TUMANIMIZDA “PREZIDENT ARChASI” BAYRAM TADBIRI OʻTKAZILDI
29-dekabr kuni Amudaryo tumani Madaniyat boʻlimining tomoshalar zalida bolajonlarning eng sevimli bayramlaridan biri “Prezident archasi” tadbiri boʻlib oʻtdi. Unda tuman hokimi Sobir Xoʻjametov, sektorlar rahbarlari, davlat va jamoat tashkilotlari rahbarlari, tuman Maktabgacha va maktab taʼlimi boʻlimi masʼullari, maktab oʻquvchilari ishtirok etdilar.
Bayram tadbirini tuman hokimi Sobir Xoʻjametov ochib berdi hamda joriy yilda tumanimizda barcha sohalarda amalga oshirilgan ishlarni sarhisob qilib, kelgusi yil rejalari xususida, taʼlim muassasalari faoliyatini yanada rivojlantirish borasida amalga oshiriladigan vazifalar xususida toʻxtaldi. Shuningdek, tuman hokimi bolajonlarni yaqinlashib kelayotgan Yangi yil bilan qizgʻin qutladi va jamoatchilik vakillari ishtirokida ota-ona qarovisiz qolgan 18 nafar bolajonlarga Prezidentimizning sovgʻalarini topshirdi.
Mamlakatimizda bolalar kelajagimiz vorislari, millatimiz davomchilari sifatida eʼzozlanadi. Poyoniga yetayotgan 2023-yil – Insonga eʼtibor va sifatli taʼlim yilida ertamiz egalarini har tomonlama kamolga yetkazish borasida keng koʻlamli ishlar amalga oshirildi.
Davlatimiz rahbari Shavkat Mirziyoyev tashabbusi bilan yosh avlodni turli yot gʻoyalar, mafkuraviy tahdidlardan ishonchli himoyalash, ularning bilim va maʼnaviyatini yanada boyitishga qaratilgan keng qamrovli maʼrifiy loyihalar, amaliy chora-tadbirlar amalga oshirilmoqda.
Kam taʼminlangan, ota-ona qarovisiz qolgan bolalarga mehr va gʻamxoʻrlik koʻrsatishga alohida eʼtibor qaratilmoqda. Yangi yil arafasida kam taʼminlangan oilalarning farzandlariga kiyim-kechaklar hamda oziq-ovqat mahsulotlari yetkazib berilishi bolajonlarning quvonchiga quvonch qoʻshdi.
Jonajon Vatanimizda har bir inson aziz, uning qadr-qimmati yuksak. Shunga monand xalqimizning mehri daryo, saxovati ummon. Ayniqsa, farzandlarga mehr-muhabbat koʻrsatish azaliy qadriyatimiz. “Prezident archasi” bayram tantanalarida ham xalqimizning ana shunday insonparvarlik, mehr-oqibatlilik kabi ezgu fazilatlari yana bir bor namoyon boʻladi. Bu tadbir bolalarga quvonch, bir umrga unutilmas xotiralar tuhfa etadi.
Tuman Madaniyat boʻlimi tomonidan tayyorlangan maxsus musiqiy teatrlashtirilgan dastur, iqtidorli bolajonlar tomonidan sahnalashtirilgan musiqiy chiqishlar bayram qatnashchilari eʼtiboriga havola etildi. Qiziqarli sarguzashtlarga boy voqealar, kuy-qoʻshiqlar, raqslarni oʻzida jamlagan sahna koʻrinishi orqali kichkintoylar ahillik, hamjihatlik, mehnatsevarlik, halollik kabi insonga ziynat bagʻishlovchi fazilatlarning ahamiyatini yanada chuqurroq his qildilar.
Bayram dasturi davomida chiroyli bezatilgan Archa atrofida Qorbobo va Qorqiz, turli ertak qahramonlari ishtirokidagi tomoshalar bolajonlarni vatanparvarlik, doʻstlik, fidoyilik, tinchlik va osoyishtalikning qadriga etish kabi ezgu gʻoyalarga undadi.
Tadbir nihoyasida barcha bolalar, yosh ijrochilar, bayram ishtirokchilari joʻrlikda “Prezident archasi” qoʻshigʻini ijro etdi.
Yangi yil munosabati bilan bayram tantanalari tumanimizdagi barcha taʼlim muassasalari, mehnat jamoalarida koʻtarinki ruhda davom etmoqda.
Tuman hokimligi Axborot xizmati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
