6 OYLIKKAChA BOʻLGAN BOLALARDA OʻTKAZILADIGAN PROFILAKTIK EMLAShLAR DAVOM ETMOQDA

Yuqumli kasalliklarning oldini olishda profilaktik emlashlar katta ahamiyatga ega. Tibbiyot xodimlari aholi immunizatsiyasiga doir xizmatni taqdim etish jarayonida hamisha milliy emlash taqvimiga tayanadi va vaktsinalar bilan ishlash yoʻriqnomalariga amal qiladi.

Keyingi yillarda Respublikada immunnoprofilaktika ishlarining samarali oʻtkazilishi natijasida koʻpgina yuqumli kasalliklar, jumladan, boshqariladigan infektsiyalarni sezilarli darajada kamaytirilishiga erishildi. Ayniqsa, bolalarni emlash ishlarini takomillashtirishga katta ahamiyat berilmoqda.

Immunoprofilaktika tadbirlarining samarali oʻtkazilishi natijasida respublikada 1995-yildan boshlab, bolalarda poliomiyelit kasalligi, 2002-yildan difteriya, chaqaloqlar qoqsholi, 2001-yildan boshlab tugʻilgan bolalar oʻrtasida Virusli gepatit V kasalligi qayd qilinmadi. Qizamiq va qizilcha kasalliga qarshi emlangan bolalar oʻrtasida kasallik qayd qilinmadi. Milliy taqvim asosida respublikamizda boʻlganidek tumanimizda ham har yili 13 turdagi yuqumli kasalliklarga qarshi profilaktik emlash oʻtkaziladi.

Amudaryo tumanida profilaktik emlash ishlarini oʻtkazish uchun tibbiyot xodimlari har yil oʻqitilib, bilim saviyasi oshiriladi va sertifikatlar beriladi.

Tumanda ayni kunlarda 2 oylikkacha boʻlgan bolalarni profilaktik emlash ishlari amalga oshirilmoqda.

Joriy ilning 11-oktyabrida tuman Sanitariya epidemiologik osoyishtalik va jamoat salomatligi boʻlimining epidemiologiya va immunoprofilaktika boʻlimi mudirasi Gulshod Tojiboyeva tuman Tibbiyot birlashmasiga qarashli tugʻruq kompleksida boʻlib, yangi tugʻilgan chaqaloqlarning kasalliklarga qarshi ilk emlanishini nazorat qildi. U dastlab bu borada olib borilayotgan ishlar bilan tanishdi va emlash ishlarini olib boruvchi xodimlar bilan suhbatlashdi. Emlashning chaqaloqning kelgusidagi hayotidagi ahamiyatini, emlash jarayoniga yuksak masʼuliyat bilan qarash lozimligini keng tushuntirdi.

Shuningdek, Gulshod Tojiboyeva tuman koʻptarmoqli markaziy poliklinikasidagi emlash punktida ham boʻlib 2 oylik bolalarni kasalliklarga qarshi emlash jarayonlari bilan tanishdi, jarayonni sifatli oʻtkazishga doir zarur tavsiyalar berdi.

Profilaktik emlashlar tuman Tibbiyot birlashmasining tugʻruq kompleksi, koʻp tarmoqli markaziy poliklinikadan tashqari oilaviy va oilaviy shifokorlik punktlaridagi emlash xonalarida ham oʻtkazilmoqda.

Tumanimiz boʻyicha 2 yoshgacha 14225 nafar bola boʻlib, barchasi 98-100 foiz emlash bilan qamrab olinadi. Buning uchun emlash punktlari vaktsinalar bilan yetarli taʼminlangan. Vaktsinalarni hududiy emlash punktlariga olib borib berish uchun maxsus mashina ajratilgan. Emlash xonalar sovutkichlar, zarur jihozlar va shokga qarshi dori-darmonlar bilan taʼminlangan.

Kasallikni davolagandan koʻra uning oldini olgan afzal. Shuning uchun davlatimiz tomonidan bolalarni kasalliklarga qarshi profilaktik emlashga yuksak eʼtibor qaratilmoqda.

Katta mablagʻlar evaziga yetkazib berilayotgan vaktsinalar bilan bolalarning oʻz vaqtida emlanishini taʼminlashga ota-onalar ham masʼuliyat bilan qarashlari lozim. Zero, bolalar ­– yurtimiz kelajagi!

Oygul RAJABOVA.