16-va 26-sonli maktablarda Konstitutsiya kuni munosabati bilan tadbirlar oʻtkazildi

Har yili 8-dekabr – mamlakatimizning Asosiy Qonuni – Konstitutsiyamiz qabul qilingan kun ulkan tantana qilinadi. Boisi, davlatimizning erkin va adolatli fuqarolik jamiyatiga asoslangan demokratik davlat boʻlishida Konstitutsiyamizning ahamiyati cheksiz.

Mazkur hujjat davlat suverenteti gʻoyalariga yoʻgʻrilgani va inson shaʼni, huquqlarini muqaddas deb eʼtirof etgani bilan, fuqarolarning munosib hayot kechirishlarini, tinch-totuvligini taʼminlashga xizmat qilayotgani bilan ham har birimiz uchun azizdir. Shuning uchun ham har yili Konstitutsiya qabul qilingan kun yuritimizda keng tantana qilinadi. Sana munosabati bilan maktabgacha taʼlim, umumiy oʻrta taʼlim muassasalarida Konstitutsiya mazmun-mohiyatini targʻib etishga bagʻishlangan turli maʼnaviy-maʼrifiy tadbirlar oʻtkaziladi, “Konstitutsiyamizni oʻrganamiz” mavzusida darslar oʻtiladi, oʻquvchilarning Asosiy Qonunimiz haqidagi bilimlarini sinovdan oʻtkazish uchun turli tanlovlar oʻtkaziladi.

Amudaryo tumanining Bosuv mahallasida faoliyat yuritayotgan 26-sonli umumiy oʻrta taʼlim maktabida ham Konstitutsiyamiz qabul qilingan kunning 31-yilligi keng tantana qilindi.

Maktabning 3 “B” sinfida “Konstitutsiya – baxtimiz qomusi” deb nomlangan maʼnaviy-maʼrifiy tadbir oʻtkazildi. Unda sinf oʻqituvchisi Roza Gulmonova Konstitutsiya haqida, yosh avlodning taʼlim-tarbiya olishi, barkamol boʻlib voyaga yetishida davlatimizning amalga oshirayotgan gʻamxoʻrligi xususida batafsil tushunchalar berdi.

Oʻquvchilar mavzuga oid sheʼrlar ijro etdilar. 6 “B” sinf oʻqituvchisi Kumushoy Xolimbetova “Konstitutsiya – baxtimiz kafolati” mavzusida sinf soati oʻtdi. Sinf soatida Konstitutsiya haqida maʼruza tinglandi va bu boradagi oʻquvchilarning fikr-mulohazalariga ham keng oʻrin berildi. Muallima barcha fikrlarga munosabat bildirib, darsga yakun yasadi.

Shu kuni maktabning 5-7-sinflari oʻquvchilari oʻrtasida Konstitutsiya mazmun-mohiyatini ifoda etuvchi rasmlar tanlovi boʻlib oʻtdi. Belgilangan muddat ichida oʻquvchilar chizgan suratlarini oʻqituvchilar jamoasidan tuzilgan hakamlar hayʼati aʼzolari odilona baholadilar. Natijalarga koʻra, Jahongir Rajabboyev, Shodibek Ahmadov, Qamaroy Xudoyberganovalar chizgan rasmlar eng mazmunli va maqsad aniq ifoda etilgan, deb topildi. Fan oʻqituvchisi Nargiza Avazmurotova tanlov gʻoliblarini eʼlon qildi va taqdirladi.

Sana munosabati bilan maktabning huquqshunoslik fani oʻqituvchisi Nilufar Saʼdullayeva 9 “A” sinfda “Konstitutsiyamiz haqidagi bilimlarimiz” mavzusida davra suhbati oʻtkazdi.

Davra suhbatida oʻquvchilar Konstitutsiya haqidagi fikr mulohazalarini bildirdilar va mazkur hujjat yurtimizning yoshi, jinsi, mavqeidan qatʼiy nazar, har bir fuqarosi uchun emin-erkin yashashi, munosib sharoitlarda mehnat qilishi, oʻqishi va baxtiyor yashashining kafolati ekanligini taʼkidladilar.

Mavzu yuzasidan 9 “B” sinf oʻquvchilari orasida insholar tanlovi oʻtkazildi. Ona tili va adabiyot fani oʻqituvchisi Gulsevar Kamolova oʻtkazgan ushbu tanlovda Shahnozabonu Masharipova, Dilnavoz Ahmadovalar gʻolib, deb topildi.

Konstitutsiyamizning 31-yilligi sharafiga tashkillashtirilgan tadbirlar maktab badiiy havaskor oʻquvchilarining maxsus kontsert dasturiga ulanib ketdi.

Mangʻit shahrida joylashgan 16-sonli umumiy oʻrta taʼlim maktabida ham “Konstitutsiya – baxtimiz qomusi” deb nomlangan madaniy-maʼrifiy tadbir oʻtkazildi.

Tadbirni maktabning davlat va huquq asoslari fani oʻqituvchilari Maʼrifat Rajabova, Adolat Davekovalar 7-, 8-, 9-sinflar oʻquvchilari ishtirokida  tashkillashtirdilar.

Maktab faollar zalida boʻlib oʻtgan tadbirga maktab oʻqituvchilari, oʻquvchilari, ota-onalar vakillari ishtirok etdilar. Unda dastlab Konstitutsiyamiz haqida maʼruzalar oʻqildi va uning mazmun-mohiyati haqida oʻquvchilarga keng tushunchalar berildi.

Aytish joizki Asosiy Qonunimizning mazmun-mohiyati, uning hayotimizda tutgan oʻrni va ahamiyatini oʻquvchilar ongiga chuqur singdirishga alohida eʼtibor qaratilmoqda. Bu mazkur tadbirda ham oʻquvchilarning Konstitutsiyaning moddalariga bergan taʼrif-sharhlarida yaqqol namoyon boʻldi.

Oʻquvchilar ijro etgan Konstitutsiya, ona Vatan, tinchlik osoyishtalik va baxtiyor bolalik haqidagi sheʼrlar, qoʻshiqlar va raqslar tadbirga yana ham oʻzgacha shukuh bagʻishladi.

Tadbir oʻquvchilar namoyish etgan Asosiy Qonunimizning hayotimizdagi oʻrni, ahamiyatini targʻib etuvchi sahna koʻrinishi bilan nihoyasiga yetdi.

Oʻtkazilgan tadbirlar oʻquvchi-yoshlarga baxtimiz, tinch-osoyishtaligimiz, farovon hayotimiz kafolati boʻlgan Asosiy Qonunimizni keng targʻib etgani bilan ahamiyatli boʻldi.

Oygul RAJABOVA.