatgan jurnalist Robiya Yoʻldosheva taʼrif berganidek, uning sheʼriy satrlarida jigarbandlik mehri, doʻstlikning qudrati, mehnatning ulugʻligi, va insonning qadr-qimmati haqidagi fikrlari aks etgan. Ijodi bilan tanishib borish jarayonida koʻnglidagi joʻshqinlikni, samimiy tuygʻular va kelajak haqidagi ulkan orzularini anglash, his qilish mumkin.

Yosh ijodkorning ilk sheʼriy toʻplami taqdimotiga bagʻishlangan tadbirda ishtirok etgan oʻquvchi-yoshlar uning ijodiyotiga katta qiziqish bildirib, adabiyot va sheʼriyat haqidagi turli savollariga javoblar olishdi. Adabiyotga qiziquvchi oʻquvchilar havaskor shoiraning shu paytga qadar oʻqigan kitoblari, asosan qaysi janrdagi adabiyotlarni koʻproq mutolaa qilishi va ijod namunalari haqida suhbatlashishdi.

Tadbir yakunida Mashhura Rajabova Ixtisoslashtirilgan maktab kutubxonasi va tuman Axborot kutubxona markaziga oʻzi kabi yoshlarni ham sheʼriyati bilan tanishtirish maqsadida “Koʻnglim” deb nomlangan kitobchasini sovgʻa qildi. Boʻlib oʻtgan tadbirdan katta taassurotlar olgan yoshlar va maktab maʼmuriyati ham barchasi uchun minnatdorchilik bildirishdi.

Amudaryo telekanali tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida yosh ijodkor Mashhura Rajabovaning “Koʻnglim” deb nomlangan ilk sheʼriy toʻplami taqdimotiga bagʻishlab oʻtkazilgan ushbu tadbir barchaga birdek manzur boʻldi.

O.Xudoyberganova.