PREZIDENT SAYLOVI – EL-YuRTIMIZ FAROVON KELAJAGINI TAʼMINLAShNING MUHIM OMILI

Shu yil 29-mart kuni boʻlib oʻtadigan Oʻzbekiston Respublikasi Prezidenti saylovi mamlakatimiz tarixida gʻoyat muhim ijtimoiy-siyosiy voqeadir. Zero, mamlakatimiz kelajagi, uning yanada taraqqiy topishi saylovning barcha ishtirokchilarining faolligi, siyosiy yetukligi va pirovard natijada saylovchilar qabul qiladigan qarorga bogʻliq.

Shu munosabat bilan saylovga eng yuksak tashkiliy-huquqiy va moddiy-texnik darajada tayyorgarlik koʻrish, uni milliy saylov qonunchiligimizda mustahkamlab qoʻyilgan demokratik printsiplarga toʻliq muvofiq holda ochiq-oshkora va adolatli tarzda oʻtkazish katta ahamiyat kasb etadi. Shu maqsadda tumanimizda ham qator ishlar amalga oshirildi.

Avvalo, aytish kerakki, tumanimizda 182311 nafar aholi istiqomat qiladi. Shundan 117772 nafari ovoz berish huquqiga ega fuqarolardir.

Saylovchilarga mumkin qadar koʻproq qulaylik yaratish maqsadida Oʻzbekiston Respublikasi Prezidenti saylovini oʻtkazuvchi 1-Qoraqalpogʻiston okrug saylov komissiyasi qarori bilan tuman hududida jami 58 ta saylov uchastkalari tuzildi. Saylov uchastkalarining 47 tasi umumtaʼlim maktablari, 8 tasi kasb-hunar kollejlari, 3 tasi tashkilotlar binolarida joylashgan.

Saylov uchastkalarini tashkiliy va texnik jihatdan saylovga tayyorlash boʻyicha ham barcha zarur ishlar oʻz vaqtida amalga oshirildi. Jumladan, har bir uchastka binosiga boradigan yoʻllarga koʻrsatkichlar, bino peshtoqiga saylov uchastkasi raqami yozilgan peshlavhalar oʻrnatildi. Uchastka saylov komissiyalari aʼzolari uchun xonalar ajratilib, xonalar mebel, temir seyf, telefon, faks, kompyuter, printer, televizorlar bilan taʼminlandi. Har bir uchastka davlat bayroqlari va gerblari, saylovchilar soniga qarab ikki, uch, toʻrt xonali yashirin ovoz berish kabinalari, byulleten tashlash uchun statsionar

va koʻchma qutilar bilan taʼminlandi.

Shuningdek, saylov uchastkalarida "Ona va bola xonalari” hamda "Tibbiyot xonalari” toʻliq jihozlandi. Bundan tashqari, uchastka saylov komissiyasi saylovga oid adabiyotlar, milliy saylov qonunchiligi toʻplamlari bilan taʼminlandi.

Xalq deputatlari tuman Kengashining qarori bilan uchastka saylov komissiyalari aʼzoligiga nomzodlar tanlanib, 1-Qoraqalpogʻiston okrug saylov

komissiyasiga tasdiqlash uchun tavsiya etildi va okrug saylov komissiyasining qarori bilan uchastka saylov komissiyalarining tarkibi tasdiqlandi.

Uchastka saylov komissiyasi aʼzolarining huquqiy bilim saviyasini yanada oshirish maqsadida bir necha marta oʻquv-seminarlari oʻtkazildi.

Saylovning ochiq va oshkora darajada amalga oshirilishini taʼminlash maqsadida ovul va mahallalar hududlariga, saylov uchastkalariga, korxona, tashkilot va muassasalar binolariga hamda markaziy koʻchalarga chaqiruv plakatlari, bannerlar osib qoʻyildi.

Saylovga tayyorgarlik koʻrish va uni oʻtkazish hamda ovoz berish kuni barcha saylov uchastkalarida xavfsizlikni saqlash, yongʻin xavfsizligini taʼminlash, issiqlik, elektr energiyasi va ichimlik suvi bilan taʼminlash, saylovchilarning roʻyxatini olishda uchastka saylov komissiyalariga tegishli maʼlumotlarni berish yuzasidan tegishli muassasa, korxona va tashkilotlarga zarur topshiriqlar berildi.

Belgilangan muddatlarda barcha saylov uchastkalarida saylovchilar roʻyxatlari maxsus stendga ilindi, hamda saylovchilarga taklifnomalar tarqatildi. Shuningdek, muddatidan oldin ovoz berish boʻyicha saylov varaqalari tarqatilib, saylov kuni istiqomat joyida boʻlish imkoniga ega boʻlmagan saylovchilar muddatidan oldin ovoz berdilar.

Bir soʻz bilan aytganda, tumanimizda Oʻzbekiston Respublikasi Prezidenti saylovini oʻtkazish uchun tayyorgarlik ishlari belgilangan muddatlarda nihoyasiga yetkazildi va saylov uchastkalari saylovga toʻliq shay holga keltirildi.

Shu oʻrinda yurtdoshlarimizni oʻzlarining konstitutsiyaviy huquqlaridan foydalangan holda boʻlajak saylovlarda faol ishtirok etib, oʻzlari munosib bilgan nomzodlarga ovoz berishga chaqiramiz.

Qadrli vatandoshlar!

Unutmang,

Oʻzbekiston Respublikasi Prezidenti saylovida Sizning ovozingiz muhim ahamiyatga ega. Shunday ekan, keling, yurt istiqboli va xalqimizning yorugʻ kelajagiga oʻzimizni daxldor his qilib, 29-mart kuni boʻlib oʻtadigan Oʻzbekiston Respublikasi Prezidenti saylovida faol ishtirok etaylik!

Bahodir BOLTABOYeV,

tuman hokimligi

tashkiliy-nazorat guruhi rahbari.